പള്ളുരുത്തി: ജീവിക്കൂ…ജീവിക്കാന് അനുവദിക്കൂ എന്ന സന്ദേശം ഉയര്ത്തി കാല്നടയാത്രികരായി മൂന്ന് ജൈന് സന്യാസിമാര് കൊച്ചിയിലെത്തി. രാജസ്ഥാനിലെ അജ്മീരില്നിന്നും യാത്ര പുറപ്പെട്ട സംഘം കഴിഞ്ഞ ഏതാനും ദിവസങ്ങളായി കൊച്ചിയിലുണ്ട്.
അറുപത് വയസുള്ള സൗമ്യപ്രഭശ്രീജി, 45 വയസുള്ള സൗമ്യശ്രീദര്ശന ശ്രീജി, 32 വയസുള്ള അക്ഷയ് ദര്ശന ശ്രീജി എന്നിവരാണ് ജൈന് വിശ്വാസികളുടെ അകമ്പടിയോടെ ഭാരതപര്യടനം നടത്തുന്നത്. വിവിധ കാലഘട്ടങ്ങളില് സന്യാസദീക്ഷ സ്വീകരിച്ചവരാണിവര്. അഹിംസാതത്വങ്ങളില് അടിയുറച്ച് ജീവിക്കുകയും വിശ്വസിക്കുകയും ചെയ്യുന്ന ഇവര് ചാതുര്മാസം അവസാനിക്കുന്ന കാലഘട്ടം വരെ ഇനി കൊച്ചിയിലുണ്ടാകും. എറണാകുളം ജൈന് ക്ഷേത്രത്തിലാണ് ഇവരുടെ വിശ്രമം.
രാജ്യത്തുടനീളം അഹിംസാസന്ദേശം ഉയര്ത്തി പ്രചാരണം നടത്തുന്ന ആയിരക്കണക്കിന് സംഘങ്ങളില് ഒന്നാണിത്. ഏറെ പ്രത്യേകതകള് നിറഞ്ഞ ജീവിതരീതി പിന്തുടരുന്ന ഇവര് നടക്കുമ്പോള് വെള്ളത്തിലോ പുല്ലിലോ ചവിട്ടാറില്ല. മനസുകൊണ്ടോ വചനംകൊണ്ടോ കര്മ്മംകൊണ്ടോ തെറ്റുകള് ചെയ്യില്ലെന്ന കഠിനപ്രതിജ്ഞ ചെയ്ത് ജീവിച്ച് തെളിയിക്കുകകൂടിയാണിവര്. ഈ പ്രയാണത്തിനിടെ കേരളത്തില് ആദ്യമായാണ് ഇവര് എത്തിച്ചേര്ന്നിരിക്കുന്നത്. ജീവന്റെ അവസാനതുടിപ്പുവരെ അഹിംസാതത്വം പ്രചരിപ്പിക്കുക എന്ന ലക്ഷ്യത്തോടെയാണ് ഇവരുടെ പ്രയാണം. ഒരു ദിനം 15 മുതല് ഇരുപത് കിലോമീറ്റര്വരെ കാല്നട യാത്ര നടത്തുന്ന ഇവരുടെ ജീവിതനിഷ്ഠയും അടിയുറച്ച അഹിംസാതത്വംതന്നെ.
