കളമശേരി: യുവാവിനെ തട്ടികൊണ്ടു പോയി മര്ദ്ദിച്ച ക്വട്ടേഷന് സംഘനേതാവടക്കം നാലുപേര്ക്കെതിരെ കേസ്. മൂന്നു പേരെ കോടതി റിമാന്ഡ് ചെയ്തു. ചേരാനല്ലൂര് അറക്കല് ജയ്സന് (37), ആലങ്ങാട് തിരുമുപ്പം കാരിക്കച്ചേരി വീട്ടില് ചാള്സ് (30), ചങ്ങനാശ്ശേരി വാഴപ്പിള്ളി മൂലയില് ജോസ് (26) എന്നിവരെയാണ് റിമാന്ഡ് ചെയ്തത്. മുണ്ടക്കയം നെല്ലിക്കമണ്ണില് മനീഷിനെ (31) യാണ് തട്ടിക്കൊണ്ടുപോയി മര്ദ്ദിച്ചത്. നാലാം പ്രതി പ്രതീക്ഷയെ പിടികൂടാനായിട്ടില്ല.
നാലാം പ്രതിയായ പ്രതീക്ഷയും മനീഷും തമ്മില് രജിസ്റ്റര് വിവാഹം ചെയ്തു. വിവാഹത്തിനു ശേഷം പ്രതീക്ഷ ബാംഗഌരില് പോയി അവിഹിത ബന്ധത്തില് ഏര്പ്പെട്ടെന്ന് മനീഷ് പറയുന്നു. ഇക്കാര്യം പ്രതീക്ഷയുടെ അമ്മയെ അറിയിച്ചു. ഇതേ തുടര്ന്ന് ബന്ധം അവസാനിപ്പിക്കുകയായിരുന്നു. ഇതിന്റെ പ്രതീകാരമാണ് പ്രതീക്ഷ ക്വട്ടേഷന് സംഘത്തെ ഏര്പ്പാടാക്കിയത്.
കാറില് യാത്ര ചെയ്തിരുന്ന മനീഷിനെ മൂന്നംഗസംഘം തട്ടികൊണ്ടു പോയി മര്ദ്ദിക്കുകയായിരുന്നു. 16ന് രാവിലെ 7ന് ഇടപ്പള്ളി ടോളിനടുത്താണ് പരിചയക്കാരനായ ജയ്സന് മനീഷിന്റെ കാറിന് കൈകാണിച്ച് നിര്ത്തിക്കുകയായിരുന്നു. തുടര്ന്ന് പ്രതികള് കാറില് കയറി മനീഷിനെ മര്ദ്ദിക്കുകയായിരുന്നു. പത്തടിപ്പാലത്തെത്തിയപ്പോള് മനീഷ് കാര് നിര്ത്തി ഓടി രക്ഷപ്പെട്ടു. ഇതോടെ പ്രതികള് കാറുമായി കടന്നു കളഞ്ഞു. തുടര്ന്ന് മനീഷ് പോലീസില് പരാതി നല്കി. പോലീസ് നടത്തിയ അന്വേഷണത്തില് പ്രതികളെ പിടികൂടുകയായിരുന്നു.
