പ്രേഗ്: ചെക്ക് റിപ്പബ്ലിക്കില് സന്ദര്ശനത്തിനെത്തിയ ജര്മ്മന് ചാന്സലര് ആംഗല
മെര്ക്കലിനു നേരെ വധശ്രമം. തലസ്ഥാന നഗരമായ പ്രേഗില് മെര്ക്കലിന്റെ വാഹനവ്യൂഹം കടന്നുപോകവെ കറുത്ത മെഴ്സിഡസ് കാറില് എത്തിയ ആയുധധാരി വാഹനവ്യൂഹത്തിന്റെ ഇടയില്കയറാന് ശ്രമിച്ചു.
എന്നാല്, ചെക് പോലീസിന്റെ അവസരോചിത ഇടപെടലിലൂടെ ഇയാളെ അറസ്റ്റ് ചെയ്യുകയായിരുന്നെന്ന് ചെക്ക് പോലീസ് വക്താവ് ജോസ്ഫ് ബെക്കണ് വ്യക്തമാക്കി.
ഗുരുതര സുരക്ഷാ വീഴ്ചയാണ് ഉണ്ടായിരിക്കുന്നത്. സംഭവത്തെ കുറിച്ചുള്ള അന്വേഷണം പരാഗിലെ അന്വേഷണം ഏജന്സികള് ഏറ്റെടുത്തതായി ജോസഫ് ബെക്കണ് കൂട്ടിചേര്ത്തു.ചെക്ക് പ്രധാനമന്ത്രി ബോഹുസ്ലാവ് സോബത്കയുമായുള്ള കൂടികാഴ്ചയ്ക്ക് എത്തിയതായിരുന്നു ആംഗല മെര്ക്കല്.
വിമാനത്താവളത്തില് നിന്നും ചെക്ക് തലസ്ഥാനത്തേക്ക് കാറില് സഞ്ചരിക്കവെയാണ് ദുരൂഹ സാചര്യത്തില് കറുത്ത മെഴ്സിഡസില് ആയുധധാരി കടന്നെത്തിയത്. അകമ്പടി വാഹനങ്ങളിലുള്ള പോലീസിന്റെ മുന്നറിയിപ്പ് ലഭിച്ചിട്ടും മെഴ്സിഡസിന്റെ ഡ്രൈവര് അകലം പാലിച്ചില്ല. തുടര്ന്ന് തടയാന് ശ്രമിച്ച പോലീസ് വാഹനത്തെ മറികടന്ന് വാഹന വ്യൂഹത്തിലേക്ക് കയറാന് ശ്രമിച്ച പ്രതി, വെടി വെയ്ക്കുമെന്ന പോലീസിന്റെ അവസാന മുന്നറിയിപ്പിന്മേലാണ് മെഴ്സിഡസില് നിന്നും പുറത്തിറങ്ങിയത്.
കഴിഞ്ഞ 12 മാസത്തിനിടെ യൂറോപ്പില് തുടരെ നടക്കുന്ന ഭീകരാക്രമണ പശ്ചാത്തലത്തില് യൂറോപ്യന് മേഖലകളില് അതീവ സുരക്ഷയാണ് ഏര്പ്പെടുത്തിയിരിക്കുന്നത്. ഫ്രാന്സ്, ജര്മനി, ബെല്ജിയം എന്നിവിടങ്ങളിലായി ഐഎസ് (ഇസ്ലാമിക് സ്റ്റേറ്റ്) ഭീകരര് നടത്തിയ വിവിധ ആക്രമണങ്ങളില് നൂറുകണക്കിന് ആളുകളാണ് കൊല്ലപ്പെട്ടത്.
