മട്ടാഞ്ചേരി: തിരുവിതാംകൂര് രാജാവിന്റെ നാമധേയ വായനശാലയ്ക്ക് 25 വയസ്സ്. അമരാവതി എസ്.എസ്. കൃഷ്ണന് റോഡിലെ ശ്രീ ചിത്തിര തിരുനാള് വായനശാല ജൂബിലി ആഘോഷത്തിനൊരുങ്ങുകയാണ്. 90കളുടെ തുടക്കത്തില് ഒത്തു കൂടിയ യുവാക്കളുടെ സഹകരണത്തോടെ രൂപീകൃതമായ വായനശാല 25വര്ഷത്തിലെത്തുമ്പോള് അതിനെ ജനകീയാഘോഷമാക്കുവാനൊരുങ്ങുകയാണ് ഭാരവാഹികളും അംഗങ്ങളും.
പത്രവായനയ്ക്ക് സൗകര്യമൊരുക്കി തുടങ്ങിയ വായനശാല യോഗത്തിലാണ് തീപ്പെട്ട തിരുവിതാംകൂര് രാജാവിന്റെ നാമധേയമിടാന് തീരുമാനമായത്. പത്രങ്ങള്ക്കൊപ്പം മാസികകളും വായനക്കൊരുക്കി മത്സരങ്ങളും സേവനങ്ങളും നടത്തി ചിത്തിര തിരുനാള് വായനശാല ജനഅംഗീകാരവും നഗരസഭയുടെ സമ്മതിപത്രവും ഏറ്റുവാങ്ങി.
സ്വാതന്ത്രദിനത്തില് ജൂബിലി ആഘോഷമൊരുക്കുന്ന ശ്രീ ചിത്തിര തിരുനാള് വായനശാലയെ നയിക്കുന്നത് എം.എസ്. സതീശന് പ്രസിഡന്റും പി. രവീന്ദ്രന് സെക്രട്ടറിയും പി.ആര്. പ്രസാദ് ട്രഷററുമായ ഭരണ സമിതിയാണ്. അന്പതോളം അംഗങ്ങളും പ്രതിദിനം 100ല് ഏറെ വായനക്കാരുമെത്തുന്ന വായനശാല രൂപീകരണത്തിന് മുന്നിരയിലുള്ള ആദ്യ കാല ഭരണ കര്ത്താക്കളായ രവീന്ദ്രനും സതീശനുമാണ് ജൂബിലി ആഘോഷവര്ഷത്തിലും നേതൃത്വം നല്കുന്നത്.
