പരപ്പനങ്ങാടി: ബിജെപി പ്രവര്‍ത്തകര്‍ക്ക് നേരെ നിരന്തരം സിപിഎം നടത്തുന്ന ആക്രമങ്ങള്‍ക്കെതിരെ ബിജെപി പ്രതിഷേധ ജ്വാല സംഘടിപ്പിച്ചു.
കഴിഞ്ഞ ദിവസം ജന്മഭൂമി ഏജന്റും ബിജെപി പരപ്പനങ്ങാടി ഏരിയ പ്രസിഡന്റുമായ കാട്ടില്‍ ഉണ്ണികൃഷ്ണന്റെ വീടിന് നേരെ സിപിഎമ്മുകാര്‍ കരിഓയില്‍ ഒഴിക്കുകയും കിണറ്റില്‍ ബാര്‍ബര്‍ ഷോപ്പ് മാലിന്യം വിതറുകയും ചെയ്തിരുന്നു. ഇതിനെതിരെ പ്രദേശത്ത് രാഷ്‌ട്രീയഭേദമന്യേ ജനങ്ങള്‍ പ്രതിഷേധത്തിലാണ്.
ബിജെപി സംസ്ഥാന വൈസ് പ്രസിഡന്റ് എന്‍.ശിവാരജന്‍ യോഗം ഉദ്ഘാടനം ചെയ്തു. സിപിഎം അധികാരത്തിന്റെ അഹങ്കാരത്തിലാണ് ഇത്തരം ആക്രമണങ്ങള്‍ നടത്തുന്നതെന്നും, പ്രവര്‍ത്തകരെ കയറൂരി വിടുന്ന നേതാക്കളെ പൊതുജനം തെരുവില്‍ നേരിടുന്ന കാലം വിദൂരമല്ലെന്നും അദ്ദേഹം പറഞ്ഞു. ബിജെപി ജില്ലാ പ്രസിഡന്റ് കെ.രാമചന്ദ്രന്‍ മുഖ്യപ്രഭാഷണം നടത്തി. സിപിഎം ബിജെപി പ്രവര്‍ത്തകരെ മാത്രമല്ല മുഴുവന്‍ ജനങ്ങളെയാണ് ഉപദ്രവിക്കുന്നത്. തിരൂര്‍, താനൂര്‍ പ്രദേശങ്ങളില്‍ വ്യക്തമായ രാഷ്‌ട്രീയം പോലുമില്ലാത്തവരെയാണ് സിപിഎം ഗുണ്ടകള്‍ കയ്യേറ്റം ചെയ്തത്. ഒരു നാടിനെ മുഴുവന്‍ ഭീതിയുടെ നിഴലിലേക്ക് തള്ളിവിട്ട് കൊണ്ട് സിപിഎം നടത്തുന്ന രാഷ്‌ട്രീയ പ്രവര്‍ത്തനം അവരുടെ നാശത്തിനാണെന്ന് രാമചന്ദ്രന്‍ പറഞ്ഞു.
ജില്ലാ ജനറല്‍ സെക്രട്ടറി രവിതേലത്ത്, അഡ്വ.അഷറഫ്, കെ.പി.വത്സരാജ്, പി.വി.തുളസിദാസ്, ടി.ശ്രീധരന്‍, അംബിക മോഹന്‍രാജ്, ഉഷ പാലക്കല്‍ തുടങ്ങിയവര്‍ സംസാരിച്ചു
പ്രതികരിക്കാൻ ഇവിടെ എഴുതുക: