എഴാമതായി ദേവകീ ഗർഭത്തിൽപ്പിറന്നത് സാക്ഷാൽ ശേഷനാണ്. യോഗമായ ആ ഗർഭത്തെ അലസിപ്പിച്ച് അത് രോഹിണിയുടെ ഗർഭപാത്രത്തിലേയ്ക്ക് മാറ്റി. അഞ്ചാംമാസം ഗർഭം അലസിയെന്ന വാർത്ത കംസന് സന്തോഷം നൽകി. എന്നാൽ ആ ശിശു രോഹിണിയിൽ വളരുകയായിരുന്നു. ആ കുഞ്ഞു സങ്കർഷണനായി. ദേവകി എട്ടാമതും ഗർഭിണിയായി. ദേവകാര്യാർത്ഥം അങ്ങനെ ഭഗവാൻ ഭൂജാതനായി.
ജനമേജയൻ പറഞ്ഞു: ‘മഹർഷേ കശ്യപാംശമായി വസുദേവർ, ശേഷാംശമായി സങ്കർഷണൻ, വിഷ്ണ്വംശമായി കൃഷ്ണൻ എന്നിവർ ജന്മമെടുത്തു എന്ന് മനസ്സിലായി. ഭൂമിദേവിയുടെ അഭ്യർത്ഥനയെ മാനിച്ച് ഭൂഭാരം കുറയ്ക്കുവാനായിട്ടാണല്ലോ ഇവരെല്ലാം അവതരിച്ചത്. ബാക്കിയുള്ള കഥാപാത്രങ്ങൾ ഏതൊക്കെ അംശാവതാരങ്ങൾ ആണെന്നുകൂടി പറഞ്ഞു തന്നാലും.’
വ്യാസൻ പറഞ്ഞു: ‘എല്ലാം ഞാൻ ചുരുക്കിയൊന്നു വിവരിക്കാം. കശ്യപാംശൻ വസുദേവർ, അദിതി ദേവകി, ബലഭദ്രൻ അനന്തൻ, ശ്രീനാരായണൻ സ്വയം വാസുദേവനായിപ്പിറന്നു. നരൻ അർജ്ജുനനായിപ്പിറന്നു. യുധിഷ്ഠിരൻ ധർമ്മത്തിന്റെ അംശം, ഭീമൻ വായുവിന്റെ, മാദ്രിയുടെ പുത്രന്മാരായ നകുലനും സഹദേവനും അശ്വിനീദേവകളുടെ അംശം.
കർണ്ണൻ ആദിത്യന്റെ അംശവും വിദുരൻ ധർമ്മാംശവുമാണ്. ദ്രോണർ ബൃഹസ്പതിയുടെയും ദ്രോണപുത്രൻ ശിവന്റെ അംശവുമാണ്. ശന്തനു സമുദ്രാംശം. അദ്ദേഹത്തിന്റെ ഭാര്യ ഗംഗാംശം. ദേവകൻ ഗന്ധർവപതി. ഭീഷ്മർ വസുവിന്റെ അംശം. മരുത്ഗണങ്ങളുടെ അംശം വിരാടരാജാവ്. ദൈത്യനായ അരിഷ്ടന്റെ മകനായ ഹംസന്റെ കുലമാണ് ധൃതരാഷ്ട്രന്റേത്. കൃപരും കൃതകർമ്മാവും മരുത് ഗണാംശം തന്നെ. ദുര്യോധനൻ കലിയുടെ അംശം. ശകുനി ദ്വാപരന്റെ അംശം. ധൃഷ്ടധ്യുമ്നൻ അഗ്നിയംശം. ശിഖണ്ഡി രാക്ഷസാംശം. പ്രദ്യുമ്നൻ സനൽകുമാരന്റെ അംശം. ദ്രുപദൻ വരുണാംശം. ദ്രൗപദി ലക്ഷ്മിയുടെ അംശമാണ്. വിശ്വദേവകളുടെ അംശമാണ് പാഞ്ചാലിയുടെ പുത്രരായ അഞ്ചുപേർ.
കുന്തി, ഗാന്ധാരി, മാദ്രി എന്നിവർ യഥാക്രമം സിദ്ധിയും ബുദ്ധിയും ക്ഷമയും അംശാവതാരമെടുത്തവരാണ്. ശ്രീകൃഷ്ണന്റെ പത്നിമാരായി വന്നത് ദേവനാരിമാരാണ്. അസുരന്മാർ ഭൂമിയിലെ രാജാക്കന്മാരായി ജനിച്ചു. ഹിരണ്യകശിപുവിന്റെ അംശമാണ് ശിശുപാലൻ. വിപ്രചിത്തിയാണ് ജരാസന്ധൻ. പ്രഹ്ലാദനാണ് ശല്യരായത്. കേശി ഹയഗ്രീവന്റെ, കംസൻ കാലനേമിയുടെ, അരിഷ്ടൻ എന്ന കാളയായി വന്നവൻ ബലിയുടെ പുത്രന്റെ ഇങ്ങനെയാണ് അംശങ്ങൾ.
ചാണൂരനും മുഷ്ടികനുമായത് വരാഹൻ, കിശോരൻ എന്നീ രണ്ടു രാക്ഷസരാണ്. കുവലയാപീഠം എന്ന ആനയായി വന്നത് ദിതിയുടെ പുത്രനായ അരിഷ്ടനാണ്. പൂതന ബലിയുടെ പുത്രിയായിരുന്നു. അവളുടെ അനുജൻ ബകൻ. കാമം, ക്രോധം, യമൻ, രുദ്രൻ എന്നിവയുടെയെല്ലാം അംശഭൂതനാണ് ദ്രോണന്റെ പുത്രനായി ജനിച്ച അശ്വത്ഥാമാവ്.
അങ്ങനെ കൃഷ്ണാവതാരത്തിനു മുൻപായിത്തന്നെ അതിനു തയ്യാറെടുത്ത് രാക്ഷസ വർഗ്ഗവും ദേവന്മാരും അതത് അംശങ്ങളായി ഭൂമിയിൽ അവതരിച്ചിരുന്നു. പുരാണപ്രസിദ്ധമായ അംശാവതാരങ്ങൾ ആരൊക്കെയെന്നു ഞാൻ വിവരിച്ചുവല്ലോ.
ബ്രഹ്മാദികൾ മഹാവിഷ്ണുവിന്റെ അടുത്ത് അപേക്ഷയുമായി ചെന്ന സമയത്ത് ഭഗവാൻ കറുപ്പും വെള്ളയുമായ രണ്ടു മുടിയിഴകൾ നൽകിയത്രേ!. കൃഷ്ണൻ ശ്യാമവർണ്ണനായും ബലരാമൻ ശ്വേതവർണ്ണനായും ജനിക്കാൻ ഇതാണത്രേ കാരണം. ഭൂഭാരം തീർക്കാനായി അവതരിച്ച ഇവരുടെ ചരിതം കേൾക്കുന്നത് തന്നെ സകലപാപങ്ങളെയും ഇല്ലാതാക്കും.
തുടരും
