കൊയിലാണ്ടി: കൊയിലാണ്ടി മിനി സ്റ്റേഡിയത്തില് താല്ക്കാലിക ഫയര്ഫോഴ്സ് സ്റ്റേഷന് നിര്മ്മിക്കാനുള്ള തീരുമാനം വിവാദത്തിലേക്ക്. സ്പോര്ട്സ് കൗണ്സിലിന്റെ അനുവാദമില്ലാതെയാണ് കൗണ്സിലിന്റെ ഉടമസ്ഥതയിലുള്ള കെട്ടിടത്തില് താല്ക്കാലിക ഫയര്സ്റ്റേഷന് നിര്മ്മിക്കാനുള്ള പ്രവൃത്തി ആരംഭിച്ചിരിക്കുന്നത്.
സ്പോട്സ് കൗണ്സിലിന്റെ അനുവാദമില്ലാതെ ഫയര്സ്റ്റേഷന് നിര്മ്മിക്കുന്നതിനെ സ്പോര്ട്സ് കൗണ്സില് എതിര്ക്കുകയും വീണ്ടും നഗരസഭ പണി തുടര്ന്നപ്പോള് നിര്മ്മാണ പ്രവൃത്തി തടയാന് സ്പോര്ട്സ് കൗണ്സില് കൊയിലാണ്ടി തഹസില്ദാര്ക്ക് പരാതി നല്കുകയുമായിരുന്നു. ജില്ലാ സ്പോര്ട്സ് കൗണ്സിലിന്റെ അധീനതയിലുള്ള കൊയിലാണ്ടി മിനി സ്റ്റേഡിയത്തിന്റെ കിഴക്ക് ഭാഗത്തുള്ള മൂന്ന് കടമുറികളാണ് താല്ക്കാലിക ഫയര്സ്റ്റേഷന് കെട്ടിടത്തിന്റെ പണിക്കായി തെരഞ്ഞെടുത്തത്. ക്രിക്കറ്റ് അസോസിയേഷന് ജില്ലാ സ്പോര്ട്സ് കൗണ്സിലിന്റെ അനുവാദത്തോടെ വിദ്യാര്ത്ഥികള്ക്ക് ക്രിക്കറ്റ് പരിശീലനം നല്കാന് നിര്മ്മിച്ച പിച്ചു തകര്ത്താണ് ഫയര്സ്റ്റേഷന് നിര്മ്മാണം നടത്തുന്നത്.
ഫയര്സ്റ്റേഷന് നിര്മ്മിക്കാന് കൊയിലാണ്ടി മുന്സിപ്പല് പരിധിയില് മറ്റു നിരവധി സ്ഥലങ്ങള് കണ്ടെത്താമെന്നിരിക്കെ സ്പോട്സ് കൗണ്സിലിന്റെ അനുവാദം പോലുമില്ലാതെ അവരുടെ സ്ഥലത്ത് ഫയര്സ്റ്റേഷന് സ്ഥാപിക്കുന്നതില് ദുരൂഹതയുണ്ടെന്നാണ് ആരോപണം. മാത്രമല്ല ലക്ഷക്കണക്കിന് രൂപയുടെ ഉപകരണങ്ങള് സൂക്ഷിക്കാന് രണ്ട് കടമുറികള് പോര എന്ന് അറിഞ്ഞ് കൊണ്ട് മുന്സിപ്പാലിറ്റി അധികൃതര് നടത്തുന്ന ഈ ശ്രമം കായികപ്രേമികളുടെ എതിര്പ്പിന് കാരണമായിട്ടുണ്ട്.
താല്ക്കാലിക കെട്ടിടം നിര്മ്മാണം പ്രവൃത്തി ആഗസ്റ്റ് 20 നാണ് കെ.ദാസന് എംഎല്എ ഉദ്ഘാടനം ചെയ്തത്. ഒക്ടോബര് രണ്ടിനകം പണി പൂര്ത്തിയാക്കുമെന്ന് നഗരസഭാ ചെയര്മാന് അഡ്വ: കെ.സത്യന് പറയുകയും ചെയ്തിരുന്നു.
