കോട്ടയം: എബിവിപി ഇന്നലെ നടത്തിയ കളക്ട്രേറ്റ് മാര്ച്ചിന് നേരെ യാതൊരു പ്രകോപനവും കൂടാതെ പോലീസ് നടത്തിയ ലാത്തിച്ചാര്ജ്ജില് വ്യാപക പ്രതിഷേധം. സ്വാശ്രയ മെഡിക്കല് പ്രവേശന വിഷയത്തില് സ്വകാര്യ മാനേജ്മെന്റുകള്ക്ക് അനുകൂലമായ നിലപാട് സ്വീകരിക്കുന്ന പിണറായി സര്ക്കാരിന്റെ നയങ്ങളില് പ്രതിഷേധിച്ചായിരുന്നു മാര്ച്ച്. ഉച്ചയ്ക്ക് മൂന്ന് മണിയോടെ തിരുനക്കര ക്ഷേത്ര മൈതാനിയില്നിന്നും ആരംഭിച്ച പ്രകടനം കളക്ട്രേറ്റിന് സമീപം പോലീസ് തടയുന്നതിന് ഇടയിലായിരുന്നു പോലീസ് വിദ്യാര്ത്ഥികള്ക്കുനേരെ ലാത്തിവീശിയത്. സംസ്ഥാന നേതാക്കളടക്കം നിരവധി വിദ്യാര്ത്ഥികള്ക്ക് പരിക്കേറ്റു. ഗുരുതരമായി പരിക്കേറ്റ എബിവിപി ജില്ലാ ജോയിന്റ് കണ്വീനര് വി.എസ്. വിഷ്ണു, ജില്ലാകമ്മറ്റിയംഗം ടി.സി. മണിക്കുട്ടന്, ഗോകുല് രമേഷ് എന്നിവരെ കോട്ടയം ജില്ലാ ആശുപത്രിയില് പ്രവേശിപ്പിച്ചു. സംസ്ഥാന ജോയിന്റ് സെക്രട്ടറി കൃഷ്ണരാജ്, ജില്ലാ കണ്വീനര് അരുണ് കെ.സി., ജോയിന്റ് കണ്വീനര് സൂരജ് എന്നിവരടക്കം നിരവധി വിദ്യാര്ത്ഥികള്ക്കാണ് പോലീസിന്റെ ക്രൂരമര്ദ്ദനമേറ്റത്. പ്രവര്ത്തകര്ക്ക് നേരെ യാതൊരു പ്രകോപനവും കൂടാതെയാണ് പോലീസ് ലാത്തിച്ചാര്ജ്ജ് നടത്തിയതെന്ന് എബിവിപി നേതാക്കള് ആരോപിച്ചു. സര്ക്കാരിന് വിടുപണി ചെയ്യുന്ന പോലീസ് വിദ്യാര്ത്ഥികള്ക്കുമേല് കരുത്തുകാട്ടിയ നടപടി കിരാതമായതായി ബിജെപി ജില്ലാ പ്രസിഡന്റ് എന്. ഹരി കുറ്റപ്പെടുത്തി. നിര്ദ്ധന വിദ്യാര്ത്ഥികള്ക്ക് ലഭിക്കാനുള്ള ഫീസിളവ് രാഷ്ട്രീയ പ്രേരിതമായ നിലപാടിലൂടെ ഇല്ലാതാക്കിയ പിണറായി സര്ക്കാരിന്റെ വിദ്യാര്ത്ഥി ദ്രോഹനടപടികള് അവസാനിപ്പിക്കണമെന്നും ഹരി ആവശ്യപ്പെട്ടു. സമരം ചെയ്യുന്ന വിദ്യാര്ത്ഥികളെ അടിച്ചമര്ത്താമെന്നുള്ള വ്യാമോഹം സര്ക്കാര് അവസാനിപ്പിച്ചില്ലെങ്കില് ഗുരുതരമായ പ്രത്യാഖ്യാതങ്ങള് സര്ക്കാര് നേരിയേണ്ടിവരുമെന്ന് അദ്ദേഹം മുന്നറിയിപ്പ് നല്കി. പരിക്കേറ്റ് ആശുപത്രിയില് കഴിയുന്ന വിദ്യാര്ത്ഥികളെ ആശുപത്രിയില് എത്തി എന്. ഹരി സമാശ്വസിപ്പിച്ചു. ജില്ലാ ജനറല് സെക്രട്ടറി കെ.പി. സുരേഷ് ആശുപത്രിയില് സന്ദര്ശനം നടത്തി.
സ്വാശ്രയ മെഡിക്കല് പ്രവേശന സമരം എബിവിപി പ്രവര്ത്തകര്ക്ക് നേരെലാത്തിച്ചാര്ജ്ജ്: വ്യാപക പ്രതിഷേധം
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.