കോഴിക്കോട്: അനധികൃത മണല്ക്കടത്തിലും മറ്റുമായി കോഴിക്കോട് താലൂക്കിലെ വിവിധ പോലീസ് സ്റ്റേഷനുകളില് കസ്റ്റഡിയിലെടുത്ത വാഹനങ്ങള് ലേലം ചെയ്ത് സര്ക്കാറിലേക്ക് മുതല് കൂട്ടണമെന്ന് താലൂക്ക് വികസന സമിതി യോഗം ആവശ്യപ്പെട്ടു. ഗതാഗത തടസ്സം സൃഷ്ടിക്കുന്ന തരത്തില് റോഡരികില് പാര്ക്ക് ചെയ്തിട്ടുള്ള ഈ വാഹനങ്ങള് ജനങ്ങള്ക്ക് ഏറെ ബുദ്ധിമുട്ടുണ്ടാക്കുന്നുണ്ട്.
തലക്കൂളത്തൂര് പഞ്ചായത്തില് കോരാമ്പ്ര മീത്തല് 4 സെന്റ് ഭൂമിയില് വര്ഷങ്ങള്ക്കുമുമ്പ് പതിച്ചു കിട്ടിയ സ്ഥലത്തിന് പട്ടയം ലഭിച്ചില്ലെന്ന കോരമ്പ്ര മീത്തല് പ്രസാദ് എന്നവരുടെ പരാതിയില് തലക്കൂളത്തൂര് പഞ്ചായത്ത് സെക്രട്ടറിയില് നിന്ന് റിപ്പോര്ട്ട് തേടും. മാവൂര്-മെഡിക്കല് കോളേജ് വഴി സിവില് സ്റ്റേഷനിലേക്ക് രാവിലെയും വൈകിട്ടും കെ.എസ്.ആര്.ടി.സി ബസ് റൂട്ട് അനുവദിക്കണമെന്നും യോഗം ആവശ്യപ്പെട്ടു.
എന്.സി.പി ജനറല് സെക്രട്ടറി കെ.കൃഷ്ണന്കുട്ടി അദ്ധ്യക്ഷത വഹിച്ചു. ടി.മുഹമ്മദലി, സി.എന് ശിവദാസന്, അഡീഷണല് തഹസില്ദാര് കെ. ബാലന് സംസാരിച്ചു.
