ആലപ്പുഴ: ക്ലാസ് മുറികള് ഹൈടെക് ആക്കുന്നതിന്റെ ഭാഗമായി വിദ്യാര്ത്ഥികളില് നിന്ന് പണം പിരിക്കാന് പറഞ്ഞത് മന്ത്രിമാരെന്ന് സ്കൂള് അധികൃതര്. വിദ്യാര്ത്ഥികളില് നിന്ന് 500 രൂപ മുതല് പിരിച്ചെടുക്കുന്നതായി ജന്മഭൂമി വാര്ത്തയെ തുടര്ന്ന് എബിവിപി പ്രവര്ത്തകര് ആലപ്പുഴ സെന്റ് ജോസഫ് ഗേള്സ് ഹയര് സെക്കണ്ടറി സ്കൂളിലെത്തി അന്വേഷിച്ചപ്പോഴാണ് വിദ്യാഭ്യാസ മന്ത്രിയും ധനകാര്യ മന്ത്രിയും പറഞ്ഞിട്ടാണ് പണം പിരിക്കുന്നതെന്ന് അറിയിച്ചത്.
മാനേജ്മെന്റിന്റെ ചെലവില് ക്ലാസ് മുറികള് നവീകരിക്കുന്നതിന് പകരം വിദ്യാര്ത്ഥികളെയും രക്ഷിതാക്കളെയും പിഴിയുന്ന നടപടിക്ക് സംസ്ഥാനത്തെ മന്ത്രിമാര് കൂട്ടുനില്ക്കുന്നതില് ദുരൂഹതയുണ്ട്. പ്ലസ്വണ് അഡ്മിഷന് സമയത്ത് കെട്ടിട നിര്മ്മാണത്തിന്റെയും നവീകരണത്തിന്റെയും പേരില് വ്യാപക പിരിവ് നടത്തിയിട്ട് രണ്ടുമാസം തികഞ്ഞില്ല. ഇത് കൂടാതെയാണ് ഇപ്പോഴുള്ള അധിക പണപ്പിരിവ്.
എട്ടാംക്ലാസുമുതല് പന്ത്രണ്ടാം ക്ലാസുവരെയുള്ള ക്ലാസുമുറികള് ഹൈടെക് ആക്കുന്നതിനാണ് വിദ്യാഭ്യാസ വകുപ്പ് പദ്ധതിയിട്ടിരിക്കുന്നത്. ക്ലാസ് മുറികള് ഇതിന് അനുയോജ്യമാക്കിയാല് കമ്പ്യൂട്ടറും മറ്റ് ആധുനിക ഇതര സാങ്കേതിക സംവിധാനങ്ങളും വിദ്യാഭ്യാസ് വകുപ്പ് നല്കും. സ്കൂള് അധികൃതരാണ് ക്ലാസ് മുറികള് ഇതിനായി സജ്ജീകരിക്കേണ്ടത്. എന്നാല് പല എയിഡഡ് സ്കൂള് അധികൃതരും ഇതിന്റെ മറവില് രക്ഷിതാക്കളെ പിഴിയുകയാണ്.
യുപി സ്കൂള് വിദ്യാര്ത്ഥികളില് നിന്നുവരെ ഹൈടെക് ക്ലാസ് മുറികളുടെ പേരില് വന് തുക പിരിച്ചെടുക്കുന്നു. പല സ്കൂളുകളിലും രക്ഷിതാക്കള് പരാതിയുമായി രംഗത്തെത്തിയെങ്കിലും ഇത്തരത്തില് പണം പിരിക്കാന് അനുവാദമുണ്ടെന്നാണ് സ്കൂളുകാര് പറയുന്നത്. എന്നാല് പണം പിരിക്കാന് യാതൊരു നിര്ദ്ദേശവും നല്കിയിട്ടില്ലെന്ന് വിദ്യാഭ്യാസ വകുപ്പ് ഉദ്യോഗസ്ഥര് വെളിപ്പെടുത്തുന്നു. ഈ സാഹചര്യത്തിലാണ് സെന്റ് ജോസഫ് സ്കൂള് അധികൃതര് പണം പിരിക്കാന് മന്ത്രിമാര് അനുവാദം നല്കിയിട്ടുണ്ടെന്ന് എബിവിപി പ്രവര്ത്തകരോട് വെളിപ്പെടുത്തിയത്.
ക്ലാസ് മുറികള് ഹൈടെക് ആക്കുന്നതിന്റെ പേരില് വിദ്യാര്ത്ഥികളില് നിന്ന് അധിക പണപ്പിരിവ് നടത്തുന്നതിനെതിരെ എബിവിപി പ്രതിഷേധിച്ചു. മന്ത്രിമാരുടെ അറിവോടെ വിദ്യാര്ത്ഥികളില് നിന്നുള്ള പണപ്പിരിവിനെതിരെ ഓണാവധിക്കുശേഷം ശക്തമായി സമരം പരിപാടികള് സംഘടിപ്പിക്കുമെന്ന് എബിവിപി സംസ്ഥാന ജോ. സെക്രട്ടറി സി. അനുജിത്ത് അറിയിച്ചു. എല്ലാംശരിയാക്കാന് കയറിയ ഇടതുസര്ക്കാര് രക്ഷിതാക്കളെയും വിദ്യാര്ത്ഥികളെയും പിച്ചച്ചട്ടിയുമായി തെരുവിലിറക്കുന്ന മാനേജ്മെന്റുകള്ക്ക് ഒത്താശ ചെയ്യുകയാണെന്നും എബിവിപി ആരോപിച്ചു.
