റിങ്ങില് പ്രകടിപ്പിച്ച അതേ ശൗര്യം പുറത്തെ ഇടപെടലുകളിലും മുഹമ്മദലി ആവര്ത്തിച്ചു. താനുള്പ്പെട്ട കറുത്തവര്ഗക്കാര്ക്കെതിരെയുള്ള അവഗണനയിലും പക്ഷപാതത്വത്തിലും ശക്തമായി പ്രതിരോധിക്കാനും അലി തയാറായി. അങ്ങനെയാണ് ബന്ധുക്കളുടെയും സുഹൃത്തുക്കളുടെയുമെല്ലാം എതിര്പ്പ് അവഗണിച്ച് 1964ല് ഇസ്ലാം മതം സ്വീകരിച്ചത്. കാഷ്യസ് ക്ലേ അങ്ങനെ മുഹമ്മദലിയായി.
റോം ഒളിമ്പിക് സ്വര്ണവുമായി ഏറെ പ്രതീക്ഷയോടെ ജന്മനാടായ കെന്റക്കില് തിരിച്ചെത്തിയ മുഹമ്മദാലിക്ക് വര്ണവിവേചനം നടമാടിയിരുന്ന ജന്മദേശത്ത് ലഭിച്ചത് അവഹേളനം മാത്രം. പതിനെട്ടാം വയസില് മനസിലേറ്റ മുറിവ് അലിയുടെ തുടര് ജീവിതത്തിലും വലിയ സ്വാധീനം ചെലുത്തി. ഒളിമ്പിക് മെഡലും കഴുത്തില്തൂക്കി നാട്ടിലുടനീളം നടന്ന അലിയെ ആരും ഗൗനിച്ചുപോലുമില്ല.
ഒരു ദിവസം വെള്ളക്കാര്ക്ക് മാത്രമായി റിസര്വ് ചെയ്തിരുന്ന ഹോട്ടലില് ചെന്ന അലിക്ക് വെയ്റ്റര്മാര് ഭക്ഷണം നല്കിയില്ല. ഒളിമ്പിക്സ് മെഡല് എടുത്തു കാണിച്ചിട്ടും വര്ണവെറിയന്മാര് അവഹേളിച്ചിറക്കി വിട്ടു. നിരാശയോടെ അവിടം വിട്ട ജെഫേഴ്സണ് കൗണ്ടി പാലത്തില് കയറി നിന്ന് മെഡല് ഓഹിയോ നദിയിലേക്കെറിഞ്ഞു. മെഡല് നദിയുടെ ആഴങ്ങളിലേക്കൂളിയിടുന്നത് അഭിമാനത്തോടെയാണ് അദ്ദേഹം നോക്കനിന്നത്. പിന്നീട് തന്റെ ആത്മകഥയില് ഈ സംഭവം അദ്ദേഹം നിരാകരിച്ചു.
എവിടെയോ മറന്നുപോയെന്നാണ് അലി എഴുതിയത്. എന്തായാലും 1996ലെ അറ്റ്ലാന്റ ഒളിമ്പിക്സില് രാജ്യത്തിന്റെ ചരിത്രത്തിലെ ഏറ്റവും മികച്ച കായിക താരത്തെ അമേരിക്ക ആദരിച്ചു. ഓഹിയോയില് വലിച്ചെറിഞ്ഞ മെഡലിനു സമാനമായ മറ്റൊരു മെഡല് ചാര്ത്തി.
പിന്നീടും നിലപാടുകളിലുറച്ച് ശ്രദ്ധേയനായി മുഹമ്മദലി. 1967ല് വിയറ്റ്നാം യുദ്ധം കൊടുമ്പിരി കൊണ്ടിരിക്കെ, അവിടെ നേരിടുന്ന തിരിച്ചടി മറികടക്കാന് രാജ്യത്തെ യുവാക്കളോട് നിര്ബന്ധ സൈനിക സേവനത്തിന് ആവശ്യപ്പട്ടു യുഎസ് സര്ക്കാര്.
പ്രശസ്തിയുടെ കൊടുമുടിയില് നില്ക്കുമ്പോള് പോലും സര്ക്കാരിന്റെ ആവശ്യം അനുസരിച്ചില്ല അലി. ഏറെ തിരിച്ചടികള് നേരിടേണ്ടി വരുമെന്ന ബോധ്യത്തോടെ തന്നെയായിരുന്നു നടപടി. ”വിയറ്റ്നാമുമായി എനിക്ക് പ്രശ്നങ്ങളൊന്നുമില്ല. വെളുത്തവന്റെ അധീശത്വം നിലനിര്ത്താന് മൈലുകള് താണ്ടി യുദ്ധത്തിനൊരുങ്ങാന് എന്നെ കിട്ടില്ല. ഇത്തരം അനീതികള് അവസാനിക്കേണ്ട കാലമാണിത്”- അലിയുടെ വാക്കുകള് അമേരിക്കയില് മാത്രമല്ല, ലോകത്തിന്റെ വിവിധ ഭാഗങ്ങളില് തന്നെ ചലനമുണ്ടാക്കി.
ഈ നിരാകരണത്തിനുള്ള ശിക്ഷ കടുത്തതായിരുന്നു. 1964ല് ലഭിച്ച ലോക ചാമ്പ്യന്പട്ടം തിരിച്ചെടുത്തു. ന്യൂയോര്ക്ക് ബോക്സിങ് കമ്മീഷനും ലോക ബോക്സിങ് അസോസിയേഷനും ചാമ്പ്യന് പട്ടം തിരിച്ചെടുത്തു. ബോക്സിങ് ലൈസന്സും അമേരിക്കന് സ്പോര്ട്സ് കൗണ്സിലിലെ അംഗത്വവും റദ്ദാക്കി. രാജ്യത്തിനായി യുദ്ധം ചെയ്യാത്തതിന് അഞ്ചു വര്ഷം തടവും 10,000 ഡോളര് പിഴയും വിധിച്ചു. എന്നാല്, ഇതൊന്നും കണ്ട് പിന്മാറാന് റിങ്ങിലെ പോരാളിക്കാകുമായിരുന്നില്ല.
തീരുമാനങ്ങളെ നിയമപരമായി തന്നെ അലി നേരിട്ടു. യുഎസ് സുപ്രീം കോടതിയില് നടന്ന കേസില് അന്തിമ ജയം അലിക്കൊപ്പം. ശിക്ഷാ നടപടികളെല്ലാം റദ്ദാക്കി. അലിയുടെ പദവികളും തിരിച്ചുനല്കി.
അവസാന കാലത്തും സാമൂഹ്യപ്രശ്നങ്ങളില് സജീവമായിരുന്നു അലി. യുഎസ് പ്രസിഡന്റ് സ്ഥാനാര്ഥി ഡൊണാള്ഡ് ട്രംപിന്റെ വിവാദ പരാമര്ശങ്ങളെ രോഗക്കിടക്കിയില്നിന്നു പോലും അദ്ദേഹം വിമര്ശിച്ചു. റിങ്ങിലും പുറത്തും സമൂഹത്തിനും മനുഷ്യാവകാശത്തിനും വേണ്ടി നിലകൊണ്ട മുഹമ്മദലിയുടെ പോരാട്ടത്തിനും വിരാമം.
