കൊല്ലം: ജില്ലയിലെ പോളിങ് ബൂത്തുകളില് വന്സജ്ജീകരണമാണ് ഒരുക്കിയിരിക്കുന്നതെന്ന് ജില്ലാ കളക്ടര് എ.ഷൈനാമോള് പറഞ്ഞു. എല്ലാ മാതൃകാ-സ്ത്രീസൗഹൃദ ബൂത്തുകളിലും മെഡിക്കല് സ്റ്റാഫുകളുടെ സാന്നിധ്യമുണ്ടായിരിക്കും കൂടാതെ വീല്ചെയറുകളുമുണ്ടാകും. ശാരീരികമായി അവശത ഉള്ളവര്ക്ക് ക്യൂ പാലിക്കാതെ തന്നെ വോട്ട് ചെയ്യാം. ബിഎല്ഒയെ കൂടാതെ വെല്ഫയര് കമ്മിറ്റി അംഗങ്ങളുടെ സഹായവും, ആവശ്യമെങ്കില് ലഭിക്കും. വിതരണകേന്ദ്രങ്ങളില് ആംബുലന്സ് അടക്കമുള്ള മെഡിക്കല് ടീമുകള് ഉണ്ടായിരിക്കും. ഏതെങ്കിലും ബൂത്തുകളില് ആവശ്യമുണ്ടാകുന്നപക്ഷം സംഘങ്ങള് അവിടെയെത്തും. എല്ലാ ബൂത്തുകളിലും, അടിസ്ഥാനസൗകര്യങ്ങള് ഉറപ്പാക്കുവാന് സെക്ടറല് ഓഫീസര്മാര്ക്ക് നിര്ദ്ദേശം നല്കിയിട്ടുണ്ട്. ഇതിനാവശ്യമായ ഫണ്ടും താലൂക്കുകളില് ലഭ്യമാക്കിയിട്ടുളളതാണ്.
വോട്ടിങിന് ശേഷം പോളിങ് ഉദ്യോഗസ്ഥര്ക്ക് തിരികെ കളക്ഷന് സെന്ററുകളില് വേഗത്തില് എത്തുന്നതിനും ശേഷം എത്രയും വേഗം ഇലക്ഷന് സാമഗ്രികള് തിരികെ നല്കി ഇലക്ഷന്ജോലിയില് നിന്ന് വിരമിക്കുന്നതിനുമുളള ഒരുക്കങ്ങള് കളക്ഷന് സെന്ററുകളില് ഏര്പ്പെടുത്തും. കൂടാതെ സെന്ററുകളില് നിന്ന് പ്രധാന കേന്ദ്രങ്ങളിലേക്ക് എത്തിച്ചേരുന്നതിനുളള വാഹനസൗകര്യങ്ങളുമുണ്ടാകും.
