അങ്ങ് ഈശ്വരനാണ്, അങ്ങേയ്ക്ക് ധർമ്മവും അധർമ്മവും ഇല്ല, പുണ്യവും പാപവുമില്ല. ധാരാളം ജന്മങ്ങൾ അങ്ങ് ഇതിനുമുമ്പ് സ്വീകരിച്ചിട്ടുണ്ട് എന്നുപറയുന്നു. രണ്ടും തമ്മിൽ പൊരുത്തപ്പെടുന്നില്ലല്ലോ. ഭഗവാൻ പറയുന്നു: ശരിയാണ് ഞാൻ.
അജോപി സൻ-അജനാണ്. ജനിക്കാത്തവനാണ്. ഏതെങ്കിലും ഒരു അമ്മയുടെ ഗർഭത്തിൽ സാധാരണ ജീവന്മാരെപ്പോലെ പ്രവേശിക്കുകയും ഭൗതികദേഹം സ്വീകരിക്കുകയും പത്തുമാസം ഗർഭത്തിൽ കിടന്ന്, പുറത്തേക്കു വരികയും ചെയ്തവനല്ല.
കാരണം, ഞാൻ അവ്യയാത്മാ സൻ-നിങ്ങളുടെ ദേഹം നശിക്കുന്നതാണ്; ആത്മാവ് നശിക്കാതെ വേറെ ദേഹത്തിൽ പ്രവേശിക്കുന്നു. എനിക്കു ദേഹവും ദേഹി (ആത്മാ)യും വേറെ വേറെ ഇല്ല. അവതരിക്കുമ്പോഴും-ഭൗതിക പ്രപഞ്ചത്തിലേക്ക് ഇറങ്ങി വരുമ്പോഴും, എന്റെ അതീന്ദ്രിയവും ദിവ്യവുമായ പരമവ്യോമത്തിൽ-ഗോലോകവൃന്ദാവനത്തിൽ ലീലകളാടുമ്പോഴും എന്റെ ദേഹത്തിന് ഒരു കുറവും മാറ്റവും സംഭവിക്കുന്നില്ല.
ഞാൻ സച്ചിദാനന്ദ ഘന സ്വരൂപൻ തന്നെ.
അദൈ്വതാചാര്യനായ ശ്രീശങ്കരാചാര്യർ ഇക്കാര്യം വ്യക്തമാക്കുന്നു.
”സ ച ഭഗവാൻ ജ്ഞാനൈശ്വര്യ ശക്തി ബല വീര്യ തോജോഭിഃ സദാ സമ്പന്നഃ (=ശ്രീകൃഷ്ണൻ ഭഗവാനാണ്. ഭഗവാൻ എന്ന പദത്തിന്റെ അർത്ഥം 6 ഭഗങ്ങൾ ഉള്ളവൻ എന്നാണ്. ഏതാണ് ആറ് ഭഗങ്ങൾ? ജ്ഞാനം, ഐശ്വര്യം, ശക്തി, ബലം, വീര്യം, തേജസ്സ് എന്നിവയാണിവ. ഈ ഗുണങ്ങൾ (സദാ സമ്പന്നം) എപ്പോഴും-അവതരിക്കുമ്പോഴും അവതരിക്കാതിരിക്കുമ്പോഴും-പൂർണമായി നിലനിൽക്കുന്നതുകൊണ്ടാണ് ശ്രീകൃഷ്ണനെ, ഭഗവാൻ എന്നുപറയുന്നത്.
ഒരു കാര്യം കൂടി ശങ്കരാചാര്യർ പറയുന്നു:-
”സ്വമായയാ ദേഹവാൻ ഇവ
ജാതന്തുവ ച ലോകാനുഗ്രഹം കുർവ്വൻ ഇവ
ലക്ഷ്യതേ” = ശ്രീകൃഷ്ണ ഭഗവാൻ തന്റെ മായകൊണ്ട്-ജ്ഞാനശക്തികൊണ്ട്-ദേഹം സ്വീകരിച്ചതുപോലെയും ജനിച്ചതുപോലെയും ലോകാനുഗ്രഹം ചെയ്യുന്നതുപോലെയും ലീലകൾ ചെയ്യുന്നു.”
