കൊല്ലം: ഇന്നലെയുണ്ടായ കനത്ത മഴയില് ജില്ലയില് താഴ്ന്ന പ്രദേശങ്ങള് വെള്ളത്തിലാക്കുകയും ഇടിമിന്നലില് നാശനഷ്ടം സംഭവിക്കുകയും ചെയ്തു. രാവിലെ മുതല് തുടങ്ങിയ മഴ രാത്രിവൈകിയും തുടരുകയാണ്. തീരപ്രദേശങ്ങളില് കടലാക്രമണ സാധ്യതയും നിലനില്ക്കുകയാണ്.പരവൂര്, ഇരവിപുരം എന്നീ തീരപ്രദേശങ്ങളില് ജാഗ്രത നിര്ദ്ദേശം നല്കിയിട്ടുണ്ട്.
അഞ്ചാലുംമൂട്: രാവിലെ പെയ്ത മഴയില് ജില്ലയില് പല’ഭാഗങ്ങളിലും വ്യാപക നാശം. തോരാതെ പെയ്ത മഴയെ തുടര്ന്ന് താഴ്ന്ന പ്രദേശങ്ങള് വെള്ളക്കെട്ടിലായി. പ്രദേശങ്ങളിലെ വിവിധ റോഡുകള് വെള്ളത്തില് മുങ്ങിയതിനെ തുടര്ന്ന് ഈ പ്രദേശങ്ങളില് കാല്നടയാത്ര പോലും വളരെ ദുഷ്കരമായി. കഴിഞ്ഞദിവസം പുലര്ച്ചെ ഉണ്ടായ ഇടിമിന്നലില് പ്രദേശത്തെ വീടുകളിലെ വൈദ്യുത ഉപകരണങ്ങള്ക്കും നാശനഷ്ടം ഉണ്ടായി. വേനല് ചൂടിന് ആശ്വാസമേകി പെയ്തിറങ്ങിയ വേനല്മഴ വാഹനയാത്രക്കാരെയും വലച്ചു. പ്രദേശത്തെ കായലുകളില് വെള്ളം പൊങ്ങിയത് മത്സ്യബന്ധനക്കാരെ ബുദ്ധിമുട്ടിലാക്കി. രാവിലെ മുതല് മഴപെയ്തതിനാല് റോഡിലൂടെയുള്ള കാല്നടയാത്രയും വാഹനയാത്രയും ദുഷ്കരമായതിനാല് പലരും വീടിനു പുറത്തേക്ക് പോലും ഇറങ്ങിയില്ല. തോരാതെ പെയ്ത മഴ പെരുമണ് വഴിയുള്ള ജങ്കാര് യാത്രയും ബുദ്ധിമുട്ടിലാക്കിയിരുന്നു. വരും ദിവസങ്ങളിലും ശക്തമായ മഴപെയ്യാനാണ് സാധ്യത.
കൊട്ടാരക്കര: ശക്തമായ മഴയില് റബ്ബര്മരം പിഴുത് വീണ് വീടിന് നാശനഷ്ടം സംഭവിച്ചു. പെരുംകുളം വടക്കതില് രവീന്ദ്രന്പിള്ളയുടെ വീടിന് മുകളിലേക്കാണ് സമീപത്ത് നിന്ന റബ്ബര് മരം പിഴുത് വീണത്. ഇന്നലെ രാവിലെ 9.30 ഓടെയാണ് സംഭവം. വീടിന്റെ ഓടുകളും മേല്ക്കൂരയും ഭാഗികമായി തകര്ന്നു. ശബ്ദം കേട്ട് വീട്ടുകാര് ഓടിമാറിയതിനാല് അപകടം ഉണ്ടായില്ല.
