സംഗീതോപകരണങ്ങൾ നിർമ്മിക്കാനുപയോഗിക്കുന്ന സാമഗ്രികളേയും അതിന്റെ സ്വഭാവത്തോടും അനുസരിച്ച് സംഗീതോപകരണങ്ങളെ നാലുവിഭാഗമാക്കിത്തിരിക്കാറുണ്ട്. തന്ത്രി വാദ്യങ്ങൾ, സുഷിര വാദ്യങ്ങൾ, അനവദ്ധ വാദ്യങ്ങൾ , ഘനവാദ്യങ്ങൾ എന്നിങ്ങനെയുണ്ട്.
നാട്യശാസ്ത്രവിധിപ്രകാരം തന്ത്രിവാദ്യങ്ങൾ ദേവന്മാർക്കും സുഷിരവാദ്യങ്ങൾ ഗന്ധർവന്മാർക്കും അനവദ്ധം (ചർമ്മവാദ്യങ്ങൾ)രാക്ഷസന്മാർക്കും ഘനവാദ്യങ്ങൾ മനുഷ്യർക്കുമാണെന്നാണ് വിധിച്ചിട്ടുള്ളത്.
വാദ്യോപകരണങ്ങളുടെ ഉപയോഗമനുസരിച്ച് ഗാനവാദ്യങ്ങൾ, താളവാദ്യങ്ങൾ, ശ്രുതിവാദ്യങ്ങൾ എന്നിങ്ങനെതിരിച്ചിട്ടുണ്ട്.ഗാനങ്ങൾ വായിക്കുന്നതിനും രാഗാലാപനത്തിനും ഉപയോഗിക്കുന്ന വയാണ് ഗാനവാദ്യങ്ങൾ. തന്ത്രി വാദ്യങ്ങളും സുഷിര വാദ്യങ്ങളും പൊതുവെ ഈ വിഭാഗത്തിൽ പെടുന്നവയാണ്.
ഘനവാദ്യങ്ങളും ചർമ്മവാദ്യങ്ങളും പൊതുവെ താള വാദ്യമായാണ് പരിഗണിക്കപ്പെടുന്നത്. ശ്രുതിപ്പെട്ടിപോലുള്ള ചിലവാദ്യോപകരണങ്ങളാണ് ശ്രുതിവാദ്യങ്ങൾ.
