കോട്ടയം: ഭക്തിയാകണം ഹൈന്ദവന്റെ ശക്തിസ്രോതസ്സെന്നും ഋഷീശ്വരന്മാരിലൂടെ ആര്ജ്ജിതമായ ഈ സംസ്കാരം വേദാധിഷ്ഠിതമാണെന്നും തിരുവിതാംകൂര് ദേവസ്വം ബോര്ഡ് പ്രസിഡന്റ് പ്രയാര് ഗോപാലകൃഷ്ണന് പറഞ്ഞു.
ശബരിമലയുടെ പ്രാധാന്യത്തെ കുറച്ച് കാണിക്കാന് രാഷ്ട്രീയഗൂഢാലോചന നടക്കുന്നുവെന്ന് സംശയിക്കുന്നു. ഇതിനെതിരെ ആഗോളതലത്തില് അയ്യപ്പഭക്തന്മാര് ഒത്തുകൂടുകയാണ്. സ്ഥാനമാനങ്ങള്ക്കുവേണ്ടി ഒരു രാഷ്ട്രീയചായ്വിനും താന് ഒരുക്കമല്ലെന്നും അദ്ദേഹം പറഞ്ഞു. പനച്ചിക്കാട് സരസ്വതി ക്ഷേത്രത്തിലെ നവരാത്രി ആഘോഷങ്ങളുടെ കലാപരിപാടി ഉദ്ഘാടനം നിര്വ്വഹിച്ച് സംസാരിക്കുകയായിരുന്നു അദ്ദേഹം.
നവരാത്രി ആഘോഷയാത്രയോടുള്ള എതിര്പ്പ് കരാര്ലംഘനമാണെന്നും അദ്ദേഹം പറഞ്ഞു. മാര്ത്താണ്ഡവര്മ്മ മഹാരാജാവും മെക്കാളപ്രഭുവും തമ്മിലാണ് കരാര് ഒപ്പുവച്ചത്. ഇതനുസരിച്ച് പത്മനാഭപുരം കൊട്ടാരത്തില്നിന്ന് പുറപ്പെടുന്ന വിഗ്രഹ ഘോഷയാത്രയ്ക്ക് സായുധസേനയുടെ അകമ്പടിയും ഗാര്ഡ് ഓഫ് ഓണറും പത്മനാഭമണ്ഡപത്തില് പ്രതിഷ്ഠിച്ച് രാജകുടുംബാംഗങ്ങള്ക്കും തിരുവിതാംകൂറിലെ ജനങ്ങള്ക്കും പ്രാര്ത്ഥിക്കുവാനും ദര്ശിക്കുവാനുമുള്ള അവസരം ഒരുക്കണം. പത്മനാഭ സ്വാമിക്ഷേത്രത്തിലെ ആറാട്ട്ഘോഷയാത്ര വിമാനത്താവളത്തിലൂടെ ശംഖുമുഖത്തേയ്ക്കും തിരിച്ചും എഴുന്നള്ളിക്കണമെന്നുള്ള രണ്ടുകരാറുകളാണുള്ളത്. ഇതിന്റെ ലംഘനമാണ് ഇപ്പോള് സര്ക്കാര് നടത്തിയത്. അതുകൊണ്ട് തിരുവിതാംകൂര് ദേവസ്വം ബോര്ഡ് ഈ ചുമതലകള് ഏറ്റെടുത്തിരിക്കുകയാണെന്നും പ്രയാര് പറഞ്ഞു.
വിവിധ ഹിന്ദുസംഘടനകളും ബോര്ഡ് ജീവനക്കാരും ഉപദേശകസമിതിയംഗങ്ങളുമടക്കം വന്ജനാവലിയാണ് ഘോഷയാത്രയെ സ്വീകരിക്കുവാന് എത്തിയിരിക്കുന്നത്. വൈക്കം ക്ഷേത്രകലാപീഠത്തിലെ വിദ്യാര്ത്ഥികള്ക്ക് ഡിഗ്രിക്ക് തുല്യമായ സര്ട്ടിഫിക്കറ്റ് നല്കുവാന് തീരുമാനമെടുക്കുമെന്നും 50ലക്ഷം രൂപ വിദ്യാലയ നവീകരണത്തിനായി ബഡ്ജറ്റില് വകയിരുത്തുമെന്നും അദ്ദേഹം പറഞ്ഞു. അയ്യപ്പന്മാര്ക്ക് ആധുനിക ചികിത്സാസൗകര്യങ്ങള് നല്കുന്നതിനായി ശബരിമലയില് സൂപ്പര് സെപെഷ്യാലിറ്റി ആശുപത്രിയും മെഡിക്കല് കോളേജും സ്ഥാപിക്കും. കഴിഞ്ഞ രണ്ടുകൊല്ലങ്ങള്ക്കിടയില് ചികിത്സ നല്കുവാന് കാലതാമസം വന്നതുമൂലം 185 തീര്ത്ഥാടകരുടെ ജീവനാണ് പൊലിഞ്ഞത്. ശബരിമലയില് അപകടം നടന്നാല് മൂന്നരമണിക്കൂര് യാത്രചെയ്ത് കോട്ടയം മെഡിക്കല് കോളേജില് രോഗികളെ എത്തിക്കേണ്ടിവരുന്നു. ഇതിന് പരിഹാരം കാണണം. ദേവസ്വം ബോര്ഡ് വിദ്യാലയങ്ങളുടെ അഭിവൃത്തിക്കുവേണ്ടി നന്ദകുമാര് ഐഎഎസിനെ സ്പെഷ്യല് ഓഫീസറായും നിയമിച്ചു. ശാന്തിക്കാര്ക്ക് വൈദിക വിദ്യാഭ്യാസം നല്കുവാന് ദേവസ്വം ബോര്ഡ് പദ്ധതി ആവിഷ്ക്കരിച്ചിട്ടുണ്ടെന്നും അദ്ദേഹം പറഞ്ഞു.
