കെ.എസ് സതീഷ്
കുമളി: അധികാരത്തിലിരുന്ന നാളുകളില് മുല്ലപ്പെരിയാര് വിഷയത്തില് സംസ്ഥാനത്തിന്റെ താല്പര്യങ്ങള് സംരക്ഷിക്കുന്നതില് പരാജയപെട്ട യുഡിഫ് ഭരണം നഷ്ടപെട്ടതോടെ നിലപാട് മാറ്റുന്നു.മുല്ലപ്പെരിയാര് സമരം ശക്തമായി നിലനിര്ത്തിക്കൊണ്ട് രാഷ്ട്രീയ മുതലെടുപ്പിന് തയ്യാറെടുക്കുകയാണ് കോണ്ഗ്രസ്. ഇന്നലെ വണ്ടിപ്പെരിയാറില് യുഡിഎഫ് സംഘടിപ്പിച്ച ഉപവാസ സമരം ഇതിന്റെ സൂചനയാണ് നല്കുന്നത്. ഭരണത്തിലിരുന്ന സമയത്ത് ഉത്തരവാദിത്വപ്പെട്ട മന്ത്രി തന്നെ പെരിയാര് തീരദേശത്തെ ജനങ്ങളെ ആശങ്കപ്പെടുത്തുന്ന തരത്തില് പ്രസ്താവന നടത്തിയതല്ലാതെ മുല്ലപെരിയാര് പ്രശ്നം പരിഹരിക്കാന് കഴിയുന്ന ഒരു നടപടിയും കൈക്കൊണ്ടില്ല. അക്കാലത്തു മന്ത്രിയുടെ വാക്കുകള് ഉയര്ത്തിക്കാട്ടി പ്രതിപക്ഷ നേതാവായിരുന്ന വി എസ് അച്യുതാനന്ദന്റെ നേതൃത്വത്തില് ദിവസങ്ങള് നീളുന്ന സമരങ്ങളാണ് സി പിഎം സംഘടിപ്പിച്ചത്. എന്നാല് തമിഴ്നാട് സര്ക്കാര് അവരുടെ വാദഗതികള് സ്ഥാപിച്ചെടുക്കാന് ആവശ്യമായ തരത്തില് കോടതിയില് ഉള്പ്പെടെ നിലപാട് സ്വീകരിക്കുകയും അതില് വിജയിക്കുകയും ചെയ്തിരുന്നു. വര്ഷങ്ങളായി ഇടത്-വലതു മുന്നണികള് ഈ വിഷയത്തില് ഇതേ സമീപനമാണ് സ്വീകരിക്കുന്നതെന്ന അഭിപ്രായമാണ് പെരിയാര് തീരത്തെ സാധാരണ ജനങ്ങള് പങ്കുവയ്ക്കുന്നത്. പാര്ട്ടികളുടെ രാഷ്ട്രീയ നേട്ടമല്ല തങ്ങളുടെ ജീവനും സ്വത്തിനും സുരക്ഷാ ഉറപ്പുവരുത്തുന്ന ശാശ്വത പരിഹാരമാണ് തങ്ങള് ആവശ്യപ്പെടുന്നതെന്ന് അവര് പറയുന്നു. ഹൈറേഞ്ച് സംരക്ഷണ സമിതി മുല്ലപ്പെരിയാര് വിഷയത്തില് ഇപ്പോള് ഇടത്പക്ഷം സ്വീകരിച്ചിരിക്കുന്ന നിലപാടില് പ്രതികരിച്ചിട്ടുമില്ല.കര്ഷകര്ക്കൊപ്പം നില്ക്കുമെന്ന് പ്രഖ്യാപിച്ച ജനാധിപത്യ കേരള കോണ്ഗ്രസിനും മിണ്ടാട്ടം മുട്ടിയിരിക്കുകയാണ്.
