തേഞ്ഞിപ്പലം: കാഴ്ചയില്ലാത്തവര്ക്ക് ഇലകളും പൂക്കളും കായ്കളും പഴങ്ങളും തൊട്ടും മണത്തും കേട്ടും അറിയാനുള്ള ഇന്ത്യയിലെ ആദ്യത്തെ പൂന്തോപ്പ് കാലിക്കറ്റ് സര്വകലാശാലയില് ഇന്ന് തുറന്നുകൊടുക്കും. ‘ടെച്ച് ആന്റ് ഫീല് ഗാര്ഡന് ഫോര് വിഷ്വലി ഇംപയേര്ഡ്’ രാവിലെ 9.30ന് സ്പീക്കര് പി.രാമകൃഷ്ണന് തുറന്നുകൊടുക്കും. ലോകത്തിന്റെ നിറങ്ങളത്രയും നഷ്ടമായ മനുഷ്യര്ക്ക് വേണ്ടിയുള്ള ഗാര്ഡന് ഉദ്ഘാടനം ചെയ്യുന്ന ചടങ്ങില്, സ്വന്തം കണ്ണുകള് മൂടികൊണ്ടാണ് വിശിഷ്ടാതിഥികള് എല്ലാവരും പങ്കെടുക്കുക. കാഴ്ചയില്ലാത്തവര്ക്ക് എങ്ങിനെ ഈ സസ്യ-ഫല ശേഖരം പ്രയോജനപ്പെടുന്നുവെന്ന് നേരിട്ട് അനുഭവിച്ചറിയാനാണിത്. വിശിഷ്ടാതിഥികള്ക്കൊപ്പം കോഴിക്കോട് കൊളത്തറ വികലാംഗ ഹയര് സെക്കണ്ടറി സ്കൂള് വിദ്യാര്ത്ഥികളും പങ്കെടുക്കും.
മണമുള്ള ഇലകളോ, പൂക്കളോ ഉള്ള 65 ഇനം ചെടികള്, തുറസ്സായ സ്ഥലത്ത് ഉയര്ത്തിയ പ്ലാറ്റ് ഫോമില് ക്രമീകരിച്ചിട്ടുണ്ട്. ഓരോ ചെടിയുടെയും പേരുകള് സാധാരണ രീതിയിലും ബ്രെയിലിയിലും എഴുതിയിരിക്കുന്നു. കൂടാതെ നെയിം ബോര്ഡില് പ്രത്യേക തരത്തിലുള്ള സ്റ്റിക്കര് പതിച്ചിട്ടുണ്ട്. സോണിക് ലേബലര് എന്ന പേരിലുള്ള, പേനയുടെ ആകൃതിയിലുള്ള പ്രത്യേക ഉപകരണംകൊണ്ട് ഈ സ്റ്റിക്കറില് സ്പര്ശിച്ചാല് ആ ചെടിയെ കുറിച്ചുള്ള വിവരങ്ങള് സ്പീക്കറിലൂടെ കേള്ക്കാന് കഴിയും. ചെടിയുടെ പേര്, ശാസ്ത്ര നാമം, ഉപയോഗങ്ങള് തുടങ്ങിയവയെല്ലാം റെക്കാര്ഡ് ചെയ്തിട്ടുണ്ട്. ബ്രെയിലി പ്രിന്റിംഗ് മുബൈയിലെ സ്ഥാപനത്തിലാണ് ചെയ്തിട്ടുള്ളത്. മുള്ളുള്ളവയും ചൊറിച്ചില് ഉണ്ടാക്കുന്നവയുമായ സസ്യയിനങ്ങള് ഒഴിവാക്കിയാണ് ചെടികള് തെരഞ്ഞെടുത്തിട്ടുള്ളതെന്ന് പദ്ധതിയുടെ ചുമതല വഹിക്കുന്ന ബോട്ടണി വിഭാഗം പ്രൊഫസര് ഡോ.എം.സാബു പറഞ്ഞു. കോള ചെടി മുതല് കിരിയാത്ത വരെയുള്ള നാടന്, വിദേശ ഇനങ്ങളും ഇതിലുണ്ട്. പച്ചക്കറി ചെടികള്, സുഗന്ധ വ്യഞ്ജന ചെടികള്, ഔഷധ സസ്യങ്ങള് തുടങ്ങിയവയെല്ലാം കാഴ്ചയില്ലാത്തവര്ക്കായി ഒരുക്കിയ ശേഖരത്തില് ഉള്പ്പെടുന്നു. പത്ത് സെന്റ് സ്ഥലത്താണ് സംവിധാനം ഒരുക്കിയിട്ടുള്ളത്.
സസ്യങ്ങള്ക്ക് പുറമെ കെട്ടിടത്തിനകത്ത് കാര്പോളജി ശേഖരവും ഒരുക്കിയിട്ടുണ്ട്. ഉണങ്ങിയ വിത്തുകളും പഴങ്ങളും മറ്റുമായി 36 ഇനങ്ങള് ഇവിടെയുണ്ട്. അവ ബോക്സുകളില് നിന്നെടുത്ത് തൊട്ടും മണത്തും അറിയുകയും ബ്രെയിലിയില് വായിച്ച് കൂടുതല് വിവരങ്ങള് മനസ്സിലാക്കുകയും ചെയ്യാം. കെട്ടിടത്തിനകത്ത് സജ്ജമാക്കിയ ഉണങ്ങിയ വിത്തുകളും പഴങ്ങളും മറ്റും ഉള്പ്പെട്ട ഈ കാര്പോളജി ശേഖരത്തിന്റെ ഉദ്ഘാടനം പി.അബ്ദുല് ഹമീദ് എം.എല്.എ നിര്വഹിക്കും.
മരുപ്രദേശങ്ങളില് വളരുന്ന വിവിധ ഇനം കള്ളിച്ചെടികളുടെ ശേഖരം ഉള്പ്പെടുത്തി ബൊട്ടാണിക്കല് ഗാര്ഡനില് ഒരുക്കിയ തോട്ടത്തിന്റെ ഉദ്ഘാടനവും ഇന്ന് നടക്കും. വൈസ് ചാന്സലര് ഡോ.കെ.മുഹമ്മദ് ബഷീര് ഉദ്ഘാടനം ചെയ്യും. 750 അടി ചതുരശ്ര സ്ഥലത്താണ് കള്ളിച്ചെടികളുടെ ശേഖരം ഒരുക്കിയിട്ടുള്ളത്. മരുപ്രദേശങ്ങളിലെ അന്തരീക്ഷം ഈ ഭാഗത്ത് പ്രത്യേകമായി സൃഷ്ടിച്ചാണ് ഇവ വളര്ത്തുന്നതെന്നും ഡോ.എം.സാബു അറിയിച്ചു.
കേന്ദ്ര പരിസ്ഥിതി, വനം, കാലാവസ്ഥ വ്യതിയാന മന്ത്രാലയമാണ് ടെച്ച് ആന്റ് ഫീല് ഗാര്ഡനുവേണ്ടി 17 ലക്ഷം രൂപ നല്കിയത്. ഒരു വര്ഷത്തെ പ്രവര്ത്തനത്തിലൂടെയാണ് പദ്ധതി പ്രാവര്ത്തികമാക്കിയിട്ടുള്ളത്.
