പത്തനാപുരം: വിളക്കുടി ഗ്രാമപഞ്ചായത്ത് വീണ്ടും വിവാദത്തില്. കുന്നിക്കോട്ടെ വിവാദബാറിന് പ്രവര്ത്തനാനുമതി നല്കുന്നതിനായി പഞ്ചായത്ത് അധികൃതരുടെ ഒത്താശയോടെ ഗവ.സ്കൂളിന്റെ ശതാബ്ദി സ്മാരകം പൊളിച്ചുമാറ്റി പ്രവേശനകവാടം കെട്ടിയടച്ചു. നൂറ്റിപ്പത്ത് വര്ഷമായി പ്രവര്ത്തിക്കുന്ന കുന്നിക്കോട് ഗവ.എല്പി സ്കൂളിന്റെ പ്രവേശനകവാടമാണ് കെട്ടിയടച്ചത്.
സമീപത്തെ ബിയര്പാര്ലറിന് ബാര് ലൈസന്സ് നല്കുന്നതിന് വേണ്ടി പഞ്ചായത്തിന്റെ ഒത്താശയോടെയാണ് പ്രധാന കവാടം കെട്ടിയടച്ചതെന്നാണ് ആരോപണം. സംഭവത്തില് പ്രതിഷേധിച്ച് ബിജെപി അടക്കമുളള രാഷ്ട്രീയപാര്ട്ടികള് സ്കൂളിനു മുന്നില് പ്രതിഷേധവുമായി രഗത്തുവന്നു. കഴിഞ്ഞ ദിവസമാണ് സ്കൂളിന്റെ പ്രവേശനകവാടം കെട്ടിയടച്ചത്. സംഭവം വിവാദമായതോടെ കെട്ടിയടച്ച കവാടം രാത്രിയോടെ പൊളിച്ചു മാറ്റി. കഴിഞ്ഞ എല്ഡിഎഫ് ഭരണസമിതിയുടെ നേതൃത്വത്തില് ബിയര്പാര്ലറിന് അനുമതി നല്കിയതും വിവാദമായിരുന്നു. ബാറിന് അനുമതി നല്കിയതിനെ തുടര്ന്ന് കഴിഞ്ഞ ഭരണസമിതിയിലെ പഞ്ചായത്ത് പ്രസിഡന്റായിരുന്ന മിനി ജോസ് പ്രകാശ് പ്രസിഡന്റ് സ്ഥാനം രാജിവച്ചിരുന്നു. കരുനാഗപ്പള്ളി ഇടക്കുളങ്ങര ആസ്ഥാനമാക്കി പ്രവര്ത്തിക്കുന്ന ചാച്ചാജി ചാരിറ്റബിള് സൊസൈറ്റിയാണ് സ്കൂളിലേക്ക് പാര്ക്കും പൂന്തോട്ടവും നിര്മ്മിച്ച് നല്കാമെന്ന് പഞ്ചായത്തിനെ അറിയിച്ചത്. ഇതനുസരിച്ച് പഞ്ചായത്ത് സ്കൂള് പിടിഎയെയും പ്രഥമഅദ്ധ്യാപികയെയും അറിയിക്കുകയും ചെയ്തു. വിദ്യാലയ അധികൃതര് വിദ്യാഭ്യാസവകുപ്പിന്റെ അനുമതിക്കായി പുനലൂര് എഇഒ സമീപിക്കുകയും ചെയ്തു. ഓണാവധിക്ക് നിര്മ്മാണപ്രവര്ത്തനങ്ങള് ആരംഭിക്കാനുള്ള അനുവാദം തരാമെന്ന് അറിയിക്കുകയും ചെയ്തിരുന്നു.
എന്നാല് കരാറുകാരന് ഞായറാഴ്ച നിര്മ്മാണപ്രവര്ത്തനങ്ങള് ആരംഭിച്ചു. പ്രവേശനകവാടം അടച്ച് ശതാബ്ദി സ്മാരകം പൊളിച്ചുമാറ്റിയാണ് ഭിത്തി കെട്ടിയത്. സംഭവം വിവാദമാകുമെന്നറിഞ്ഞതോടെ പഞ്ചായത്ത് ഭരണസമിതി തങ്ങള് അറിയാതെയാണ് നിര്മ്മാണം നടന്നത് എന്ന വാദവുമായി രംഗത്തുവന്നു. കവാടം പൊളിച്ചുമാറ്റിയവര്ക്കെതിരെ നിയമനടപടി സ്വീകരിക്കാനും ശതാബ്ദി സ്മാരകം പുനര്നിര്മ്മിക്കാനും തഹസീല്ദാരുടെ നേതൃത്വത്തില് കൂടിയ സര്വ്വകക്ഷിയോഗത്തില് തീരുമാനമായി.
സര്വ്വകക്ഷിയോഗത്തില് നിന്ന് വികസനകാര്യ സ്റ്റാന്റിങ് കമ്മറ്റി ചെയര്മാന് സജീദ് പങ്കെടുക്കാതിരുന്നതും ആക്ഷേപങ്ങള്ക്ക് കാരണമായി. സംഭവവുമായി ബന്ധപ്പെട്ട് വിദ്യാഭ്യാസ വകുപ്പിന് പരാതി നല്കുമെന്ന് പുനലൂര് എഇഒ ആര്.ഉണ്ണിക്കൃഷ്ണന് പറഞ്ഞു. സ്കൂളിന് മുന്നില് നടന്ന പ്രതിഷേധത്തിന് ബിജെപി നേതാക്കളായ വിളക്കുടി ചന്ദ്രന്, ഗിരീഷ് ഇളമ്പല്, സേതു നെല്ലിക്കോട്, ഹരികുമാര്, അജി വിളക്കുടി, സുധീഷ് കുമാര്, സന്തോഷ്, രാജീവ്കുമാര്, അജീഷ് എന്നിവര് സംബന്ധിച്ചു.
