കോഴിക്കോട്: ക്ഷയരോഗ നിര്ണയം എളുപ്പത്തില് സാധ്യമാക്കുന്ന ജീന് എക്സ്പെര്ട്ട് മെഷീന് കോഴിക്കോട്ടും. കോഴിക്കോട് മെഡിക്കല് കോളജിലെ മൈക്രോ ബയോളജി ലാബില് പ്രത്യേകം സജ്ജമാക്കിയ മുറിയിലാണ് മെഷീന് സ്ഥാപിക്കുന്നത്. മെഷീന് ഉപയോഗിച്ച് നടത്തുന്ന കാട്രിഡ്ജ് ബേസ്ഡ് ന്യൂ ക്ലിക്ക് ആസിഡ് ആംപ്ലിഫിക്കേഷന് ടെസ്റ്റ്- സിബി നാറ്റ് വഴിയാണ് രോഗബാധ കണ്ടെത്തുക. നിലവില് എംഡിആര് ടിബി സ്ഥിരീകരിക്കുന്നതിനായി തിരുവനന്തപുരത്ത് ഐആര്എല് ലാബിലേക്കാണ് അയക്കുന്നത്. ഇവിടെ നിന്നും പരിശോധനാഫലം ലഭിക്കുന്നതിന് ഏകദേശം ഒന്നരമാസം വരെ വേണ്ടി വരുന്നു. ഈ സാഹചര്യത്തില് സംശയം തോന്നുന്ന രോഗികള്ക്ക് രോഗാബധ സ്ഥിരീകരിക്കുന്നതിന് മുമ്പ് തന്നെ ചികിത്സ തുടങ്ങുകയാണ് പതിവ്. ഈ രീതി ഒഴിവാക്കാന് പുതിയ മെഷീന് സ്ഥാപിക്കുന്നതോ ടെ സാധിക്കും.
ക്ഷയരോഗ നിയന്ത്രണരംഗത്ത് വന് കുതിച്ചുചാട്ടമായി മാറിയിരിക്കുകയാണ് ഏറ്റവും നൂതന സംവിധാനമായ സിബി നാറ്റ്. പോളിബര് ചെയിന് റിയാക്ഷന് അടിസ്ഥാനമാക്കിയുള്ള ക്ഷയരോഗ നിര്ണയമാണ് ഇതില് നടക്കുക. നിലവില് ചെസ്റ്റ് എക്സറേ, എഎഫ്ബി സ്റ്റെയിനിംഗ് ആന്റ് മൈക്രോസ്കോപ്പി, കള്ച്ചര്, മാന്ടൗക്സ് ടെസ്റ്റ് എന്നീ രീതികളാണ് ക്ഷയരോഗനിര്ണയത്തിന് സ്വീകരിക്കുന്നത്.
അണുബാധ കുറവായ ക്ഷയരോഗികളിലും എച്ച്ഐവി പോസിറ്റീവ് ആയവരിലും കുട്ടികളിലെ ക്ഷയരോഗവും പെട്ടെന്ന് രോഗനിര്ണയം നടത്താന് സിബി നാറ്റ് വളരെ ഫലപ്രദമാണ്. റിഫാംമ്പിസിന് റസിസ്റ്റന്റ് ടി.ബി. കണ്ടെത്തുന്നതിനും സിബി നാറ്റ് ഫലപ്രദമാണ്.
ശരിയായ രീതിയില് ക്ഷയരോഗി മരുന്നുകള് കഴിച്ചില്ലെങ്കില് രോഗാണുക്കള് മരുന്നുകള്ക്ക് പ്രതിരോധിക്കുവാന് കഴിയാത്ത എംഡിആര് ടിബി ആയി മാറുന്നു. ഇന്ന് എംഡിആര് ടിബി കണ്ടുപിടിക്കുന്നതിന് ഉപയോഗിക്കുന്ന കള്ച്ചര് രീതി ഒന്നര മുതല് രണ്ടര മാസം കഴിഞ്ഞാണ് റിസള്ട്ട് ലഭ്യമാക്കുന്നത്. എന്നാല് സിബി നാറ്റ് ഉപയോഗിക്കുന്നതിലൂടെ 2 മണിക്കൂറിനുള്ളില് റിസള്ട്ട് ലഭ്യമാകും. സിബി നാറ്റ് എന്ന ഈ അത്യാധുനിക സാങ്കേതിക വിദ്യയുടെ ഉപയോഗം വഴി ക്ഷയരോഗ നിര്ണയം കൂടുതല് കാര്യക്ഷമമാക്കുവാന് സാധിക്കും.
26 ലക്ഷത്തിലധികം രൂപ വരുന്ന ഈ ഉപകരണം കേന്ദ്ര ആരോഗ്യമന്ത്രാലയത്തിന് കീഴിലെ സെന്ട്രല് ടിബി ഡിവിഷന് ആണ് ലഭ്യമാക്കിയിരിക്കുന്നത്. കോഴിക്കോടിന് പുറമെ, കണ്ണൂര്, വയനാട് ജില്ലകളിലെ രോഗികള്ക്ക് കൂടി സൗജന്യ രോഗനിര് ണയം നടത്താനുപകരിക്കുന്ന ഉപകരണത്തിന്റെ പ്രവര് ത്തനം ജില്ലാ ക്ഷയരോഗകേ ന്ദ്രവും മെഡിക്കല് കോളജ് മൈക്രോബയോളജി വിഭാഗവും സംയുക്തമായാണ് നിയന്ത്രിക്കുന്നത്. ഇതിന്റെ പ്രവര്ത്തനത്തിനാവശ്യമായ കാട്രിഡ്ജുകളും അനുബന്ധ വസ്തുക്കളും സെന്ട്രല് ടിബി ഡിവിഷനില് നിന്നും ലഭ്യമാക്കും.
ഉപകരണത്തിന്റെ ഔപചാരികമായ ഉദ്ഘാടനം 28ന് രാവിലെ 11ന് ഗവ. മെഡിക്കല് കോളജ്, പിടിഎ സെമിനാര് ഹാളില് നടക്കുന്ന ചടങ്ങില് ജില്ലാ കളക്ടര് എന്. പ്രശാന്ത് നിര്വഹിക്കും. ഗവ. മെഡിക്കല് കോളജ് പ്രിന്സിപ്പാള് ഡോ. പി.വി. നാരായണന് അധ്യക്ഷത വഹിക്കും. എഡിഎം ടി. ജനില്കുമാര്, ഡിഎംഒ ഡോ. ആര്.എല്. സരിത, ജില്ലാ ടി.ബി. ഓഫീസര് ഡോ. പി.പി. പ്രമോദ് കുമാര് തുടങ്ങിയവര് ചടങ്ങില് പങ്കെടുക്കും.
