ഭൃഗു ശാപാൻ മുനിശേഷ്ഠ ഹരേരത്ഭുതകർമ്മണ:
അവതാരാ: കഥം ജാതാ:കസ്മിൻ മന്വന്തരേ വിഭോ
വിസ്തരാദ്വദ ധർമ്മജ്ഞ അവതാരകഥാം ഹരേ:
പാപനാശകരീം ബ്രഹ്മൻ ശ്രുതാം സർവ സുഖാവഹാം
ജനമേജയൻ ചോദിച്ചു: ‘വിഷ്ണുഭഗവാൻ ഭൃഗുമുനിയുടെ ശാപം മൂലം എങ്ങനെ, എവിടെയാണ് അവതരിച്ചത്? ഏതു മന്വന്തരത്തിലാണ് അത് സംഭവിച്ചത്? വിഷ്ണുവിന്റെ അവതാരങ്ങൾ അത്ഭുതാവഹങ്ങൾ തന്നെയാണ്. സകല പാപനിവാരകമാണാ കഥകൾ. അവയെല്ലാം വിശദമായിത്തന്നെ ഞങ്ങൾക്ക് പറഞ്ഞു തന്നാലും മഹാമുനേ.’
വ്യാസൻ പറഞ്ഞു: ‘ആ കാര്യങ്ങൾ ഞാൻ വിശദമായിത്തന്നെ പറയാം. പണ്ട് ചാക്ഷുഷ മന്വന്തരത്തിൽ ധർമ്മന്റെ പുത്രന്മാരായി നരനും നാരായണനും ജനിച്ചു. ധർമ്മത്തിന്റെ അവതാരങ്ങളെന്നവണ്ണം അവർ വളർന്നു. വൈവസ്വതമന്വന്തരത്തിൽ ഭഗവാൻ ഹരി, അത്രിയുടെ പുത്രനായ ദത്താത്രേയനായി. അത്രിയുടെ പത്നി അനസൂയയുടെ പ്രാർത്ഥനയുടെ ഫലമായി ബ്രഹ്മാവിഷ്ണുമഹേശ്വരന്മാർ അവർക്ക് മക്കളായി ജനിച്ചു.
ബ്രഹ്മാവ് ചന്ദ്രനായും ഹരി ദത്താത്രേയനായും പരമശിവൻ ദുർവ്വാസാവായും അനസൂയാപുത്രന്മാരായി ജനിച്ചു. നാലാംയുഗത്തിൽ ഹരി നരസിംഹരൂപമെടുത്ത് ഹിരണ്യകശിപുവിനെ വധിച്ചു. അടുത്തത് ത്രേതായുഗത്തിൽ ബലിയുടെ അഹങ്കാരശമനത്തിനായി ഭഗവാൻ എടുത്ത വാമനരൂപം. മഹാബലി യജ്ഞം നടത്തുമ്പോൾ ഭഗവാൻ കശ്യപപുത്രനായ ബ്രഹ്മചാരിയായി വന്നു ദാനം ചോദിച്ചു. ഒടുവിൽ രാജ്യം മുഴുവനും കൈക്കലാക്കിയശേഷം ബാലിയെ പാതാളത്തിൽ വാഴിക്കുകയും ചെയ്തു
.പിന്നീട് ത്രേത എന്ന് പേരുള്ള പത്തൊൻപതാം യുഗത്തിൽ ഭഗവാൻ ജമദഗ്നിയുടെ പുത്രനായ പരശുരാമനായി. അദ്ദേഹം ക്ഷത്രിയവംശത്തെ കൊന്നൊടുക്കി ഭൂമണ്ഡലത്തെ കശ്യപമുനിക്ക് ദാനം നൽകി. പാപനാശനമായിരുന്നു പരശുരാമാവതാരത്തിന്റെ ലക്ഷ്യം. ത്രേതായുഗത്തിൽ ഭഗവാൻ ശ്രീരാമനായി അവതരിച്ചു. ദ്വാപരയുഗത്തിൽ ഭഗവാൻ കൃഷ്ണനും അർജ്ജുനനും ആയി.
മഹാബലവാന്മാരായ നരനും നാരായണനും തന്നെയാണിവർ. ഭൂമിയുടെ ഭാരമായ ദുഷ്ടന്മാരെ നിഗ്രഹിച്ചു സജ്ജനസംരക്ഷണമാർത്ഥമാണ് ഇവർ അവതരിച്ചത്. ഇവർ അതിപ്രശസ്തമായ കുരുക്ഷേത്രയുദ്ധത്തിൽ പങ്കെടുത്തിരുന്നു.
(തുടരും)
പ്രതികരിക്കാൻ ഇവിടെ എഴുതുക: