ന്യൂദല്ഹി: കൊല്ലം പരവൂരിലെ വെടിക്കെട്ടപകടം സംബന്ധിച്ച് സംസ്ഥാന ആഭ്യന്തരസെക്രട്ടറിയുടെ അന്വേഷണ റിപ്പോര്ട്ട് സംസ്ഥാന സര്ക്കാര് മുക്കിയെന്ന് പ്രൊഫ. റിച്ചാര്ഡ് ഹേ. ലോക്സഭയില് ശൂന്യവേളയില് നടന്ന ചര്ച്ചയിലാണ് പരവൂര് വെടിക്കെട്ടപകടം എംപി സഭയുടെ ശ്രദ്ധയില് കൊണ്ടുവന്നത്.
വെടിക്കെട്ടപകടത്തിലേക്ക് കൊണ്ടെത്തിച്ച ഉദ്യോഗസ്ഥര്ക്കെതിരെ പരാമര്ശങ്ങളുള്ള ആഭ്യന്തര സെക്രട്ടറിയുടെ റിപ്പോര്ട്ട് പുറത്തുവരാതിരിക്കാനുള്ള ശ്രമത്തിലാണ് സംസ്ഥാന സര്ക്കാരെന്ന് ലോക്സഭയിലെ ആംഗ്ലോ ഇന്ത്യന് പ്രതിനിധിയായ പ്രൊഫ. റിച്ചാര്ഡ് ഹേ പറഞ്ഞു. അപകടത്തില് രക്ഷിതാക്കള് മരണപ്പെട്ട കുട്ടികള്ക്ക് പ്രത്യേക സംരക്ഷണം നല്കേണ്ടതുണ്ടെന്നും ഹേ പറഞ്ഞു. ഇവര്ക്കായി പ്രത്യേക നഷ്ടപരിഹാരം പ്രഖ്യാപിക്കണമെന്നും റിച്ചാര്ഡ് ഹേ ലോക്സഭയില് ആവശ്യപ്പെട്ടു.
രാജ്യം നടുങ്ങിയ സംഭവമാണ് കൊല്ലം പരവൂരില് നടന്നത്. ദുരന്തത്തിനിരയായവരുടെ ശരീരഭാഗങ്ങള് കിലോമീറ്ററുകള് ദൂരേക്ക് തെറിച്ചുവീണു. ജില്ലാ കളക്ടറുടെ നിരോധന ഉത്തരവ് പോലും മറികടന്ന് എങ്ങനെ വെടിക്കെട്ട് നടന്നു എന്നത് പരിശോധിക്കണമെന്നും റിച്ചാര്ഡ് ഹേ ആവശ്യപ്പെട്ടു. ഇതോടെ സംസ്ഥാന സര്ക്കാരിനെ പിന്തുണച്ച് കെ.സി. വേണുഗോപാല് എംപി രംഗത്തെത്തി.
സംസ്ഥാന സര്ക്കാരും കേന്ദ്രവും സംയുക്തമായി മികച്ച രീതിയിലാണ് രക്ഷാ പ്രവര്ത്തനങ്ങള് നിര്വഹിച്ചതെന്നും കെ.സി. വേണുഗോപാല് പറഞ്ഞു. പരവൂര് വെടിക്കെട്ടപകടത്തെ ദേശീയ ദുരന്തമായി പ്രഖ്യാപിക്കണമെന്ന ആവശ്യം പരിഗണിക്കുക അസാധ്യമാണെന്ന് കേന്ദ്രപാര്ലമെന്ററികാര്യമന്ത്രി വെങ്കയ്യ നായിഡു ലോക്സഭയെ അറിയിച്ചു.
