സത്സംഗത്വേ നിസ്സംഗത്വം
നിസ്സംഗത്വേ നിര്മ്മോഹത്വം
നിര്മ്മോഹത്വേ നിശ്ചലതത്ത്വം
നിശ്ചലതത്ത്വേ ജീവന്മുക്തിഃ
9
സത്സംഗത്തില് (നല്ല കൂട്ടുകെട്ട് ) നിന്നും നിസ്സംഗത്വം (നിര്മമത) ഉണ്ടാകുന്നു. നിസ്സംഗതയില് നിന്ന് മോഹമില്ലായ്മ ഉണ്ടാകുന്നു. മോഹമില്ലായ്മയില് നിന്ന് നിശ്ചലതത്വത്തിന്റെ ജ്ഞാനം (പരമാര്ത്ഥജ്ഞാനം) ഉണ്ടാകുന്നു. അതോടെ ജീവന്മുക്തിയെയും പ്രാപിക്കുന്നു.
സജ്ജനങ്ങളുമായുള്ള കൂടിച്ചേരലാണ് സത്സംഗം. നല്ല ജനങ്ങള് എന്നാല്, ഈശ്വരചിന്തയുള്ളവര്, ധര്മ്മമാര്ഗ്ഗത്തില് ജീവിക്കുന്നവര് എന്നൊക്കെ കരുതാം. ഇത്തരം ആളുകളുമായുള്ള സമ്പര്ക്കം കൊണ്ട് നമ്മില് ഒന്നിനോടും അധിക താല്പര്യമില്ലാത്ത ഒരവസ്ഥ സൃഷ്ടിക്കപ്പെടുന്നു. നമുക്ക് ചതുരംഗം എന്ന കളി ഉദാഹരണമായി എടുക്കാം. കൂടുതല് പ്രഗല്ഭനായ കളിക്കാരനില് നിന്ന് കളിയിലൂടെ ചില പാഠങ്ങള് തുടക്കക്കാരന് പകര്ന്നുകിട്ടുമല്ലോ. രണ്ടാളും കൂടുമ്പോള് കളിയിലെ ഏകാഗ്രത ഒരു ധ്യാന അന്തരീക്ഷം സൃഷ്ടിക്കുകയും ചെയ്യും. ഇതുപോലെ ഈശ്വരനെ ഭജിക്കുന്ന സമാനഹൃദയര് ഒത്തുചേരുമ്പോള് നിസ്സംഗത്വം ഉണ്ടാകുകയും ക്രമേണ അത് മോഹങ്ങളെ ഉപേക്ഷിച്ച് സഹജവാസനകളെയും രാഗാദിമാലിന്യങ്ങളെയും മറികടന്ന് പരമാത്മാവിന്റെ നിശ്ചലതത്വത്തിലെത്തുകയും ചെയ്യുന്നു. ഇതിന്റെ വികസിതരൂപമാണ് ജീവന്മുക്തി.
വയസി ഗതേ കഃ കാമവികാരഃ
ശുഷ്കേ നീരേ കഃ കാസാരഃ
ക്ഷീണേ വിത്തേ കഃ പരിവാരഃ
ജ്ഞാതേ തത്ത്വേ കഃ സംസാരഃ
10
വയസ്സായിക്കഴിഞ്ഞാല് കാമമെവിടെ, വെള്ളം വറ്റിപ്പോയാല് കുളമെവിടെ, ധനം ശോഷിച്ചുപോയാല് കുടുംബമെവിടെ, പരമതത്വമറിഞ്ഞാല് സംസാര ദു:ഖമെവിടെ.
പടുകിളവനായാല് നഷ്ടമാകുന്ന കാമത്തേയും ജലം വറ്റിയാല് അപ്രത്യക്ഷമാകുന്ന തടാകത്തേയും സമ്പത്ത് നഷ്ടപ്പെടുമ്പോള് ഉപേക്ഷിക്കുന്ന പരിവാരങ്ങളെയും പോലെ തത്ത്വജ്ഞാനമുണ്ടായാല് സംസാരബന്ധങ്ങളില് നിന്നും മോചനം നേടാനാകും. എന്താണ് തത്ത്വജ്ഞാനം? മനസ്സില് മായാവലയം ഉള്ളതുകൊണ്ട് ദുഃഖങ്ങളും കഷ്ടപ്പാടുകളും നമ്മെ കുഴക്കുന്നത് ലോകം മായയാണ് എന്നും താന് നാശമില്ലാത്ത ആത്മാവും ബ്രഹ്മത്തിന്റെ ഭാഗവുമാണെന്നതാണ് തിരിച്ചറിവ് – തത്ത്വജ്ഞാനം. അതുണ്ടായാല് ലൗകികമായ കഷ്ടതകള് നമ്മെ ബാധിക്കുകയില്ല.
(തുടരും)
