പുനലൂര്: കല്ലടയാറിന്റെ ഇരുകരകളും ഇടിഞ്ഞുതള്ളുന്നു. സംരക്ഷണത്തിന് ബന്ധപ്പെട്ട അധികൃതര് നടപടിയെടുക്കുന്നില്ല. അനധികൃത മണല്വാരലിനെ തുടര്ന്നാണ് ആറിന്റെ ഇരുകരകളും ദിവസേന ഇടിഞ്ഞുതള്ളുന്നത്. കഴിഞ്ഞ കാലങ്ങളില് കിഴക്കന്മേഖലയില് വന്തോതില് അനധികൃതമണല്വാരല് നടന്നിരുന്നു. എല്ലാ നിയന്ത്രണങ്ങളും ലംഘിച്ച് നദിയുടെ കരകള് ഇടിച്ചുപോലും മണല്വാരി കടത്തുകയാണ്. ഇതിനെ തുടര്ന്ന് നദികള് തകര്ച്ചയിലാണ്. ഇപ്പോള് ദിവസേന കരകള് ഇടിഞ്ഞുതള്ളുന്ന കാഴ്ചയാണ്. നദിയുടെ വിസ്തൃതി വര്ധിച്ച് കല്ലടയാര് തകര്ച്ചയിലേക്കാണ് കൂപ്പുകുത്തുന്നത്.
കല്ലടയാറിന്റെ പല ഭാഗങ്ങളും കുഴിഞ്ഞുകിടക്കുകയാണ്.
വേനല്ക്കാലത്ത് പോലും ആറ്റിലിറങ്ങാന് കഴിയാത്ത അവസ്ഥയാണ്. നദിയെ സംരക്ഷിക്കാന് ബന്ധപ്പെട്ടവര് യാതൊരു നടപടിയും സ്വീകരിക്കുന്നില്ല. വര്ഷങ്ങള്ക്ക് മുമ്പ് പുനലൂര് നഗരസഭ ആറിന്റെ കരകളില് മുളകള് നട്ടുപിടിപ്പിച്ചെങ്കിലും അത് ഉണങ്ങിപോയിരുന്നു. ആറിന്റെ സംരക്ഷണത്തിനായി പദ്ധതിയുണ്ടെന്ന് ബന്ധപ്പെട്ടവര് പ്രഖ്യാപനം മുഴക്കുമ്പോഴും യാതൊരു നടപടിയും സ്വീകരിക്കാത്തതില് പ്രതിഷേധം ശക്തമാണ്.
