ശാസ്താംകോട്ട: ഭരണഘടനയുടെ ആമുഖത്തില് പറയുന്ന തുല്യനീതിയും സമത്വവും നിഷേധിക്കപ്പെട്ട സമുദായമാണ് നായര്സമുദായമെന്നും ഇപ്പോഴത്തെ സംവരണനയം മൂലം ഒന്നാംറാങ്ക് വാങ്ങിയാലും നായരാണെങ്കില് ജോലി ലഭിക്കാത്ത അവസ്ഥയാണുള്ളതെന്നും എന്എസ്എസ് പ്രസിഡന്റ് പി.എന്.നരേന്ദ്രനാഥന്നായര് പറഞ്ഞു.
അധ്യാപകയോഗ്യതാപരീക്ഷക്ക് പോലും സംവരണം നടപ്പാക്കിയ സര്ക്കാരുകള് മുന്നോക്ക സമുദായമായി പോയതിനാല് നായര്സമുദായത്തിന് എല്ലാതരത്തിലും നീതി നിഷേധിക്കുകയാണ്. ചുറ്റുപാടുമുള്ള മാറ്റങ്ങള് കാണാന് രാഷ്ട്രീയ നേതൃത്വങ്ങള് ശ്രമിക്കണം. തെക്കന്മൈനാഗപ്പള്ളി 449-ാം നമ്പര് കരയോഗം കുടുംബസംഗമം ഉദ്ഘാടനം ചെയ്യുകയായിരുന്നു അദ്ദേഹം.
ദേവസ്വം റിക്രൂട്ട്മെന്റ് ബോര്ഡ് ഇപ്പോള് അവതാളത്തിലായിരിക്കുകയാണ്. ഇക്കാര്യത്തില് സര്ക്കാര് തീരുമാനം അറിഞ്ഞതിന് ശേഷം മാത്രമേ എന്എസ്എസ് അഭിപ്രായം പറയു. എല്ലാം ശരിയാക്കുമെന്ന് പറയുന്ന സര്ക്കാര് എന്എസ്എസ് മുന്നോട്ടുവച്ചിട്ടുള്ള കാര്യങ്ങളും ശരിയാക്കുമെന്നാണ് വിശ്വാസം. ഹൈന്ദവനവോത്ഥാനത്തിനുള്ള പ്രാരംഭമായി അദ്ധ്യാത്മികപഠനത്തെ കാണണമെന്നും ജാതിയില്ലാത്ത സമൂഹം സങ്കല്പ്പം മാത്രമാണെന്നും നരേന്ദ്രനാഥന്നായര് പറഞ്ഞു.
എന്എസ്എസ് കരുനാഗപ്പള്ളി താലൂക്ക് യൂണിയന് പ്രസിഡന്റ് അഡ്വ.എന്.വി.അയ്യപ്പന്പിള്ള അദ്ധ്യക്ഷത വഹിച്ചു. താലൂക്ക് വനിതായൂണിയന് പ്രസിഡന്റ് പ്രൊഫ.വി.ലളിതമ്മ, കരയോഗം പ്രസിഡന്റ് വെട്ടോലില് പരമേശ്വരന്പിളള, സെക്രട്ടറി ഡി.മോഹനന്പിള്ള, രവിമൈനാഗപ്പളളി, കുരുമ്പോലില് ശ്രീകുമാര്, ഡോ.എന്.കെ.പ്രേമചന്ദ്രന്നായര്. വനജകുമാരി, സി. രാധാകൃഷ്ണന്, രാജേന്ദ്രന്പിള്ള, പ്രൊഫ.സി.ആര്.മോഹനന്പിള്ള, പി. ആര്.ആര് നായര്, ടി.രാജേശ്വരന്പിള്ള തുടങ്ങിയവര് സംസാരിച്ചു.
