കാഞ്ഞങ്ങാട്: കേന്ദ്ര റെയില്‍വേ മന്ത്രാലയത്തിന്റെ പ്രത്യേക നിര്‍ദ്ദേശ പ്രകാരം സതേണ്‍ റെയില്‍വേ ചീഫ് മെറ്റീരിയല്‍ മാനേജര്‍ (സി. എം. എം) വി.സുധാകരറാവും സംഘവും കാഞ്ഞങ്ങാട് റെയില്‍വേ സ്റ്റേഷനും പരിസരവും സന്ദര്‍ശിച്ച് വിശദമായ പഠനം നടത്തി. ഉയര്‍ന്ന റെയില്‍വേ ഉദ്യോഗസ്ഥര്‍ക്കൊപ്പം വെള്ളിയാഴ്ച രാവിലെ കാഞ്ഞങ്ങാട്ടെത്തിയ സംഘം പരിശോധനയുടെ വിശദമായ റിപ്പോര്‍ട്ട് ഉടന്‍ തന്നെ കേന്ദ്ര റെയില്‍വേ മന്ത്രാലയത്തിനും സതേണ്‍ റെയില്‍വേ ജനറല്‍ മാനേജര്‍ക്കും സമര്‍പ്പിക്കും. സ്റ്റേഷന്റെ തെക്കു ഭാഗത്ത് മാലിന്യങ്ങള്‍ നിക്ഷേപിച്ച് കാട് മൂടി വൃത്തികേടായി കിടക്കുന്ന സ്ഥലങ്ങള്‍ മണ്ണിട്ട് നികത്തി ഉപയോഗയോഗ്യമാക്കാന്‍ നടപടിയെടുക്കുമെന്ന് സി. എം. എം.പറഞ്ഞു. ഉയര്‍ന്ന ഉദ്യോഗസ്ഥര്‍ക്കൊപ്പം നാലു മണിക്കൂറുകളോളം സ്റ്റേഷനും പരിസരവും സംഘം വിശദമായി പരിശോധന നടത്തി.
കാഞ്ഞങ്ങാട് റെയില്‍വേ സ്റ്റേഷനില്‍ സസ്യ സസ്യേതര ഭോജനശാലകള്‍ ആരംഭിക്കാന്‍ ആവശ്യമായ കെട്ടിടങ്ങള്‍ പണിയാന്‍ ഇപ്പോള്‍ കാടുമൂടിക്കിടക്കുന്ന സ്ഥലങ്ങള്‍ ഉപയോഗിക്കണമെന്നാണ് നിര്‍ദ്ദേശം. സ്റ്റേഷന്റെ വടക്കുഭാഗത്ത് റെയില്‍വേ ഗേറ്റുവരെയുള്ള സ്ഥലം പൂര്‍ണ്ണമായും മണ്ണിട്ട് നികത്തി പാര്‍ക്കിംഗ് സൗകര്യം വിപുലീകരിക്കണമെന്നാണ് മറ്റൊരു നിര്‍ദ്ദേശം. ഇതിന് സന്നദ്ധ സംഘടനകളുടെ സഹായം തേടും. റെയില്‍വേ സ്റ്റേഷന്‍ പരിസരം വൃത്തിയായി സൂക്ഷിക്കാനും സൗന്ദര്യവല്‍ക്കരിക്കാനുള്ള നടപടികള്‍ ഉണ്ടാകും.
വിനോദ സഞ്ചാരകേന്ദ്രമായ ബേക്കല്‍, റാണിപുരം, തീര്‍ത്ഥാടന കേന്ദ്രങ്ങളായ ആനന്ദാശ്രമം, തലക്കാവേരി, കേന്ദ്രസര്‍വ്വകലാശാല എന്നിവിടങ്ങളിലേക്കുള്ള പ്രധാന റെയില്‍വേ സ്റ്റേഷനായ കാഞ്ഞങ്ങാടിന് എല്ലാവിധ സൗകര്യങ്ങളോടും കൂടി വിപുലീകരിക്കും. റെയില്‍വേ പ്ലാറ്റുഫോം സാമൂഹ്യവിരുദ്ധരുടെയും മയക്കുമരുന്ന് മാഫിയകളുടെയും താവളമാക്കി മാറ്റുന്നത് തടയാന്‍ സ്റ്റേഷനില്‍ റെയില്‍വേ സംരക്ഷണസേന(ആര്‍.പി.എഫ്) യുടെ ഔട്ട് പോസ്റ്റ് സ്ഥാപിക്കും. ഇരു പ്ലാറ്റുഫോമുകളിലും കൂടുതല്‍ മേല്‍ക്കൂരകളും സോളാര്‍ വിളക്കുകളും ശുദ്ധജല വിതരണ സംവിധാനങ്ങളും സ്ഥാപിക്കാനും നടപടിയുണ്ടാകും. സ്റ്റേഷന്‍ സൂപ്രണ്ട് ജയരാജ്‌മേനോന്‍, കൊമേഴ്‌സ്യല്‍ മാനേജര്‍ അഷറഫ്, നഗരവികസന സമിതി ജനറല്‍ കണ്‍വീനര്‍ സി.യൂസഫ്ഹാജി, പാസഞ്ചേഴ്‌സ് അസോസിയേഷന്‍ പ്രസിഡന്റ് ടി.മുഹമ്മദ് അസ്ലം, റവ.ഫാദര്‍ മാത്യു ആലങ്കോട്, സി.എ.പീറ്റര്‍, റെയില്‍വേ ഹെല്‍ത്ത് ഇന്‍സ്‌പെക്ടര്‍ നവീന്‍കുമാര്‍ തുടങ്ങിയവര്‍ സുധാകരറാവുമായുള്ള ചര്‍ച്ചയില്‍ പങ്കെടുത്തു. യാത്രക്കാരില്‍ നിന്നും റെയില്‍വേസ്റ്റേഷനിലെ വ്യാപാരികളില്‍ നിന്നും ജീവനക്കാരില്‍ നിന്നും അധികാരികള്‍ പരാതി സ്വീകരിച്ചു.
പ്രതികരിക്കാൻ ഇവിടെ എഴുതുക: