കൊച്ചി: സര്ക്കാര് അഭിഭാഷകന് യുവതിയെ കടന്ന് പിടിച്ച കേസ് വനിത സിഐ അന്വേഷിക്കുമെന്ന് ഡിജിപി ലോക്നാഥ് ബഹ്റ. അഡ്വ. ധനേഷ് മാത്യു മാഞ്ഞൂരാനെതിരായ പരാതി ആലുവ റൂറലിലെ സിഐ രാധാമണിയാണ് അന്വേഷിക്കുക. ചൊവ്വാഴ്ച മാധ്യമ പ്രവര്ത്തകര് നടത്തിയ പ്രതിഷേധ മാര്ച്ചിന് നേരെ അഭിഭാഷകര് നടത്തിയ ആക്രമണത്തെക്കുറിച്ച് ആലുവ റൂറല് എസ്പി പി.എന്. ഉണ്ണിരാജനും അന്വേഷിക്കുമെന്നും ഡിജിപി മാധ്യമ പ്രവര്ത്തകരോട് പറഞ്ഞു.
യുവതി നല്കിയ പരാതിയില് കേസെടുത്തത് തെളിവുകളുടെ അടിസ്ഥാനത്തിലാണ്. പോലീസ് മനഃപൂര്വം കേസെടുത്തിട്ടില്ല. ഇക്കാര്യങ്ങളെക്കുറിച്ച് വനിത സിഐ അന്വേഷിക്കും. മാര്ച്ചുമായി ബന്ധപ്പെട്ട് പോലീസില് നിന്ന് നീതി ലഭിച്ചില്ലെന്ന അഭിഭാഷകരുടെ പരാതിയും ഉണ്ണിരാജ അന്വേഷിക്കുമെന്നും ഡിജിപി പറഞ്ഞു. ഹൈക്കോടതിയില് മാധ്യമപ്രവര്ത്തകരെ മര്ദിച്ച സംഭവത്തിന്റെ പശ്ചാത്തലത്തില് ബുധനാഴ്ച കൊച്ചിയിലെത്തിയ ഡിജിപിയെ മുതിര്ന്ന അഭിഭാഷന് എം.കെ. ദാമോദരന്റെ നേതൃത്വത്തില് ഹൈക്കോടതി അഡ്വക്കേറ്റ്സ് അസോസിയേഷന് ഭാരവാഹികള് സന്ദര്ശിച്ചിരുന്നു. ഇതേത്തുടര്ന്നാണ് അന്വേഷണത്തിന് ഉത്തരവിട്ടത്.
യുവതിയെ കടന്ന്പിടിച്ച കേസില് ധനേഷിനെ പോലീസ് മനഃപൂര്വം കുടുക്കുകയായിരുന്നുവെന്ന് അഭിഭാഷകര് അറിയിച്ചപ്പോള് പരാതിയില് കേസെടുത്തതില് പോലീസിന് വീഴ്ച പറ്റിയിട്ടില്ലെന്ന് ഡിജിപി വ്യക്തമാക്കി. മാധ്യമ പ്രവര്ത്തകര്ക്കെതിരെ കേസെടുക്കണമെന്നും അഭിഭാഷകര് ആവശ്യപ്പെട്ടു. റേഞ്ച് ഐജി എസ്. ശ്രീജിത്തും ചര്ച്ചയില് പങ്കെടുത്തു.
എറണാകുളം കോണ്വെന്റ് ജംഗ്ഷനില് ഞാറയ്ക്കല് സ്വദേശിയായ യുവതിയോട് അപമര്യാദയായി പെരുമാറിയെന്ന കേസിലാണ് അഡ്വ. ധനേഷ് മാത്യു മാഞ്ഞൂരാനെ സെന്ട്രല് പോലീസ് 14ന് അറസ്റ്റ് ചെയ്തത്. 14ന് രാത്രി ഏഴോടെ കോണ്വെന്റ് ജംഗ്ഷനു സമീപമുള്ള ഉണ്ണിയാട്ട് ലെയ്നില് ധനേഷ് യുവതിയെ കടന്നുപിടിച്ചുവെന്നാണ് പരാതി. യുവതി ഒച്ചവച്ചതോടെ ഓടിക്കൂടിയ നാട്ടുകാരാണ് രക്ഷപ്പെടാന് ശ്രമിച്ച ധനേഷിനെ പിടികൂടി പോലീസില് ഏല്പ്പിച്ചത്. യുവതിയുടെ പരാതിയില് ഐപിസി 354 പ്രകാരം ധനേഷിനെതിരെ കേസും രജിസ്റ്റര് ചെയ്തിട്ടുണ്ട്.
യുവതി നല്കിയ രഹസ്യമൊഴിയും വാര്ത്തയായതില് ഒരുവിഭാഗം അഭിഭാഷകര് പ്രകോപിതരായിരുന്നു. ഇവര് ചൊവ്വാഴ്ച ഹൈക്കോടതിയിലെ മീഡിയ റൂമില് വച്ച് രണ്ട് മാധ്യമപ്രവര്ത്തകരെ ആക്രമിച്ചതോടെയാണ് പ്രശ്നങ്ങള്ക്ക് തുടക്കം. മീഡിയ റൂമില് ഇവരെ തടഞ്ഞുവയ്ക്കുകയും അസഭ്യം പറയുകയും മുറിയില് നിന്ന് തള്ളിപുറത്താക്കുകയും ചെയ്തു. ചോദ്യംചെയ്ത അഭിഭാഷകന് കൂടിയായ മറ്റൊരു മാധ്യമ പ്രവര്ത്തകനെ ചവിട്ടിയിട്ടു. തുടര്ന്ന് ഹൈക്കോടതിക്ക് മുന്നില് പ്രതിഷേധിച്ച മാധ്യമ പ്രവര്ത്തകരെ ഒരുകൂട്ടം അഭിഭാഷകര് അസഭ്യവര്ഷത്തോടെ ആക്രമിക്കുകയായിരുന്നു. പോലീസിനെതിരെയും മുദ്രാവാക്യമുയര്ത്തിയ സംഘം പ്രകോപനം സൃഷ്ടിക്കുകയായിരുന്നു.
ഈ സംഭവത്തിന്റെ തുടര്ച്ചയായി ബുധനാഴ്ചയും ഹൈക്കോടതി മീഡിയ റൂമില് വച്ച് അഭിഭാഷകര് വനിതാ മാധ്യമപ്രവര്ത്തകരെ വളഞ്ഞുവച്ച് അസഭ്യം പറഞ്ഞു. തുടര്ന്ന് റൂം പൂട്ടി ഇവരെ പുറത്താക്കി. വിവരമറിഞ്ഞ് മാധ്യമപ്രവര്ത്തകര് ഹൈക്കോടതിക്ക് സമീപം കുത്തിയിരുന്ന് സമാധാനപരമായി പ്രതിഷേധിച്ചതിനെയും അഭിഭാഷകര് ആക്രമിച്ചു. മാധ്യമപ്രവര്ത്തകരെ മര്ദിച്ചവര്ക്കെതിരെ നടപടിയെടുക്കുക, സ്വതന്ത്രവും നിര്ഭയവുമായി ഹൈക്കോടതില് റിപ്പോര്ട്ടിങ്ങിന് അവസരമൊരുക്കുക തുടങ്ങിയ ആവശ്യങ്ങളുന്നയിച്ചായിരുന്നു മാര്ച്ച്.
