ആലുവ: വാടകക്കാരെ ഒഴിപ്പിക്കാന് കോടതി നിര്ദ്ദേശം മറികടന്ന് ജെസിബി ഉപയോഗിച്ച് ഉടമ കെട്ടിടം തകര്ക്കുകയും കടകളിലെ സാധന സാമഗ്രികള് നശിപ്പിക്കുകയും ചെയ്തു. ഇതിനിടെ പണം മോഷ്ടിച്ചതായും ആക്ഷേപമുണ്ട്. പോലീസ് ഒത്താശയോടെയാണ് കെട്ടിടയുടമ അതിക്രമം നടത്തിയതെന്ന് വാടക്കാര് ആക്ഷേപിച്ചു.
ശനിയാഴ്ച്ച അര്ദ്ധരാത്രി ആലുവ മിനി സിവില് സ്റ്റേഷന് റോഡില് പങ്കജം കവലയിലെ പഴക്കം ചെന്ന ഓടുമേഞ്ഞ ഇരുനില കെട്ടിടമാണ് തകര്ത്തത്. കെട്ടിടത്തില് 32 വര്ഷമായി പ്രവര്ത്തിക്കുന്ന ഹോട്ടല്, 18 വര്ഷമായി പ്രവര്ത്തിക്കുന്ന സ്റ്റേഷനറി കട, ഗോഡൗണ് എന്നിവയാണ് നശിപ്പിച്ചത്. മുന് കെട്ടിട ഉടമയും നിലവില് ഉടമയും ചേര്ന്നാണ് അതിക്രമം നടത്തിയതെന്നാണ് ആക്ഷേപം. മാര്ച്ച് 30ന് സമാനമായ രീതിയില് ഹോട്ടല് ജെസിബി ഉപയോഗിച്ച് ഭാഗീകമായി തകര്ത്തിരുന്നു. ഇതിനെതിരെ ആലുവ പോലീസ് കേസെടുക്കുകയും ഹോട്ടല് ഉടമ ഉളിയന്നൂര് ചുമത്തകത്തൂട്ട് ഇബ്രാഹിം ആലുവ ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതിയില് നിന്നും അനുകൂല ഉത്തരവും സമ്പാദിച്ചു.
കെട്ടിടത്തില് അതിക്രമിച്ച് കയറരുതെന്നായിരുന്നു ഉത്തരവ്. ഈ ഉത്തരവ് നിലനില്ക്കേയാണ് കെട്ടിട ഉടമയുടെ നേതൃത്വത്തില് വീണ്ടും കെട്ടിടം പൊളിക്കാന് ശ്രമം നടന്നത്.
ഹോട്ടലിലെ ചില്ല് അലമാര, മേശ, കസേര, പാത്രങ്ങള് എന്നിവയെല്ലാം നശിച്ചു. സ്റ്റേഷനറി കടയിലും നാശനഷ്ടമുണ്ടായി. ഗോഡൗണ് കാലിയായിരുന്നതിനാല് മറ്റ് നഷ്ടമില്ല. ഹോട്ടലില് നിന്നും സ്റ്റേഷനറി കടയില് നിന്നുമായി 5000 രൂപയോളം മോഷണം പോയതായിട്ടാണ് പരാതി. ആലുവ ശങ്കരംകുഴി വീട്ടില് ഷുക്കൂറിന്റെ ഉടമസ്ഥതയിലായിരുന്ന കെട്ടിടം അടുത്തിടെ സൗത്ത് വാഴക്കുളം അരിമ്പാശേരി വീട്ടില് ഷിഹാബിന് വിറ്റിരുന്നു. കെട്ടിടത്തിലെ വാടക്കാരെ ഒഴിപ്പിച്ച് നല്കാമെന്ന വാഗ്ദാവും ഷുക്കൂര് നല്കിയിരുന്നു. ഇതിന്റെ ഭാഗമായിട്ടാണ് രണ്ട് തവണയും രാത്രിയുടെ മറവില് ജെസിബി ഉപയോഗിച്ച് പൊളിക്കാന് ശ്രമം നടന്നത്. ആദ്യം പൊളിക്കാന് ശ്രമം നടന്നപ്പോള് പോലീസ് വാടകക്കാര്ക്ക് അനുകൂല നിലപാടാണ് സ്വീകരിച്ചതെങ്കിലും പിന്നീട് മറുകണ്ടം ചാടിയതായും വാടകക്കാര് ആരോപിച്ചു.
