തനത് നാടകവേദിയോട് വിടപറഞ്ഞ നാടകാചാര്യന് കാവാലം നാരായണപണിക്കരുമായി വളരെക്കാലത്തെ ആത്മബന്ധമായിരുന്നു ഉണ്ടായിരുന്നത്. കാവാലത്തും തിരുവനന്തപുരത്തും ഒരുമിച്ചുണ്ടായിരുന്നുവെങ്കിലും രണ്ടുപേരുടേയും പ്രവര്ത്തന മേഖല വ്യത്യസ്തമായിരുന്നു. അദ്ദേഹം കവിതയും നാടകവുമായി മുന്നോട്ടുപോയപ്പോള് എനിക്ക് കഥയെഴുത്തായിരുന്നു.
വളരെ ചെറുപ്പത്തിലേ കവിതാരചനയിലേക്ക് പ്രവേശിച്ചയാളാണ് കാവാലം നാരായണപ്പണിക്കര്.
സി.എന്. ശ്രീകണ്ഠന് നായര് തനത് നാടകപ്രസ്ഥാനത്തിന് തുടക്കം കുറിച്ചപ്പോള് അദ്ദേഹം അതുമായി സഹകരിച്ചു തുടങ്ങി. പഴയകാല നാടകങ്ങളുമായി ബന്ധിപ്പിച്ചുകൊണ്ടുള്ള നാടകശാഖയായിരുന്നു അത്.
പലരും അതില് നിന്നും വിട്ടുപോയെങ്കിലും കാവാലം അതുമായി മുന്നോട്ടുപോവുകയായിരുന്നു. നല്ലൊരു സംവിധായകനായിരുന്നു അദ്ദേഹം. കാളിദാസന്റേയും ഭാസന്റേയും നാടകങ്ങള് അനായാസമായ അഭിനയകുശലതയോടെ രംഗത്ത് അവതരിപ്പിച്ചു. അതല്ലാതെയും അദ്ദേഹം നാടകങ്ങളെഴുതി. അത്തരത്തില് ആദ്യമായി അവതരിപ്പിച്ച അവനവന് കടമ്പ എന്ന നാടകം എടുത്തുപറയേണ്ടതാണ്. അതെല്ലാം വന് വിജയവുമായിരുന്നു.
സൗമ്യവ്യക്തിത്വമായിരുന്നു കാവാലത്തെ വ്യത്യസ്തനാക്കുന്നത്. കുലീനതയായിരുന്നു പെരുമാറ്റത്തിന്റെ സവിശേഷത. സംഗീതത്തിലും സാഹിത്യത്തിലും ഒരുപോലെ കഴിവ് തെളിയിച്ച വ്യക്തിയായിരുന്നു കാവാലം നാരായണപ്പണിക്കര്. അദ്ദേഹത്തെക്കാള് ആറ് വയസിന്റെ ഇളപ്പമുണ്ട് എനിക്ക്.
നാടകരംഗത്ത് പുതുശൈലി കൊണ്ടുവന്നയാളായിരുന്നു. ശരിക്കും പറഞ്ഞാല് ഒരു ഒറ്റയാന്. അദ്ദേഹത്തിന്റെ വിയോഗം വ്യക്തിപരമായും തീരാത്ത നഷ്ടമാണ്. കൊച്ചിയില് മകളോടൊത്താണ് ഇപ്പോള് എന്റെ താമസം. പ്രിയസുഹൃത്തിന്റെ ഭൗതികദേഹം കാവാലത്ത് കൊണ്ടുവരുമ്പോള് ചെല്ലണം, പ്രണാമം അര്പ്പിക്കണം.
