ഇവന് മഡഗാസ്കറോഫിസ് ലോലോ. മലഡഗാസ്കറില് അടുത്തയിടെ കണ്ടെത്തിയ പുതിയ ഇനം ‘പ്രേതപ്പാമ്പ്’. മങ്ങിയ ചാരനിറം. വഴുവഴുപ്പുള്ള പ്രകൃതം. പൂച്ചക്കണ്ണുകള്. മഡഗാസ്കറിലെ അങ്കാരന നാഷണല് പാര്ക്കില് നിന്നാണ് ലോലോയെ കിട്ടിയത്.
മൂന്നു പ്രമുഖ സര്വ്വകലാശാലയില് നിന്നുള്ള വിദഗ്ധരാണ് ലോലോയുടെ ജനിതക പഠനം നടത്തി ഉരഗവര്ഗത്തില് പുതിയ ഇനമാണെന്ന് കണ്ടെത്തിയത്. ലൂസിയാന സ്റ്റേറ്റ് യൂണിവേഴ്സിറ്റി മ്യൂസിയം ഒാഫ് നാച്വറല് സയന്സ്, അമേരിക്കന് മ്യൂസിയം ഒാഫ് നാച്വറല് ഹിസ്റ്ററി, മഡഗാസ്കറിലെ മഹാജന്ഗ യൂണിവേഴ്സിറ്റി എന്നിവിടങ്ങളിലായിരുന്നു ലോലോയെക്കുറിച്ചുള്ള പഠനവും പേരിടലും.
മഡഗാസ്കറോഫിസ് ലോലോ എന്നാല് ‘മലഗാസിയിലെ പ്രേത’മെന്ന് അര്ത്ഥം. മഡഗാസ്കറില് സാധാരണയായി കണ്ടുവരുന്ന പൂച്ചക്കണ്ണുകളുള്ള പാമ്പുകളാണ് മഡഗാസ്കറോഫിസ്.
നേരം ഇരുട്ടുമ്പോള് ഇര തേടിയിറങ്ങുന്ന ഉരഗവര്ഗം. ചുണ്ണാമ്പു പാറകളില് നിന്നാണ് ഇക്കൂട്ടത്തിലെ പുതുമുഖമായ ലോലോയെ ഗവേഷകര് തപ്പിയെടുത്തത്. ഇവന്റെ ഏറ്റവും അടുത്ത ബന്ധുവിന് പേര് മഡഗാസ്കറോ ഫുച്സി.
ശ്രദ്ധിക്കപ്പെടാതെ കിടക്കുന്ന കാടുകളാണ് ഇവയുടെയെല്ലാം അധിവാസ കേന്ദ്രം. മഴക്കാലത്തായിരുന്നു ഗവേഷകര് പാമ്പിനെത്തേടിയിറങ്ങിയത്. പാമ്പിന്റെ ഇരകളായ തവളയും പല്ലിയുമെല്ലാം സജീവമാകുന്ന മഴക്കാലം.
