തുറവൂര്: പമ്പാ പാതയുടെ പുനരുദ്ധാരണ പ്രവര്ത്തനങ്ങള് നടക്കുന്നതിനാല് ഒരു മാസം മുമ്പ് നന്നാക്കിയതുറവൂര് തൈക്കാട്ടുശ്ശേരി റോഡ് വെട്ടിപൊളിച്ചതില് വ്യാപക പ്രതിഷേധം ശക്തമായി.തുറവൂര്കവല മുതല് തൈക്കാട്ട്ശ്ശേരി പാലം വരെയുള്ള ജലവിതരണത്തിനുള്ള രണ്ട് വാല്വ് ചേംബറുകളുടെ അറ്റകുറ്റപണികള്ക്ക് വേണ്ടിയാണ് ഈ ഭാഗത്ത് റോഡു പൊളിച്ചത്.
മെറ്റലും പൊടിയും മിശ്രിതവും ചേര്ത്ത് ഒരു മാസം മുമ്പ് റോഡ് ഉറപ്പിച്ചിരുന്നതാണ്. എന്നാല് റോഡ് പണിക്ക് മുമ്പ് പൈപ്പിന്റെ അറ്റകുറ്റപണികള് നടത്തണമെന്ന് നാട്ടുകാര് വാട്ടര് അതോറിട്ടി അധികൃതരുടെ ശ്രദ്ധയില്പ്പെടുത്തിയിരുന്നതാണ്.ഇത് ഉദ്യോഗസ്ഥന്മാര് അവഗണിക്കുകയാണ് ചെയ്തത്. പമ്പാ പാത റോഡിന്റെ പുനരുദ്ധാരണ പ്രവര്ത്തനങ്ങളില് റോഡിന്റെ ഘനം കൂട്ടിയതിനാല് വാല്വ് ചേംബറി ന്റെ ഉയരവും വര്ധിപ്പിക്കേണ്ടി വന്നതിലാണ് റോഡ് വെട്ടിപൊളിച്ചതെന്ന് വാട്ടര് അതോറിട്ടി അധികൃതര് പറയുന്നത്.
മെറ്റലും പൊടിയും മിശ്രിതവും ചേര്ത്ത് ഉറപ്പിച്ച റോഡ് വെട്ടിപൊളിച്ച ഭാഗങ്ങളില് റോഡ് പണി ഇനി നടത്തിയാല് തന്നെ ഉടനെ പൊളിച്ചു പോകാനാണ് സാധ്യതയെന്ന് പൊതുമരാമത്ത് വകുപ്പ് അധികൃതര് വ്യക്തമാക്കി. ജനകീയാവശ്യം പരിഗണിച്ച് പമ്പാ പാതയിലെ തുറവൂര് മാക്കേകടവ് വരെയുള്ള റോഡിന്റെ പുനരുദ്ധാരണ പ്രവര്ത്തനങ്ങള് ഉടനെ പൂര്ത്തികരിക്കാന് പൊതുമരാമത്ത് വകുപ്പ് അധികൃതരും ജനപ്രതിനിധികളും സത്വര നടപടികള് സ്വീകരിക്കണമെന്ന് നാട്ടുകാര് ആവശ്യപ്പെട്ടു.
