കടുത്തുരുത്തി: വേനല് കടുത്തതോടെ കുടിവെള്ളത്തിനായി നെട്ടോട്ടമോടുന്ന യാത്രക്കാരെ കൊള്ളയടിക്കാന് പല തന്ത്രങ്ങളുമായി നാരങ്ങാവെള്ള കച്ചവടം. കൂള്ബാര്, ബേക്കറി തുടങ്ങിയ കടകളിലും തട്ടുകടകളില് നാരങ്ങാ വെള്ളത്തിന് വില തോന്നിയപടിയാണ്. ചില കടകളില് നാരങ്ങയ്ക്കു പകരം നേര്പ്പിച്ച അസറ്റിക് ആസിഡ് പഞ്ചസാരയും ചേര്ത്ത് കലക്കി കൊടുക്കുന്നതായി പരാതിയുണ്ട്. സാധാരണ ഒരു നാരങ്ങ രണ്ടായി പകുത്ത് അതിലൊന്നും ഒരു സോഡയും ചേര്ത്താണ് സോഡാനാരങ്ങാവെള്ളം തയ്യാറാക്കുന്നത്. എന്നാല് അതിലും കച്ചവടക്കാര് ഇപ്പോള് ലാഭം കണ്ടെത്തുകയാണ്. രണ്ടു ലിറ്ററിന്റെ സോഡ ഉപയോഗിച്ചാല് 8 നാരങ്ങാവെള്ളംവരെ കൊടുക്കാന് കഴിയും. സോഡയ്ക്ക് വില 20 രൂപയാണ്. നാരങ്ങാവെള്ളത്തിന് 10 രൂപ മുതല് 15 രൂപവരെ വാങ്ങുന്ന കടകളുണ്ട്. കടയിലെത്തുന്നവരുടെ മുഖംനോക്കി വിലനിശ്ചയിക്കുന്ന രീതിയും ഉണ്ടെന്നും പറയപ്പെടുന്നു.
എന്നാല് പൊരിവെയിലില് ദാഹിച്ചുവലയുന്നവര് ഇത്തരം തട്ടിപ്പുകളൊന്നും മുഖവിലയ്ക്കെടുക്കാതെ വെള്ളം വാങ്ങി കുടിക്കുവാന് നിര്ബന്ധിതരാകുന്നു. ബസ്സ്റ്റോപ്പുകളിലും ജനങ്ങളെത്തുന്ന മറ്റു സ്ഥലങ്ങളിലും സൗജന്യ ശുദ്ധജലവിതരണത്തിന് സംവിധാനം ഏര്പ്പെടുത്തുക മാത്രമാണ് ഇത്തരം തട്ടിപ്പുകളില്നിന്നും രക്ഷനേടാന് മാര്ഗ്ഗമെന്ന് ജനങ്ങള് പറയുന്നു.
