മലപ്പുറം: ഗോകുലം ഗ്രൂപ്പ് മാനേജിംഗ് ഡയറക്ടര്‍ ഗോകുലം ഗോപാലന്റെ ജന്മദിനത്തോടനുബന്ധിച്ച് നാളെ ഗോകുലം ചാരിറ്റി വാട്‌സ് ആപ്പ് ഗ്രൂപ്പ് തുടങ്ങുന്നു.
കോട്ടക്കുന്ന് ഡി ടി പി സി ഹാളില്‍ രാവിലെ 10ന് സിനിമാതാരം മഖ്ബൂല്‍ സല്‍മാന്‍ ഉദ്ഘാടനം ചെയ്യുമെന്ന് മലപ്പുറം ജില്ലാ റീജിയണ്‍ അസിസ്റ്റന്റ് ജനറല്‍ മാനേജര്‍ പി സി വിശ്വകുമാര്‍ വാര്‍ത്താസമ്മേളനത്തില്‍ അറിയിച്ചു. ജന്മദിനാഘോഷ പരിപാടികള്‍ പി ഉബൈദുള്ള എം എല്‍ എ ഉദ്ഘാടനം ചെയ്യും.
ഗോകുലം ഗ്രൂപ്പ് നല്‍കുന്ന വിവിധ അവാര്‍ഡുകള്‍ എ പി അനില്‍കുമാര്‍ എംഎല്‍എ വിതരണം ചെയ്യും. സാമൂഹ്യമാധ്യമങ്ങളിലൂടെ സേവന തത്പരരായവരെ ഒന്നിപ്പിക്കാനാണ് പദ്ധതികൊണ്ട് ലക്ഷ്യമിടുന്നത്. അവയവദാനം, രക്തദാനം പ്രോത്സാഹിപ്പിക്കുന്നതിനും രോഗികളെ സഹായിക്കുന്നതിനും സമൂഹത്തിന്റെ വിവിധ വിഭാഗത്തിലുള്ളവരുടെ ഈ കൂട്ടായ്മ ഉപകരിക്കും.
ജില്ലാ ടൂറിസം പ്രമോഷന്‍ കൗണ്‍സിലുമായി സഹകരിച്ച് അന്ന് 1000 ഫലവൃക്ഷതൈകളും കോട്ടക്കുന്നില്‍ നടും.
തിരൂര്‍ വെട്ടം ശാന്തി സ്‌പെഷ്യല്‍ സ്‌കൂളിലെ അന്തേവാസികള്‍ക്ക് വസ്ത്രവും ഭക്ഷണവും നല്കും. ഗോകുലം ഗ്രൂപ്പിന്റെ ജില്ലയില്‍ നിന്നുള്ള ലാഭത്തിന്റെ ഒരു വിഹിതം സാമൂഹ്യ സേവനത്തിനും കലാ-കായിക രംഗത്ത് പ്രതിഭകളുടെ വളര്‍ച്ചക്കും മാറ്റിവെക്കുമെന്നും അദ്ദേഹം പറഞ്ഞു.
പ്രതികരിക്കാൻ ഇവിടെ എഴുതുക: