പെരിന്തല്മണ്ണ: വര്ഷങ്ങളായി കഞ്ചാവ് വില്പ്പന വ്യാപകമായി നടക്കുന്ന പെരിന്തല്മണ്ണ മേഖലയില് ലഹരിയുടെ അമ്പരിപ്പിക്കുന്ന പുതുപുത്തന് രീതികള്. വെട്ടത്തൂര്, തെക്കന്മല കവല, കാപ്പ്, മേല്കുളങ്ങര ഭാഗങ്ങളില് ലഹരിക്ക് വേണ്ടി ഫെവികോള് എന്ന പശ ഉപയോഗിക്കുന്നതായി കണ്ടെത്തി. പതിനഞ്ച് വയസില് താഴെയുള്ള കുട്ടികളാണ് അധികവും ഫെവികോളില് ലഹരി കണ്ടത്തുന്നത്. വെട്ടത്തൂര് പ്രദേശത്തെ ജനകീയ കൂട്ടായ്മ നടത്തിയ അന്വേഷണത്തിലാണ് ഞെട്ടിക്കുന്ന വിവരങ്ങള് പുറത്തു വന്നത്. പ്ലാസ്റ്റിക്ക് പോലുള്ള കവറുകളില് ഫെവികോള് ഒഴിച്ച് ചൂടാക്കി അതില് നിന്നും പുറത്തു വരുന്ന ഗന്ധം വലിച്ചു കയറ്റിയാണ് ഇതില് നിന്നും ലഹരി കണ്ടെത്തുന്നത്. ഇത്തരം സാധനങ്ങള് കിട്ടാത്ത അവസരങ്ങളില് എഴുത്ത് മായിക്കുന്ന വെറ്റനര് ഉപയോഗിച്ചും പാരസെറ്റാമോള് പോലുള്ള ഗുളികളും ലഹരിയായി ഉപയോഗിക്കുന്നു. അത് ഉപയോഗിക്കുന്ന രീതി വാര്ത്തയില് ജന്മഭൂമി ഉള്പ്പെടുത്തുന്നില്ല.
പ്രായ പൂര്ത്തിയാവാത്ത കുട്ടികള് ലഹരിക്ക് അടിമപ്പെടുന്ന ഇത്തരം പ്രവര്ത്തികള്ക്കെതിരെ നടപടി സ്വീകരിക്കാന് അധിക്യതര് മുന്നോട്ട് വരാത്തതാണ് ഇവര്ക്ക് പ്രോത്സാഹനമാകുന്നത്. അന്യസംസ്ഥാന തൊഴിലാളികളെന്ന പേരില് നാട്ടില് എത്തിയവരില് ചിലരാണ് ഇത്തരം പദാര്ത്ഥകള് വില്ക്കുന്നത്. കഞ്ചാവ് വാറ്റിയെടുത്ത ഒരുതരം പാനീയവും പാല്കായത്തിന്റെ ഗന്ധമുള്ള ഗുളികളും അമിതമായി ഉപയോഗിക്കുന്നുണ്ട്.
ഇതിനെ കുറിച്ച് മനസിലാക്കാനോ പിടിച്ചെടുക്കാനോ അധിക്യതര്ക്ക് സാധിക്കാത്തതും ഇത്തരക്കാര്ക്ക് സഹായമാകുന്നു. അന്യസംസ്ഥാന തൊഴിലാളികളുടെ താമസ സ്ഥലവും പരിസരവും വേണ്ടവിധം പരിശോധന നടത്തിയാല് ഇതിനെ തടയാന് കഴിയുമെന്ന് നാട്ടുകാര് പറയുന്നു. പ്രദേശത്ത് തന്നെയുള്ള ചില മുതിര്ന്ന കഞ്ചാവ് വില്പ്പനക്കാരുടെ സഹായത്തോടെയാണ് കച്ചവടം പൊടിപൊടിക്കുന്നത്, വളരെ കുറഞ്ഞ കാലങ്ങള് കൊണ്ടാണ് വെട്ടത്തൂരില് മയക്കു മരുന്ന് കച്ചവടക്കാര് പിടിമുറുക്കാന് തുടങ്ങിയത്. രണ്ട് ഹൈസ്കൂളും മറ്റ് വിദ്യാഭ്യാസ സ്ഥാപനങ്ങളുമുള്ള വെട്ടത്തുരില് ഹാഷിഷും ബ്രൗണ് ഷുഗറും അടക്കമുള്ള മയക്കുമരുന്നുകള് സുലഭമാണെന്നാണ് റിപ്പോര്ട്ടുകള്.
ഇത്തരം മരുന്നുകള് ഉപയോഗിക്കുന്ന കുട്ടികള് അകാരണമായി ദേഷ്യെപ്പടുകയോ, സംസാരമോ പ്രസരിപ്പോയില്ലാതെ മൂകമായി ഇരിക്കുകയോ ചെയ്യുന്നതായും, വാഹനങ്ങള് ഓടിക്കുമ്പോള് അമിത വേഗതയും ഉണ്ടാവുന്നതായും നാട്ടുകാര് പറയുന്നു. പുതുതലമുറയെ മയക്കു മരുന്നുകളുടെ പിടിയില് നിന്നും രക്ഷിക്കാന് അധികൃതര് മുന്നോട്ട് വരണമെന്നാണ് നാട്ടുകാരുടെ ആവശ്യം.
