ബോധം അറിവാണ്. ധർമ്മം സൽപ്രവൃത്തിയാണ്. ഈ അവസ്ഥയിൽ തന്നെത്താൻ ത്യജിച്ച് അറിവുകേടിലും അധർമ്മത്തിലും ജീവിച്ചു നരകം അനുഭവിക്കുന്ന നരന്മാരെ, സത്യത്തെയും ധർമ്മത്തെയും കൊണ്ട് അറിവുകേടിനെയും അധർമ്മത്തെയും നിശ്ശേഷം ഭസ്മീകരിച്ച് അവരിൽ സത്യത്തെയും ധർമ്മത്തെയും സ്ഥാപിച്ച് സമാധാനം എന്ന നിത്യശാന്തി നൽകി രക്ഷിക്കുന്നതിനുള്ള ബോധമാകുന്നു സത്യം. അതു തന്നെ ഖഡ്ഗി. സൽക്കർമ്മമാകുന്നു യുദ്ധം. അതു തന്നെ ധർമ്മം.
ഇത് മനുഷ്യരുടെ അറിവിലും പ്രവൃത്തിയിലും അവതരിപ്പിക്കുന്നതാകുന്നു അവതാരം. അറിവുകേടും അധർമ്മവുമാകുന്നു കലി. അതിനെ വധിക്കുന്ന ഖഡ്ഗിയാകുന്നു സത്യധർമ്മം. ഇതു തന്നെയാണ് കലിയുഗത്തിൽ ഖഡ്ഗി അവതരിക്കും എന്നു പറയുന്നത്. നിത്യശാന്തിയുണ്ടായാൽ ആശ്വാസം കൊണ്ടുണ്ടാകുന്ന ആനന്ദം കൊടുംകാറ്റു പോലെയാണ് ഹൃദയശുദ്ധിയിൽ നിന്നു വർഷിക്കുന്ന ജ്ഞാനം പെരുമഴ പോലെയാണ്.
ഈ അവസ്ഥയിൽ നിന്നുത്ഭവിക്കുന്ന ശക്തി വെള്ളിടിപോലെയാണ്. സുഖമാകുന്ന സ്നേഹം തേൻകട്ടയിലും കവിയുന്നു. ഇതിനാൽ മനുഷ്യലോകത്തിന് ഏതു കാലത്തും സ്ഥിരപ്പെട്ടിരിക്കുന്ന ഈ നന്മ, മുത്തു രത്നങ്ങളിലും വിലയേറിയത് എന്തെന്നു വർണ്ണിക്കേണ്ടു. കണ്ടറിഞ്ഞു പ്രവർത്തിച്ചനുഭവിക്കുന്നതിന് കേൾക്കുവിൻ, അറിയുവിൻ, പ്രവർത്തിക്കുവിൻ, അനുഭവിക്കുവിൻ. ദൈവം നിങ്ങളെ അനുഗ്രഹിക്കട്ടെ.
