പാരീസ്: ഫ്രഞ്ച് ഓപ്പണ് ടെന്നീസ് ചാമ്പ്യന്ഷിപ്പിന്റെ മിക്സഡ് ഡബിള്സില് ലിയാണ്ടര് പേസ്- മാര്ട്ടിന ഹിംഗിസ് സഖ്യവും സാനിയ മിര്സ-ഇവാന് ഡോഡിഗ് സഖ്യവും ഫൈനലില് ഏറ്റുമുട്ടും.
ഇന്ത്യന് താരം പേസ്- സ്വിസ് സുന്ദരി മാര്ട്ടിന ഹിംഗിസ് സഖ്യം ഫ്രഞ്ച്-ചെക്ക് ജോഡികളും ആറാം സീഡുകളുമായ റോജര് വെസ്ലിന്-ഹല്വകോവ കൂട്ടുകെട്ടിനെ മൂന്ന് സെറ്റ് നീണ്ട വാശിയേറിയ പോരാട്ടത്തിനൊടുവില് കീഴടക്കിയാണ് ഫൈനലിലേക്ക് കുതിച്ചത്.
ടൈബ്രേക്കറിലേക്ക് നീണ്ട പോരാട്ടത്തില് 6-3, 3-6, 10-7നായിരുന്നു സീഡ് ചെയ്യപ്പെടാത്ത പെയ്സ്-ഹിന്ഗിസ് സഖ്യത്തിന്റെ ജയം.
രണ്ടാം സീഡായ സാനിയ മിര്സ-ക്രൊയേഷ്യന് താരം ഇവാന് ഡോഡിഗ് സഖ്യം മൂന്നാം സീഡും ഫ്രഞ്ച് ജോഡികളുമായ പിയെറെ ഹ്യൂസ് ഹെര്ബട്ട്-ക്രിസ്റ്റീന മലഡെനോവിക് സഖ്യത്തെയാണ് സെമിയില് മൂന്ന് സെറ്റ് നീണ്ട പോരാട്ടത്തിനൊടുവില് മറികടന്നത്.
ടൈബ്രേക്കറിലേക്ക് നീണ്ട പോരാട്ടത്തില് 4-6, 6-3, 12-10 എന്ന സ്കോറിനായിരുന്നു സാനിയ സഖ്യത്തിന്റെ വിജയം.
ഫൈനലില് പേസിന് വിജയിക്കാനായാല് മിക്സഡ് ഡബിള്സില് നാല് ഗ്രാന്ഡ്സ്ലാമുകളും വിജയിച്ച താരമെന്ന റെക്കോര്ഡ് സ്വന്തമാക്കാം. പുരുഷ ഡബിള്സില് ഈ നേട്ടം പെയ്സ് നേരത്തെ സ്വന്തമാക്കിയിട്ടുണ്ട്. 2014-ല് ബ്രസിലീന്റെ ബ്രൂണോ സോറസുമൊത്ത് യുഎസ് ഓപ്പണ് നേടിയ ശേഷം സാനിയ ഇതുവരെ ഗ്രാന്ഡ്സ്ലാം മിക്സഡ് ഡബിള്സ് കിരീടം നേടിയിട്ടില്ല.
