കൂത്തുപറമ്പ്: മാങ്ങാട്ടിടം പഞ്ചായത്തിലെ ശങ്കരനെല്ലൂര് എല്പി സ്കൂളിന് സമീപം ബിജെപി പ്രവര്ത്തകരുടെ വീടുകള്ക്കും വാഹനങ്ങള്ക്കും നേരെ സിപിഎം അക്രമം. കോയിലോട്ടെ ബിജെപി പ്രവര്ത്തകരായ മോനിഷ നിവാസില് മനീഷ്, മാങ്കിക്കുണ്ടം ഹൗസില് രവീന്ദ്രന്, നിഖില് നിവാസില് കാഞ്ഞന് ദിനേശന് എന്നിവരുടെ വീടുകള്ക്ക് നേരെയാണ് ഞായറാഴ്ച രാത്രി 12 മണിയോടെ അക്രമം നടന്നത്. വീടുകളുടെ ജനല്ചില്ലുകള് പൂര്ണ്ണമായും അടിച്ചു തകര്ത്തു. ജനല്ച്ചില്ലുകളുടെ ചീള് തെറിച്ച് മനീഷിന്റെ അമ്മ ഷീജയുടെ മുഖത്ത് പരിക്കേറ്റു.
വീട്ടുമുറ്റത്ത് നിര്ത്തിയിട്ടിരുന്ന മൂന്ന് ബൈക്കുകളും അക്രമി സംഘം തകര്ത്തു. ബോംബെറിഞ്ഞ് ഭീതിപരത്തിയ ശേഷമായിരുന്നു അക്രമം. പ്രദേശത്ത് അക്രമികള് ഉപേക്ഷിച്ച ഒരു നാടന് ബോംബ് പോലീസ് കണ്ടെടുത്തു.
വീടുകള് അക്രമിച്ചതിന് പിന്നില് സിപിഎം സംഘമാണെന്നും യാതൊരു പ്രകോപനവും കൂടാതെ അക്രമം നടത്തി മേഖലയില് സംഘര്ഷം സൃഷ്ടിക്കാനുള്ള സിപിഎം ശ്രമം ജനം തിരിച്ചറിയണമെന്നും മുഴുവന് ജനാധിപത്യ വിശ്വാസികളും അക്രമത്തില് പ്രതിഷേധിക്കണമെന്നും ആര്എസ്എസ് കൂത്തുപറമ്പ് താലൂക്ക് കാര്യകാരി പ്രസ്താവനയിലൂടെ ആവശ്യപ്പെട്ടു. സംഭവം സംബന്ധിച്ച് കൂത്തുപറമ്പ് പോലീസില് പരാതി നല്കി.
