ന്യൂദല്ഹി: ദീര്ഘകാല വിസയില് ഭാരതത്തില് കഴിയുന്ന ഹിന്ദുക്കള് ഉള്പ്പെടെയുള്ള പാക് ന്യൂനപക്ഷ അഭയാര്ഥികള്ക്ക് ഭൂമി ഉള്പ്പെടെയുള്ള വസ്തുവകകള് വാങ്ങാന് കേന്ദ്രസര്ക്കാര് അനുമതി നല്കി. അഭയാര്ത്ഥികള്ക്ക് പാന് കാര്ഡ്, ആധാര് കാര്ഡ്, ബാങ്ക് അക്കൗണ്ട് തുടങ്ങിയ രേഖകള് നല്കാനും കേന്ദ്രസര്ക്കാര് തീരുമാനിച്ചു. പാക്-ബംഗ്ലാദേശി ഹിന്ദു അഭയാര്ത്ഥികളുടെ പതിറ്റാണ്ടുകളായുള്ള ആവശ്യത്തിനാണ് കേന്ദ്രസര്ക്കാര് പച്ചക്കൊടി കാണിച്ചത്.
കളക്ടര്, ഡപ്യൂട്ടി കമ്മീഷണര്, ജില്ലാ മജിസ്ട്രേറ്റ് എന്നിവര്ക്ക് അഭയാര്ത്ഥികളെ അംഗീകരിക്കുന്നതിന് അധികാരമുണ്ട്. രണ്ടുവര്ഷത്തേക്കാണ് പാക് പൗരന്മാര്ക്ക് ഭാരത പൗരത്വം നല്കിക്കൊണ്ട് ഇത്തരം സൗകര്യങ്ങള് നല്കുക. പാക് അഭയാര്ത്ഥികള്ക്ക് ദീര്ഘകാല വിസ നല്കുന്നതടക്കമുള്ള സൗകര്യങ്ങള് മോദി സര്ക്കാര് അധികാരത്തിലെത്തിയ ശേഷം ഏര്പ്പെടുത്തിയിരുന്നു. 2015 സപ്തംബറില് പാക്-ബംഗ്ലാദേശ് ന്യൂനപക്ഷങ്ങള്ക്ക് വിസാ കാലാവധി അവസാനിച്ച ശേഷവും രാജ്യത്തു തുടരാനും കേന്ദ്രസര്ക്കാര് അനുമതി നല്കിയിരുന്നു.
പാക് അഭയാര്ത്ഥികള്ക്ക് ഭാരതീയപൗരത്വം നല്കുന്നതിന്റെ ഭാഗമായി അപേക്ഷാ ഫീസ് 15,000 രൂപയില് നിന്ന് 100 രൂപയായി കുറച്ചതായും കേന്ദ്ര ആഭ്യന്തര മന്ത്രാലയം പുറത്തിറക്കിയ പുതിയ വിജ്ഞാപനത്തില് പറയുന്നു. പാകിസ്ഥാന്, ബംഗ്ലാദേശ്, അഫ്ഗാനിസ്ഥാന് തുടങ്ങിയ രാജ്യങ്ങളില് നിന്നുള്ള അഭയാര്ത്ഥികള് എകദേശം രണ്ട് ലക്ഷത്തോളം വരും. ഇതിലേറെയും ഹിന്ദുക്കളും സിക്കുകാരുമാണ്. ജോധ്പൂര്, ജയ്സാല്മീര്, റായ്പൂര്, അഹമ്മദാബാദ്, രാജ്കോട്ട്, കച്ച്, ഭോപ്പാല്, ഇന്ഡോര്, മുംബൈ, നാഗ്പൂര്, പൂണൈ, ദല്ഹി, ലഖ്നൗ തുടങ്ങി 400 ലധികം അഭയാര്ഥി കേന്ദ്രങ്ങളാണ്‘രാജ്യത്തുള്ളത്.
ഭാരതത്തില് കഴിയുന്ന പാക് ന്യൂനപക്ഷങ്ങള് അനുഭവിക്കുന്ന ബുദ്ധിമുട്ടുകളെപ്പറ്റി കേന്ദ്രസര്ക്കാര് തുടര്ച്ചയായി നിരീക്ഷിച്ചൂ വരികയാണെന്ന് വിജ്ഞാപനത്തില് പറയുന്നുണ്ട്. കേന്ദ്ര സര്ക്കാര് അനുവദിച്ചു നല്കുന്ന പ്രത്യേക അവകാശങ്ങളില് റിസര്വ് ബാങ്കിന്റെ മുന്കൂര് അനുവാദം കൂടാതെ ബാങ്ക് അക്കൗണ്ട് തുറക്കല്, ഡ്രൈവിങ്ങ് ലൈസന്സ് സമ്പാദിക്കല് എന്നിവയുമുണ്ട്. ചില നിയന്ത്രണങ്ങള്ക്ക് വിധേയമായിട്ടായിരിക്കും ഇവ നല്കുക.
അഭയാര്ത്ഥികളുടെ സഞ്ചാര സ്വാതന്ത്ര്യം അവര് താമസിക്കുന്ന ഒരു പ്രത്യേക പ്രദേശത്തേക്ക് പരിമിതപ്പെടുത്തുന്നതിനു പകരം പ്രസ്തുത പ്രദേശം ഉള്പ്പെടുന്ന സംസ്ഥാനത്തോ കേന്ദ്രഭരണ പ്രദേശത്തോ പൂര്ണ്ണമായ സഞ്ചാരസ്വാതന്ത്ര്യം നല്കുക, ദേശീയ തലസ്ഥാനത്ത് ജീവിക്കുന്നവര്ക്ക് സഞ്ചാരസ്വാതന്ത്രം നല്കുക, മറ്റ് സംസ്ഥാനങ്ങള് സന്ദര്ശിക്കാനുള്ള നടപടിക്രമങ്ങള് ലഘൂകരിക്കൂക തുടങ്ങിയ നിര്ദ്ദേശങ്ങളും പരിഗണനയിലുണ്ട്.
ദീര്ഘകാല വിസാ രേഖകള് ഒരു സംസ്ഥാനത്ത് നിന്നോ കേന്ദ്രഭരണ പ്രദേശത്ത് നിന്നോ മറ്റൊരിടത്തേക്ക് മാറ്റാന് അനുവദിക്കുക, വിസ കാലാവധി പുതുക്കുന്നതില് വരുത്തുന്ന കാലതാമസിന് ഈടാക്കുന്ന പിഴയില് ഇളവു നല്കുക, നിലവിലെ താമസം മറ്റൊരിടത്തേക്ക് മാറ്റിയാല് പുതിയ മേല്വിലാസത്തില് മുന്കൂര് അനുവാദം കൂടാതെ വിസ അപേക്ഷയ്ക്ക് അവസരം നല്കുക എന്നിവയും അനുവദിച്ചിട്ടുണ്ട്.
