കോഴിക്കോട്: മനുഷ്യ ക്കടത്തിനിരിയായി കേരളത്തിലെത്തി ഗവ. മഹിളാ മന്ദിരത്തില് കഴിയുന്ന ബംഗ്ലാദേശി പെണ്കുട്ടികളെ നാട്ടിലേക്ക് തിരികെ അയക്കാനുള്ള നടപടികള് അന്തിമഘട്ടത്തില്. ഇവരില് മൂന്നു കുട്ടികളുള്പ്പെട്ട മഞ്ചേരി കോടതിയിലെ കേസില് സാക്ഷിവിസ്താരം പൂര്ത്തിയായ സ്ഥിതിക്ക് ഇവരെ നാട്ടിലേക്കയക്കുന്നതില് തടസ്സമില്ലെന്ന് കാണിച്ച് അഡീഷണല് ജില്ലാ-സെഷന്സ് കോടതി ജഡ്ജിയില് നിന്നുള്ള കത്ത് ജില്ലാഭരണകൂടം ലഭ്യമാക്കി ഫോറിനേഴ്സ് റീജ്യനല് റെജിസ്ട്രേഷന് ഓഫീസര്(എഫ്ആര്ആര്ഒ)ക്ക് കൈമാറി. ഇതനുസരിച്ചുള്ള തുടര് നടപടികള് എഫ്ആര്ആര്ഒ ഉടന് സ്വീകരിക്കും.
ഇതുമായി ബന്ധപ്പെട്ട് വ്യാഴാഴ്ച ജില്ലാ കലക്ടറുടെ നേതൃത്വത്തില് ലീഗല് സര്വീസസ് അതോറിറ്റി സെക്രട്ടറി സബ് ജഡ്ജ് ആര്.എല് ബൈജു, എഫ്ആര്ആര്ഒ എം. ആനന്ദ കുമാര്, അസിസ്റ്റന്റ് പോലിസ് കമ്മീഷണര് എം.പി പ്രേംദാസ് എന്നിവര് നടത്തിയ വിശദമായ ചര്ച്ചയുടെ അടിസ്ഥാനത്തിലാണ് നടപടി. നിയമപരമായി ബാംഗ്ലൂരിലും മലപ്പുറത്തും നിലനില്ക്കുന്ന വിഷയമാണെങ്കിലും കോഴിക്കോട് മഹിളാമന്ദിരത്തില് കഴിയുന്ന ഈ കുട്ടികളുടെ ദയനീയാവസ്ഥ പരിഗണിച്ചാണ് ജില്ലാ ലീഗല് സര്വീസസ് അതോറിറ്റി മുന്കൈയെടുത്ത് ജില്ലാ കലക്ടറുടെ നേതൃത്വത്തില് യോഗം വിളിച്ചത്. ഇതുമായി ബന്ധപ്പെട്ട് സബ്ജഡ്ജ് ആര്.എല്. ബൈജു ഹൈക്കോടതിയില് വിശദമായ റിപ്പോര്ട്ട് സമര്പ്പിച്ചിരുന്നു.
അതോടൊപ്പം ബാംഗ്ലൂര് കോടതിയില് ഫയല് ചെയ്ത കേസിലുള്പ്പെട്ട നാലാമത്തെ പെണ്കുട്ടിയെ കൂടി ഇവര്ക്കൊപ്പം നാട്ടിലെത്തിക്കാനുള്ള ശ്രമങ്ങളും നടന്നുവരുന്നുണ്ട്. ഇതിന്റെ ഭാഗമായി വിചാരണ വേളയില് വീഡിയോ കോണ്ഫറന്സ് വഴി കോടതിയില് ഹാജരാ ക്കാമെന്ന ഉറപ്പ് ബംഗ്ലാദേശ് ഹൈക്കമ്മീഷണറില് നിന്ന് ലഭ്യമാക്കാനുള്ള നടപടികള് പുരോഗമിക്കുകയാണ്. ഇതോടൊപ്പം ബാംഗ്ലൂര് പോലീസുമായും കര്ണാടക ലീഗല് സര്വീസസ് അതോറിറ്റിയുമായും ബന്ധപ്പെട്ട് ഈ പെണ്കുട്ടിക്കു കൂടി യാത്രാനുമതി ലഭ്യമാക്കുന്നതിനുള്ള നീക്കങ്ങളും നടക്കുന്നുണ്ട്.
ഒരു കുട്ടി മാത്രം ഇവിടെ തങ്ങേണ്ടിവരുന്ന സാഹചര്യം ഒഴിവാക്കാനുള്ള ശ്രമങ്ങളാണ് ഇപ്പോള് നടക്കുന്നതെന്നും ഇക്കാര്യത്തില് ഉടന് തന്നെ തീരുമാനമുണ്ടാക്കാനാവുമെന്നാണ് പ്രതീക്ഷയെന്നും ജില്ലാ കലക്ടര് എന്. പ്രശാന്ത് പറഞ്ഞു.
