തുറവൂര്: കുടുംബശ്രീക്കും, സ്വയംസഹായ സംഘങ്ങള്ക്കും സഹകരണ പ്രസ്ഥാനങ്ങള് നല്കുന്ന വായ്പകള്ക്ക് അമിത പലിശ ഈടാക്കുന്നതായി ആക്ഷേപം. സാധാരണക്കാരായ വനിതകളുടെ കൂട്ടായ്മകള്ക്ക് നല്കുന്ന വായ്പകള്ക്കാണ് അമിത പലിശ ഈടാക്കുന്നതായി ആരോപണമുയരുന്നത്.
നാമമാത്ര പലിശയ്ക്ക് സ്വയംതൊഴില് കണ്ടെത്തുന്നതിന് സ്ത്രീ കൂട്ടായ്മകള്ക്ക് സഹകരണ സ്ഥാപനങ്ങള് വായ്പ നല്കണമെന്ന നിര്ദ്ദേശം നിലനില്ക്കേയാണ് പതിനാലര ശതമാനം വരെ പലിശ ഈടാക്കുന്നതായി ഗുണഭോക്താക്കള് പറയുന്നത്.
ഓരോ ഗ്രൂപ്പുകള്ക്കും ലക്ഷക്കണക്കിന് രൂപയാണ് വായ്പയായി നല്കുന്നത്. അംഗങ്ങളില് പലര്ക്കും ഇത് വന് സാമ്പത്തിക ബാധ്യതയാണ് ഉണ്ടാക്കുന്നത്. ബാങ്കുകള് പലിശനിരക്ക് വര്ദ്ധിപ്പിച്ചതിനാല് അടയ്ക്കുന്ന തുക മുതലിലെത്താത്ത അവസ്ഥയിലാണ് ഇത് കുടുംബശ്രീ അയല്ക്കൂട്ടങ്ങളിലേയും സ്വയം സഹായ സംഘങ്ങളിലേയും ഭൂരിഭാഗം അംഗങ്ങളേയും വന് ബാധ്യതയിലേക്കാണ് തള്ളി വിടുന്നതെന്നാണ് ആക്ഷേപം.
