ഇടുക്കി: ജില്ലയില് കഞ്ഞിക്കുഴി ഗ്രാമപഞ്ചായത്തില് നടപ്പാക്കുന്ന സന്സദ് ആദര്ശ് ഗ്രാം യോജന പദ്ധതി നിര്വഹണം കാര്യമായി നടക്കുന്നില്ലെന്ന് ആക്ഷേപങ്ങള്ക്കിടെ പദ്ധതിയെക്കുറിച്ച് വിലയിരുത്താന് യോഗം ചേര്ന്നു. ജോയിസ് ജോര്ജ് എം.പി കഞ്ഞിക്കുഴി പഞ്ചായത്തിനെയാണ് പ്രധാന മന്ത്രിയുടെ അഭ്യര്ത്ഥന മാനിച്ച് ദത്തെടുത്തിരുന്നത്. ദത്തെടുക്കല് പ്രഖ്യാപനം നടത്തിയതല്ലാതെ പഞ്ചായത്തില് വികസനമുന്നേറ്റം നടത്താന് എം.പിക്ക് കഴിഞ്ഞില്ല. ഇത് ജന്മഭൂമി വാര്ത്തയാക്കിയിരുന്നു. ഇതേത്തുടര്ന്നാണ് പദ്ധതി കുറ്റമറ്റതാക്കിത്തീര്ക്കാന് മുഴുവന് നിര്വഹണ ഉദ്യോഗസ്ഥരും പ്രത്യേകം ശ്രദ്ധിക്കണമെന്ന് ജോയ്സ് ജോര്ജ്ജ് എം.പി യോഗം വിളിച്ച് ആവശ്യപ്പെട്ടത്. പദ്ധതിയുടെ പൂര്ണ്ണ പ്രയോജനം ജനങ്ങള്ക്ക് ലഭിക്കുന്നതിന് വിവിധ വകുപ്പുകള് തമ്മിലുള്ള ഏകോപനം ഉറപ്പുവരുത്തുന്നതിനും നിര്വഹണ രംഗത്തെ പ്രായോഗിക ബുദ്ധിമുട്ടുകള് പരിഹരിക്കുന്നതിനും നിര്വഹണ ഉദ്യോഗസ്ഥര് തമ്മില് ആശയ വിനിമയം നടത്തണമെന്ന് എം.പി യോഗത്തില് നിര്ദ്ദേശിച്ചു മറ്റു വകുപ്പുകളില് നിന്നുള്ള സഹകരണം ആവശ്യത്തിന് ലഭ്യമാകുന്നില്ല എന്ന പരാതികള് ഉണ്ടാകരുതെന്നും എം.പി നിര്ദ്ദേശിച്ചു.പദ്ധതി പുരോഗതി സമഗ്രതയില് വിലയിരുത്തുന്നതിന് ജോയിന്റ് പ്രോഗ്രാം കോ ഓര്ഡിനേറ്ററുടെ നേതൃത്വത്തില് പരിശോധനയും വിലയിരുത്തലും നടത്താനും നിര്ദ്ദേശം നല്കി. പദ്ധതിയുടെ പ്രയോജനം ജനങ്ങള്ക്ക് എത്രത്തോളം ലഭ്യമായിട്ടുണ്ട് എന്ന് മനസ്സിലാക്കുന്നതിന് നേരിട്ടുള്ള വിലയിരുത്തലും ഉണ്ടാകും. പദ്ധതിയുമായി ബന്ധപ്പെട്ട വകുപ്പു തലവന്മാര് തന്നെ നിര്വഹണ പുരോഗതി വിലയിരുത്തുകയും പോരായ്മകള് പരിഹരിക്കാന് തുടര് നടപടി സ്വീകരിക്കുകയും വേണമെന്ന് അവലോകന യോഗത്തില് അധ്യക്ഷത വഹിച്ച ജില്ലാകളക്ടര് ഡോ.എ. കൗശിഗന് നിര്ദ്ദേശിച്ചു.
കഞ്ഞിക്കുഴി ഗ്രാമപഞ്ചായത്ത് പ്രസിഡന്റ് ഷീബ ജയന്, ജോയിന്റ് പ്രോഗ്രാം കോഓര്ഡിനേറ്റര് എ.വി. അശോക് കുമാര്, അസി. പ്രോജക്ട് ഓഫീസര് സഫിയ ബീവി, ഗ്രാമപഞ്ചായത്തംഗങ്ങള്, വിവിധ വകുപ്പുകളിലെ ഉദ്യോഗസ്ഥര് തുടങ്ങിയവര് പങ്കെടുത്തു.
