പുനലൂര്: പട്ടണത്തില് ദേശീയപാതയോരത്തെ ഓട തെളിക്കല് ജോലികള് അധികൃതര് പാതിവഴിയില് ഉപേക്ഷിച്ചു. ഓടകള് തെളിക്കാനും മാലിന്യങ്ങള് നീക്കം ചെയ്യാനുമായി ഇളക്കിയ കോണ്ക്രീറ്റ് സ്ലാബുകള് പുനസ്ഥാപിക്കാത്തത് വ്യാപാരികള്ക്കും വഴിയാത്രകാര്ക്കും വാഹനയാത്രക്കാര്ക്കും ഒരുപോലെ ബുദ്ധിമുട്ടുണ്ടാക്കുന്നു.
ദേശീയപാതയോരത്ത് ഉടനീളം നടന്നിട്ടുള്ള കയ്യേറ്റങ്ങളെത്തുടര്ന്ന് ഓടതെളിക്കല് ജോലികള് കുറെ നാളുകളായി എന്എച്ച് അധികൃതര് നടത്താതിരുന്നത് മഴക്കാലത്ത് ഓടയിലൂടെ വെള്ളം ഒഴുകാത്തതിനാല് റോഡില് വെള്ളക്കെട്ടുണ്ടാകുന്നത് പതിവായിരുന്നു. മാലിനജലം കെട്ടിക്കിടന്ന് ദുര്ഗന്ധവും വമിച്ചു. പുനലൂരില് മന്ത്രി കെ.രാജു എന്എച്ച്, പിഡബ്ല്യൂഡി ഉദ്യോഗസ്ഥരുടെയും ജനപ്രതിനിധികളുടെയും യോഗം വിളിച്ചുചേര്ത്തപ്പോള് പുനലൂര് പട്ടണത്തിലെ ഓടകള് ശുചീകരിച്ച് സ്ലാബുകള് സ്ഥാപിക്കണമെന്ന് മുന്സിപ്പല് ചെയര്മാന് എം.എ.രാജഗോപാല് ആവശ്യപ്പെട്ടിരുന്നു. തുടര്ന്നാണ് പുനലൂര് എന്എച്ച് സെക്ഷന് പരിധിയില് ഓട തെളിക്കല് ജോലികള് ആരംഭിച്ചത്. പകല് സമയം ഗതാഗതത്തെ ബാധിക്കുമെന്നതിനാല് രാത്രിയാണ് ഓട തെളിക്കല് നടത്തിവന്നത്. മണ്ണുമാന്തി യന്ത്രവുപയോഗിച്ച് സ്ലാബുകള് നീക്കിയ ശേഷം ഓടയിലെ മാലിന്യം നീക്കം ചെയ്തു വരുകയായിരുന്നു. ഓടയും കവിഞ്ഞ് ടാര് റോഡില് അനധികൃതമായി നിരവധി സ്ഥാപനങ്ങള് നിര്മ്മാണപ്രവര്ത്തനങ്ങള് നടത്തിയിരുന്നു. ഓട തെളിക്കാന് ഇവ നീക്കം ചെയ്യാന് ശ്രമിച്ചത് ചില വ്യാപാരികള് എതിര്ത്തു. ചില വ്യാപാരസ്ഥാപനങ്ങളുടെ പടവുകള് വരെ ഓടയുടെ മുകളിലാണ് നിര്മ്മിച്ചിട്ടുള്ളത്. രണ്ട് ദിവസം ഓട തെളിക്കല് നടത്തിയ എന്എച്ച് അധികൃതര് പണികള് പാതിവഴിയില് ഉപേക്ഷിച്ച നിലയിലാണ്.
പട്ടണത്തിലെ ചില വ്യാപാരികളും സ്ഥാപന ഉടമകളും അനധികൃത കയ്യേറ്റം പൊളിക്കാന് നേതൃത്വം നല്കിയ എന്എച്ച് ഉദ്യോഗസ്ഥരെ ഭീഷണിപ്പെടുത്തിയതായാണ് സൂചന. ഇതൊടെ അധികൃതര് പണികള് നിര്ത്തി. ജനങ്ങളാണ് ഇതുമൂലം വലയുന്നത്. ആളുകള്ക്ക് കടകളിലേക്ക് കയറാന് കഴിയാത്തവിധം റോഡരികില് അപകടകുഴികളാണിപ്പോള്. കാല്നട യാത്രക്കാരും സ്കൂള്കുട്ടികളും ഓടയില് വീണ് പരിക്കേറ്റ സംഭവം വരെയുണ്ടായി. എന്നിട്ടും ഓടകളുടെ ശുചികരണ ജോലികള് പുനരാരംഭിക്കുവാനും സ്ലാബ് സ്ഥാപിക്കാനും അധികൃതര് മടിക്കുന്നത് ദുരൂഹമാണ്. വ്യാപാരികളില് ചിലര് ഭീഷണിപ്പെടുത്തിയെന്ന് കാണിച്ച് ഇവര് പോലീസില് പരാതി നല്കുവാനും തയാറായില്ല. പൊതുജനങ്ങള്ക്കും വ്യാപാരികള്ക്കും ഒരുപോലെ ബുദ്ധുമുട്ടുണ്ടാകും വിധം ഓടതെളിക്കലും സ്ലാബ് സ്ഥാപിക്കലും അധികൃതര് പാതിവഴിയില് നിര്ത്തിയിരിക്കുന്നതിന് പിന്നില് ഒത്തുകളിയാണെന്ന് ആരോപണം ശക്തമാണ്.
