ചെങ്ങന്നൂര്‍: വള്ളസദ്യക്ക് പോകവെ പള്ളിയോടം മറിഞ്ഞ് മരിച്ച ചെങ്ങന്നൂര്‍ കീഴ്‌ച്ചേരിമേല്‍ തോണ്ടിയത്ത് രാജീവും കീഴ്‌ച്ചേരിമേല്‍ ചൈത്രം (കല്ലൂരേത്ത്) വിശാഖ് രാധാകൃഷ്ണന്‍ എന്ന വിഷ്ണുവും ആത്മ സുഹൃത്തുക്കള്‍ ആയിരുന്നു. നാട്ടിലെ എല്ലാ പൊതുകാര്യങ്ങളിലും സജീവമായി പങ്കെടുത്തിരുന്ന ഇവരുടെ വേര്‍പാടില്‍ തേങ്ങുകയാണ് കീഴ്‌ച്ചേരിമേല്‍ ഗ്രാമം.
പള്ളിയോടവും വള്ളപ്പാട്ടും ഇരുവര്‍ക്കും ഒരുപോലെ ഇഷ്ടമായിരുന്നു. കഴിഞ്ഞ ആഴ്ച കീഴ്‌ച്ചേരിമേല്‍ പള്ളിയോടം നീറ്റിലിറക്കിയപ്പോള്‍ എല്ലാ കാര്യങ്ങള്‍ക്കും മുന്‍കൈ എടുത്തത് രാജീവായിരുന്നു. എറണാകുളത്ത് സ്വകാര്യകമ്പനിയില്‍ സോഫ്റ്റ് വെയര്‍ എന്‍ജിനിയറായി ജോലി നോക്കിയിരുന്ന വിഷ്ണുവിന് അന്ന് നാട്ടിലെത്താനായില്ല.
എന്നാല്‍ പള്ളിയോടത്തെ സംബന്ധിച്ച് എല്ലാകാര്യങ്ങളും രാജീവിനോട് ഫോണില്‍ വിളിച്ച് വിഷ്ണു തിരക്കുന്നുണ്ടായിരുന്നു. ഞായറാഴ്ചത്തെ വള്ളസദ്യയില്‍ പങ്കെടുക്കാന്‍ ശനിയാഴ്ച രാത്രിയോടെ വിഷ്ണു ചെങ്ങന്നൂരിലെ വീട്ടിലെത്തി.
ഞായറാഴ്ച കസവുമുണ്ടും നേരിയതും അണിഞ്ഞ് ഉല്ലാസവാനായാണ് വിഷ്ണു വീട്ടില്‍ നിന്നും ഇറങ്ങിയത്. 17ന് രാവിലെ പള്ളിയോടത്തില്‍ പാടിത്തുഴഞ്ഞ് വള്ളസദ്യക്കായി ക്ഷേത്രക്കടവിലേക്ക് പോകും വഴിയാണ് പള്ളിയോടം മറിഞ്ഞുണ്ടായ ദുരന്തത്തില്‍ ഇരുവരും മരിച്ചത്.
പ്രതികരിക്കാൻ ഇവിടെ എഴുതുക: