പന്തളം മെഡിക്കല്‍ മിഷന്‍ പോസ്റ്റാഫീസ് പ്രവര്‍ത്തനം അവസാനിപ്പിക്കുന്നു

പത്തനംതിട്ട: പന്തളം മെഡിക്കല്‍ മിഷന്‍ പോസ്റ്റാഫീസ് പ്രവര്‍ത്തനം അവസാനിപ്പിക്കുന്നു. പ്രവര്‍ത്തം അവസാനിപ്പിക്കണമെന്നാവശ്യപ്പെട്ട് എന്‍.എസ്.എസ് ജനറല്‍ സെക്രട്ടറി ജില്ലാ പോസ്റ്റല്‍ സൂപ്രണ്ടിന് രേഖാമൂലം കത്ത് നല്‍കി. 1975 ല്‍ പ്രവര്‍ത്തനം ആരംഭിച്ച പോസ്റ്റാഫീസ് 41 വര്‍ഷമായി ആശുപത്രി വളപ്പില്‍ പ്രത്യേക കെട്ടിടത്തില്‍ പ്രവര്‍ത്തിച്ചുവരുകയാണ്. ആശുപത്രിയുടെ പ്രവര്‍ത്തനം തുടങ്ങിയ കാലത്ത് സമീപത്തെ ഒന്നിലധികം സ്ഥാപനങ്ങള്‍ പോസ്റ്റാഫീസ് വേണമെന്നാവശ്യപ്പെട്ടപ്പോള്‍ വിട്ടുകൊടുക്കാതെ നിര്‍ബന്ധമായി കൈകലാക്കിയതാണ് എന്ന ആക്ഷേപമുണ്ട്. സാങ്കേതിക വളര്‍ച്ച ഇല്ലാതിരുന്ന കാലഘട്ടത്തില്‍ ആശുപത്രി ജീവനക്കാര്‍ക്കും, ഡോക്‌ടേഴിസിനും ആശുപത്രിയ്‌ക്കും ഈ സ്ഥാപനം ആവശ്യമായിരുന്നു. ഇന്ന് വാര്‍ത്താ വിനിമയം വിരല്‍തുമ്പിലായപ്പോള്‍ നിഷ്‌ക്കരുണം തള്ളികളയുകയാണ് ഈ സ്ഥാപനത്തെ. ഒരു ഇ.ഡി ജീവനക്കാരിയും പോസ്റ്റ്മാസറ്ററും അടങ്ങുന്ന രണ്ട് വനിതകളാണ് ജീവനക്കാരയിട്ടുള്ളത്. ആശുപത്രിയുടെ ആവശ്യത്തിലേക്ക് തുടങ്ങിയെങ്കിലും ക്രമേണ പൊതുജനങ്ങളുടെ സ്ഥാപനമായി മാറുകയായിരുന്നു. അമ്പതോളം വനിതകള്‍ ഈ ആഫീസ് മൂലം ജീവിച്ചുപോകുന്നു. 2312 ആര്‍.ടി അക്കൗണ്ട് 10000 എസ്.ഡി അക്കൗണ്ട് 100 ല്‍ പരം ഇന്‍ഷുറന്‍സ് പദ്ധതിയില്‍ ചേര്‍ന്നവര്‍ ഒരുകോടിയില്‍പരം രൂപയുടെ സമ്പാദ്യം. ഈ സ്ഥാപനം നിലനിര്‍ത്താന്‍ പെടാപാടുപെടുകയാണ് ജീവനക്കാര്‍. എന്‍.എസ്.എസ് അധികാരികള്‍ കെട്ടിടം ഒഴിയണമെന്നാവശ്യപ്പെട്ടപ്പോള്‍ പകരം കെട്ടിട്ടം കണ്ടെത്തുന്നതിനോ ഈ സ്ഥാപനം നിലനിര്‍ത്തുന്നതിനോ തയ്യാറാകാതെ പോസ്റ്റല്‍ സൂപ്രണ്ട് പോസ്റ്റ്മാസറ്റര്‍ ജനറലിന് പരാതി ഫോര്‍വേഡ് ചെയ്യുകമാത്രമാണുണ്ടായത്. മെഡിക്കല്‍മിഷന്‍ പരിസരത്ത് തന്നെ പോസ്റ്റാഫീസ് പ്രവര്‍ത്തനം തുടരണമെന്ന് ആര്‍.ഡി.കളക്ഷന്‍ ഏജന്റ്മാര്‍ ആവശ്യപ്പെട്ടു. അവര്‍ തങ്ങളുടെ ഉപജീവനം നഷ്ടപ്പെടുമെന്ന ആശങ്കയിലാണ്. പോസ്റ്റാഫീസ് നഷ്ടപ്പെടുന്നതിനെതിരെ ശക്തമായ സമരപരിപാടികളുമായി ജനപക്ഷ മുന്നണി രംഗത്ത് വന്നിട്ടുണ്ട്. ആശുപത്രി അധികാരികള്‍ക്ക് വാടക കൂട്ടികൊടുക്കുന്നതിനും ഇപ്പോള്‍ നില്‍ക്കുന്ന സ്ഥലത്ത് നിന്നും ഒഴിഞ്ഞ ഭാഗത്തേക്ക് മാറിയ ഒരു സ്ഥലത്തേക്ക് പ്രവര്‍ത്തനം തുടരാന്‍ അനുവദിക്കണമെന്ന് പോസ്റ്റ്മാസ്റ്ററും ആവശ്യപ്പെടുന്നു. ലക്ഷങ്ങള്‍ വിലമതിക്കുന്ന സ്ഥലത്ത് അന്‍പത് രൂപാ വാടകയ്‌ക്കാണ് പോസ്റ്റാഫീസ് ഇപ്പോള്‍ പ്രവര്‍ത്തിക്കുന്നത്.