ന്യൂദല്ഹി: ലോധ സിമിതി നിര്ദേശം നടപ്പാക്കാന് ഇന്ത്യന് ക്രിക്കറ്റ് കണ്ട്രോള് ബോര്ഡിന് (ബിസിസിഐ) സുപ്രീം കോടതിയുടെ അന്ത്യശാസനം. നിര്ദേശങ്ങള് നടപ്പാക്കാന് തയാറാണോയെന്ന് ഇന്ന് കേസ് പരിഗണിക്കുമ്പോള് അറിയിക്കണമെന്ന് കോടതി ആവശ്യപ്പെട്ടു. അല്ലെങ്കിലോ, മറുപടി നല്കിയില്ലെങ്കിലോ നടപ്പാക്കാന് ഉത്തരവിടുമെന്ന് ചീഫ് ജസ്റ്റിസ് ടി.എസ്. താക്കൂര് അധ്യക്ഷനായ ബെഞ്ച് വ്യക്തമാക്കി.
ബോര്ഡിനു മുന്നില് മറ്റു മാര്ഗങ്ങളില്ലെന്ന് കോടതി ഓര്മിപ്പിച്ചു. ഇല്ലെങ്കില് ബിസിസിഐ ഭാരവാഹികളെ നീക്കും. സമിതി നല്കിയ മാനദണ്ഡമനുസരിച്ചു മാത്രമേ സംസ്ഥാന അസോസിയേഷനുകള്ക്ക് 400 കോടി രൂപ നല്കാനാകു. എന്നാല്, കുടിശിക വിതരണം ചെയ്യാം- കോടതി വ്യക്തമാക്കി. ബിസിസിഐ പ്രസിഡന്റ് അനുരാഗ് താക്കൂറിനെതിരെയും കോടതി വിമര്ശനമുന്നയിച്ചു. പ്രസിഡന്റ് സ്ഥാനത്തെത്തുന്നതിനു മുന്പ് അനുരാഗ് ക്രിക്കറ്റ് കളിച്ചിട്ടുണ്ടോയെന്നാണ് ചീഫ് ജസ്റ്റിസ് ചോദിച്ചത്. ബോര്ഡിനായി ഹാജരായ അഭിഭാഷകന് കപില് സിബല്, അനുരാഗ് കളിക്കാരനായിരുന്നുവെന്ന് വ്യക്തമാക്കി.
സംസ്ഥാന അസോസിയേഷനുകളുടെ എതിര്പ്പാണ് നിര്ദേശം നടപ്പാക്കുന്നതിനു തടസമായി ബിസിസിഐ ചൂണ്ടിക്കാട്ടിയത്. വാര്ഷിക ജനറല് ബോഡിയുടെ തീരുമാനപ്രകാരമാണ് നടപടിയെന്ന്ബിസിസിഐ അറിയിച്ചു. അസോസിയേഷനുകളുമായി സമവായത്തിലെത്താന് സമയം വേണമെന്നും ബോര്ഡ് ആവശ്യപ്പെട്ടു.
