പത്തനംതിട്ട: എന്ഡിഎ സംസ്ഥാനതലപ്രഖ്യാപനത്തിനായി പത്തനംതിട്ടയിലെത്തുന്ന ബിജെപിദേശീയ അദ്ധ്യക്ഷന് അമിത് ഷായെ സ്വീകരിക്കാനുള്ള ഒരുക്കങ്ങള് പൂര്ത്തിയാകുന്നതായി ബിജെപി ജില്ലാ പ്രസിഡന്റ് അശോകന്കുളനട, ജനറല് സെക്രട്ടറിമാരായ അഡ്വ.എസ്.എന്.ഹരികൃഷ്ണന്, ഷാജി ആര്.നായര് എന്നിവര് അറിയിച്ചു.
നാളെ വൈകിട്ട് 4ന് പത്തനംതിട്ട മുന്സിപ്പല് സ്റ്റേഡിയത്തിലാണ് പരിപാടി. ഇതോടനുബന്ധിച്ച് സമ്മേളന നഗരിയിലെ ശുചീകരണ പ്രവര്ത്തനങ്ങള് മഹിളാമോര്ച്ചയുടേയും യുവമോര്ച്ചയുടേയും നേതൃത്വത്തിലാണ് നടക്കുന്നത്. സമ്മേളനത്തിന്റെ പ്രചരണാര്ത്ഥം ഇന്നലെ വൈകിട്ട് നഗരത്തില് മഹിളാമോര്ച്ചയുടെ ആഭിമുഖ്യത്തില് വിളംബര ജാഥ നടത്തി. ജില്ലയുടെ വിവിധ ഭാഗങ്ങളില് നിന്നായി അന്പതിനായിരത്തോളം പേരാണ് സമ്മേളനത്തിലെത്തുന്നത്. സമ്മേളന നഗരിയിലെത്തുന്നവര്ക്ക് ഐ സപ്പോര്ട്ട് കുമ്മനം എന്ന കൂട്ടായ്മ സംഭാര പായ്ക്കറ്റുകള് വിതരണം ചെയ്യും. ഇതുകൂടാതെ കുടിവെള്ളം, വൈദ്യസഹായം, എന്നിവയും സജ്ജീകരിച്ചിട്ടുണ്ട്. വൈകിട്ട് 4 ന് ആരംഭിക്കുന്ന സമ്മേളനത്തിന് ബിജെപി സംസ്ഥാന പ്രസിഡന്റ് കുമ്മനം രാജശേഖരന് അദ്ധ്യക്ഷതവഹിക്കും. എന്ഡിഎ ഘടകക്ഷി നേതാക്കളായ തുഷാര് വെള്ളാപ്പള്ളി(ബിഡിജെഎസ്), പി.സി.തോമസ്(കേരളാ കോണ്ഗ്രസ്), രാജന്ബാബു( ജെ.എസ്.എസ്), അഡ്വ.എം.മെഹബൂബ്(ലോക ജനശക്തി), പി.വി.രാജേന്ദ്രന്(സോഷ്യലിസ്റ്റ് ജനതാദള്), വി.പ്രേമാനന്ദന്(എന്ഡിപി) തുടങ്ങിയവരും ബിജെപി യുടേയും ഘടകക്ഷികളുടേയും സംസ്ഥാന- ജില്ലാ നേതാക്കളും പങ്കെടുക്കും. സമ്മേളനത്തില് ജില്ലയിലെ എന്ഡിഎ സ്ഥാനാര്ത്ഥികള് സന്നിഹിതരായിരിക്കും.
