ബാലുശ്ശേരി: ബാലുശ്ശേരി താലൂക്ക് ആശുപത്രിയില് കൂടുതല് ഡോക്ടര്മാരെ നിയമിക്കാന് സംസ്ഥാന സര്ക്കാര് തയ്യാറാകണമെന്നും ആശുപത്രിയില് ഉടന് അത്യാഹിത വിഭാഗം ആരംഭിക്കാന് വേണ്ട നടപടി സ്വീകരിക്കണമെന്നും യുവമോര്ച്ച ബാലുശ്ശേരി മണ്ഡലം കമ്മറ്റി ആവശ്യപ്പെട്ടു.
നിത്യേന ആയിരത്തോളം പേര് ഒ.പിയില് എത്തുന്ന ഇവിടെ മൂന്ന് ഡോക്ടര്മാരാണ് രോഗികളെ പരിശോധിക്കാനുള്ളത്. ഇതിനാല് രോഗികള് മണിക്കൂറുകളോളം കാത്തിരുന്നു വിഷമിക്കുകയാണ്. ഉച്ചയ്ക്ക് രണ്ട് മണി കഴിഞ്ഞാല് പിന്നെ ഇവിടെ ചികിത്സയുമില്ല. അസുഖം കൂടുമ്പോഴും അപകടം സംഭവിക്കുമ്പോഴും 25-30 കിലോമീറ്റര് ദൂരമുള്ള കോഴിക്കോട്ടെ ആശുപത്രിയില് രോഗികളെ എത്തിക്കുമ്പോഴേക്കും മരണം സംഭവിക്കുന്നത് പതിവാണ്.
ഇങ്ങനെ പ്രദേശത്തെ നിരവധി പേര് മരിച്ചിട്ടും സര്ക്കാര് കണ്ണ് തുറക്കാന് തയ്യാറാകാത്തത് പ്രതിഷേധാര്ഹമാണെന്നും യോഗം ചൂണ്ടിക്കാട്ടി. ആശുപത്രിയുടെ അടിസ്ഥാന പ്രശ്നങ്ങള് പരിഹരിച്ച് പാവപ്പെട്ട രോഗികളുടെ ആരോഗ്യം സംരക്ഷിക്കണമെന്നും യോഗം ആവശ്യപ്പെട്ടു.
യോഗം ബിജെപി മണ്ഡലം പ്രസിഡണ്ട് രാജേഷ് കായണ്ണ ഉദ്ഘാടനം ചെയ്തു. യുവമോര്ച്ച മണ്ഡലം പ്രസിഡണ്ട് എം.കെ. രാജേഷ്കുമാര് അധ്യക്ഷതവഹിച്ചു. ജില്ലാ വൈസ് പ്രസിഡണ്ട് ബബീഷ് ഉണ്ണികുളം, ബിജെപി മണ്ഡലം ജനറല് സെക്രട്ടറി ആര്.എം. കുമാരന്, എന്നിവര് സംസാരിച്ചു. പ്രമോദ് ശിവപുരം സ്വാഗതം പറഞ്ഞു.
മണ്ഡലം ഭാരവാഹികളായി എം.കെ രാജേഷ്കുമാര് (പ്രസിഡണ്ട്) നിധിന്രാജ് കായണ്ണ,ജിതുലാല് ഒതയോത്ത് (വൈസ്പ്രസിഡണ്ടുമാര്), പ്രമോദ് ശിവപുരം, (ജനറല് സെക്രട്ടറി), പ്രബിത്ത്, മിഥുന് മോഹന്, രഞ്ജിത്ത് കെ.ബിഎന്,രഞ്ജു കാവില് (സെക്രട്ടറിമാര്), ധനൂപ് പി (ട്രഷറര്) എന്നിവരെ തെരഞ്ഞെടുത്തു.
