കണ്ണൂര്: വിദേശരാജ്യങ്ങളിലുള്ളതുപോലുള്ള പരിസ്ഥിതി അവബോധം നമ്മളിലും ഉണ്ടാകേണ്ടതുണ്ടെന്നും അതിനായി പരിസ്ഥിതി സംബന്ധിയായ സെമിനാറുകളും തുടര്ച്ചയായ ബോധവല്ക്കരണവും ആവശ്യമാണെന്നും കണ്ണൂര് സര്വ്വകലാശാല വൈസ് ചാന്സല് ഡോ.എം.കെ.അബ്ദുള് ഖാദര് അഭിപ്രായപ്പെട്ടു. ലോക പരിസ്ഥിതി ദിനത്തോടനുബന്ധിച്ച് നടന്ന സെമിനാര് ഉദ്ഘാടനം ചെയ്ത് സംസാരിക്കുകുയായിരുന്നു അദ്ദേഹം. പരിസ്ഥിതി സംരക്ഷണ സംബന്ധിയായ പ്രവര്ത്തനങ്ങള് തുടര്ച്ചയായി കൊണ്ടുപോകേണ്ടതുണ്ട്. അല്ലെങ്കില് കുപ്പിവെള്ളംപോലെ വായുവും വിലകൊടുത്തുവാങ്ങേണ്ട അവസ്ഥയില് ചെന്നെത്തും. സര്വ്വകലാശാല കാമ്പസുകള് സൗരോര്ജ്ജവല്ക്കരിക്കാനുള്ള പദ്ധതി ഗൗരവമായ ആലോചനയിലാണെന്നും പൂര്ണ്ണമായും സൗരോര്ജ്ജംകൊണ്ടു പ്രവര്ത്തിക്കുന്ന ആദ്യ സര്വ്വകലാശാലയാക്കി കണ്ണൂര് സര്വ്വകലാശാലയെ മാറ്റുകയാണ് ലക്ഷ്യമെന്നും അദ്ദേഹം പറഞ്ഞു. ചടങ്ങില് പ്രോ.വൈസ് ചാന്സലര് ഡോ.ടി.അശോകന് അധ്യക്ഷത വഹിച്ചു.
പരിസ്ഥിതി നേരിടുന്ന വെല്ലുവിളികളെക്കുറിച്ച് കോഴിക്കോട് ഫോറസ്റ്റ് ഡെപ്യൂട്ടി കണ്സര്വേറ്റര് കെ.വി.ഉത്തമന് ക്ലാസെടുത്തു. മയക്കുമരുന്നു കടത്തുകഴിഞ്ഞാല് ഏറ്റവും കൂടുതല് നിയമവിരുദ്ധ വ്യാപാരം നടക്കുന്നത് വന്യമൃഗങ്ങളടക്കമുള്ള വനസമ്പത്തിലാണെന്ന് അദ്ദേഹം ചൂണ്ടിക്കാട്ടി. നമ്മുടെ ആവാസ വ്യവസ്ഥയിലുണ്ടാകുന്ന ചെറിയ മാറ്റം പോലും ജീവികളെ നിലനില്പിനെ ബാധിക്കുന്നത്. കൂടാതെ വേട്ടയാടലാണ് മറ്റൊരു പ്രധാന കാരണം. 150 വര്ഷം മുമ്പ് ദശലക്ഷക്കണക്കിനുണ്ടായിരുന്ന പാസഞ്ചര് പ്രാവുകള് ക്രമേണ ഇല്ലാതായത് അദ്ദേഹം എടുത്തുകാട്ടി. ലോകത്തിലെ വംശനാശഭീഷണി നേടിരുന്ന സസ്യജന്തുജാലങ്ങളുടെ കാര്യത്തില് ഇന്ത്യക്ക് മൂന്നാം സ്ഥാമാണ്. ഭാരതത്തിലെ വ്യത്യസ്തമായ ആവാസ വ്യവസ്ഥകളില് ജീവിക്കുന്ന ജീവികള്ക്ക് അവയുടെ സ്വാഭാവിക ചുറ്റുപാടുകള് സംരക്ഷിക്കുകയും നിയമവിരുദ്ധമായ പ്രവര്ത്തനങ്ങള് അവസാനിപ്പിക്കുകയും ചെയ്യുകയാണ് അവയെ സംരക്ഷിക്കാനുള്ള പോംവഴി. പശ്ചിമഘട്ടത്തിലെ പാറകള് പൊട്ടിച്ച കടല്ഭിത്തി നിര്മ്മിക്കുമ്പോള് രണ്ട് വിനാശപ്രവര്ത്തികളാണ് നമ്മള് നടത്തുന്നതെന്ന് അദ്ദേഹം സമര്ത്ഥിച്ചു.
തുടര്ന്ന് ക്ലാസ് നയിച്ച ഡോ.ഖലീല് ചൊവ്വ വനനശീകരണത്തിന്റെയും ജിവജാലങ്ങളുടെയും ഭീകരമായ നശീകരണം ചൂണ്ടിക്കാട്ടി. ഇത്തരം പ്രവര്ത്തികള് ശ്രദ്ധയില്പ്പെടുമ്പോള് അത് അധികാരികളുടെ മുന്നില്കൊണ്ടുവരാന് ഓരോ പൗരനും കടമയുണ്ടെന്ന് അദ്ദേഹം ഓര്മ്മിപ്പിച്ചു. സിന്റിക്കേറ്റംഗം ഡോ.മിനി, മിനോജ്, എം.രത്നാകരന്, ദീഷ്ണ പ്രസാദ്, ജയകൃഷ്ണന്, വി.പ്രൊഫസര്, കെ.നാരായണന് എന്നിവര് സംസാരിച്ചു. രജിസ്ട്രാര് ഡോ.ബാലചന്ദ്രന് കീഴോത്ത് സ്വാഗതം പറഞ്ഞു.
