ന്യൂദല്ഹി: രാജ്യത്തെ ഊര്ജ ഉപഭോഗം കൂടുതല് കാര്യക്ഷമമാക്കാനുള്ള വന് പദ്ധതിക്ക് കേന്ദ്രസര്ക്കാര് രൂപംനല്കി. ഇതിന്റെ ഭാഗമായി രണ്ട് പദ്ധതികള്ക്ക് ഇന്ന് ആന്ധ്രാപ്രദേശ് തലസ്ഥാനമായ വിജയവാഡയില് തുടക്കംകുറിക്കും.
നാഷണല് എനര്ജി എഫിഷ്യന്റ് അഗ്രികള്ച്ചര് പമ്പ്സ് പ്രോഗ്രാം (എന്ഇഇഎപിപി), നാഷണല് എനര്ജി എഫിഷ്യന്റ് ഫാന് പ്രോഗ്രാം (എന്ഇഇഎഫ്പി) എന്നീ രണ്ട് പദ്ധതികളാണ് കേന്ദ്ര ഊര്ജ, കല്ക്കരി വകുപ്പുമന്ത്രി പീയൂഷ് ഗോയലും ആന്ധ്രാപ്രദേശ് മുഖ്യമന്ത്രി ചന്ദ്രബാബു നായിഡുവും ചേര്ന്ന് അവതരിപ്പിക്കുന്നത്. ഊര്ജമന്ത്രാലയത്തിന് കീഴിലുള്ള പൊതുമേഖലാ സ്ഥാപനങ്ങളുടെ സംയുക്ത സംരംഭമായ എനര്ജി എഫിഷ്യന്സി സര്വ്വീസസ് ലിമിറ്റഡാണ് പദ്ധതി നടപ്പാക്കുക.
വൈദ്യുതി അമിതമായി ഉപയോഗിക്കുന്ന പഴക്കംചെന്ന പമ്പുസെറ്റുകള്ക്ക് പകരം 5 സ്റ്റാര് റേറ്റിങ്ങുള്ള പുതിയ പമ്പുകള് രാജ്യവ്യാപകമായി മാറ്റിസ്ഥാപിക്കാന് കര്ഷകരെ സഹായിക്കുന്നതാണ് എന്ഇഇഎപിപി. പുതിയ പമ്പുകള്ക്ക് സ്മാര്ട്ട് കണ്ട്രോള് പാനലും സിംകാര്ഡും ഉണ്ടാകും. മൊബൈല് ഫോണ് ഉപയോഗിച്ച് ഈ മോട്ടോറുകള് ്രപവര്ത്തിപ്പിക്കാന് കഴിയും. ഈ പമ്പുസെറ്റുകള് വഴി 2019 ഓടെ 30 ശതമാനം ഊര്ജലാഭമാണ് കേന്ദ്രം ലക്ഷ്യമിടുന്നത്.
ഇതിനുപുറമെ വീടുകളിലും വ്യവസായസ്ഥാപനങ്ങളിലും പഴക്കംചെന്ന സീലിങ്ങ് ഫാനുകള് മാറ്റി ഊര്ജക്ഷമതയുള്ള 5 സ്റ്റാര് റേറ്റിങ്ങുള്ള പുതിയ ഫാനുകള് ലഭ്യമാക്കും. ഉഷ, ബജാജ് എന്നീ പ്രമുഖ കമ്പനികളുടെ 50 വാട്ട് ഫാനുകള് 60 രൂപ പ്രതിമാസ തവണകളിലാണ് വിതരണം ചെയ്യുക. പണം ഒരുമിച്ചുനല്കിയാല് 1250 രൂപ നല്കിയാല് മതിയാകും. മറിച്ചാണെങ്കില് 1440 രൂപവരും.
ഉപഭോക്താക്കള്ക്ക് പ്രതിവര്ഷം വൈദ്യുതിബില്ലില് 700 രൂപവരെ ലാഭിക്കാന് കഴിയും. രണ്ടുവര്ഷത്തിനുള്ളില് ഫാനിന്റെ വില ഉപഭോക്താവിന് ഈടാവുകയുംചെയ്യും. ഗാര്ഹിക ഉപഭോക്താക്കള്ക്ക് ഒരു ബില്ല് വഴി രണ്ട് സീലിങ്ങ് ഫാനുകളാണ് വാങ്ങാന് കഴിയുക.
