കൊച്ചി: സര്ക്കാര് അഭിഭാഷകന് യുവതിയെ കടന്നു പിടിച്ചുവെന്ന കേസ് റിപ്പോര്ട്ട് ചെയ്യാനെത്തിയ മാധ്യമ പ്രവര്ത്തകര്ക്ക് അഭിഭാഷകരുടെ മര്ദ്ദനം. സംഭവത്തെത്തുടര്ന്ന് മാധ്യമ പ്രവര്ത്തകര് ആക്ടിംഗ് ചീഫ് ജസ്റ്റീസ് തോട്ടത്തില് ബി രാധാകൃഷ്ണന്, ഹൈക്കോടതി രജിസ്ട്രാര് ജനറല് അശോക് മേനോന് എന്നിവര്ക്ക് പരാതി നല്കി.
ഇന്നലെ ഉച്ചയോടെയാണ് ഹൈക്കോടതിയില് ഒരുകൂട്ടം അഭിഭാഷകര് മാധ്യമ പ്രവര്ത്തകര്ക്കു നേരെ തിരിഞ്ഞത്. യുവതിയെ കടന്നു പിടിച്ചെന്ന കേസ് റദ്ദാക്കണമെന്നാവശ്യപ്പെട്ട് ഗവ. പ്ലീഡര് അഡ്വ. ധനേഷ് മാത്യു മാഞ്ഞൂരാന് നല്കിയ ഹര്ജി ഇന്നലെ ജസ്റ്റീസ് സുനില് തോമസ് പരിഗണിച്ചിരുന്നു. ഇതു റിപ്പോര്ട്ട് ചെയ്ത് പുറത്തിറങ്ങുമ്പോള് ഡെക്കാണ് ക്രോണിക്കിളിലെ സീനിയര് റിപ്പോര്ട്ട് രോഹിത് രാജിനെ ഒരു പറ്റം അഭിഭാഷകര് അസഭ്യം പറഞ്ഞു കയ്യേറ്റം ചെയ്യുകയായിരുന്നു. പിന്നീട് ഇതേക്കുറിച്ച് പരാതി തയ്യാറാക്കുന്നതിനിടെ ഹൈക്കോടതിയിലെ മീഡിയ റൂമിന് പുറത്തെത്തിയ മറ്റൊരു സംഘം അഭിഭാഷകര് വീണ്ടും പ്രശ്നങ്ങളുണ്ടാക്കാന് ശ്രമിച്ചു. മാധ്യമ പ്രവര്ത്തകരായ അഭിഭാഷകരടക്കമുള്ളവരെ ഇവര് കയ്യേറ്റം ചെയ്തു. തുടര്ന്ന് മാധ്യമ പ്രവര്ത്തകര് ആക്ടിംഗ് ചീഫ് ജസ്റ്റീസ് തോട്ടത്തില്.ബി. രാധാകൃഷ്ണന്, ഹൈക്കോടതി രജിസ്ട്രാര് ജനറല് അശോക് മേനോന് എന്നിവര്ക്ക് രേഖാമൂലം പരാതി നല്കി.
അഭിഭാഷകനെതിരെ പോലീസ് കള്ളക്കേസെടുത്തെന്നാരോപിച്ച് എറണാകുളം സെന്ട്രല് പോലീസ്സ്റ്റേഷനിലേക്ക് ഹൈക്കോര്ട്ട് അഡ്വക്കേറ്റ്സ് അസോസിയേഷന്റെ നേതൃത്വത്തില് മാര്ച്ച് നടത്താന് കഴിഞ്ഞ ദിവസം തീരുമാനിച്ചിരുന്നു. ഇന്നലെ ഇതു വേണ്ടെന്നു വച്ചിരുന്നു. ഹര്ജിയിലെ ആവശ്യം കോടതി അംഗീകരിക്കാതിരുന്നതോടെ അഭിഭാഷക അസോസിയേഷന് പത്രസമ്മേളനം വിളിച്ചെങ്കിലും മാധ്യമ പ്രവര്ത്തകര്ക്കെതിരായ അക്രമങ്ങളെ തുടര്ന്നു പത്രസമ്മേളനം മാധ്യമ പ്രവര്ത്തകര് ബഹിഷ്കരിക്കുകയായിരുന്നു.
